1Jesuzi dâŋ ʒiŋuc muwec: “No jâmbomac jâmbâŋ ŋazape mananiŋ, moc e lama jaŋere sapao feocte motâcko mi raʒihuc mocko sac huckerâ huocmu, ere fiuc roro â soroŋ qaqa muzo.
2Moc e motâcko raʒirâ feocmu, ere ine lama soŋaŋ‐jeŋic muzo.
3E fisime motâc soŋaŋzi honerâ motâc rocneocmu â lama jaŋe dâŋ hawari‐ticne mananiŋmu. Eme lamafâc‐ticne jaŋere ʒâŋe wirahuc sapaonec jowac‐jopa wahaocmu.
4E jahacne biŋefâc jowac‐jopa‐fâreme waharâ, dâŋ hawari‐ticne manaeŋgopieŋte bâjâpeniŋmu.
5Ŋic furune moc e ine mi bâjâpeniŋmu, e dâŋ hawari‐ticne kâuc bahuc hâhâwic bacnerâ wiseniŋmu.”
6Jesu e dâŋ suŋsuŋne iŋuc mume jaŋe weniŋucte iŋuc mukac muhuc kâuc bambiŋ.
7Eme Jesu e harierâ jazawec, “Jâmbomac jâmbâŋ ŋazape mananiŋ, lama jaŋerao fefe irec motâc no.
8No mi fuahape fuambiŋ jaŋe ine fiuc roro â soroŋ qaqa. Irec lama jaŋe dâŋjeŋic mi manambiŋ.
9Motâc no hâcne. Moc e fotâcnurâ raʒiocmu, e mi sipirickeocmu. E raʒic wefuc ehuc nânâ mâriri bâfuaocmu.
10Fiuc roro e lama qa sipiric erâ fiuc bawiseocte sawa fisiekac. No ine lama jaŋe juhâc qâhâmoniŋte nânâ bâfuape ɋaŋɋaŋ ɋâriaŋ fojareocte fisipo.
11“No soŋaŋ biaŋne. Soŋaŋ biaŋnezi lama jaŋere erâ juju‐ticne qikiŋneocmu.
12Soŋaŋ jabane, lama rujeŋic mi juekaczi ine kâte qâto fisime honerâ lama behec‐joparâ wiseocmu. Ehame kâte qâtozi lama ki bâtâtiec ejareocmu.
13E soŋaŋ jabanere lama jaŋere manabâc mi eocmu.
14No ine soŋaŋ biaŋne juekopac, eme Mamac â no hohonec mamanac eekoperec,
15irec sâcko no â gurufâc‐nane hohonec mamanac eeŋgopeneŋ. Irec no lama jaŋere erâ juju‐nane qikiŋnepemu.
16No lamafâc‐nane guru moc juŋgopieŋ, jaŋe sapa ʒirecnec mâcne, eme no jaŋe wâc mâmâc amec‐jopa warepe dâŋnane mananiŋmu. Eme lamazi guru mocjaha â soŋaŋzi wâc mocjaha iŋuc fuaocmu.
17No juju‐nane qikiŋnerâ mocwâc ropemu, irec Mamaczi nore ecneekac.
18Juju‐nane moczi mi nowac roocmu, i no nahacne maŋte qikiŋnepemu. No juju‐nane qikiŋnepemurâ â ropemurâ irec tâpiri mâmâc fonarekac. Iŋuc epemurâ Mamac‐nanezi munarewec.”
19Jesu e dâŋ iŋuc mume Judaŋic jaŋe manarâ mocwâc mu qaqatarac embiŋ.
20Ehuc bocjahazi ʒiŋuc mumbiŋ: “E demoŋzi ecneme maŋne sifuckekac, dâŋ mume wemocte manahuc juŋgopieŋ.”
21Gâcnezi ine ʒiŋuc mumbiŋ: “Demoŋheczi dâŋ iŋucne mi muocmu, me demoŋ moczi ŋic tiŋtuŋ jaŋere ʒâŋe sâcne bâtâcneocmu me?”
22Judaŋic taha ufuŋ jambuŋkembiŋ irec jara hombaŋ i mâmâteŋ dameŋko maickeme
23Jesu e taha ufuŋ irec maŋne moc ʒâŋene Salomo ira rac warec ehuc juhame
24Judaŋic jaŋe orâŋkerâ ʒiŋuc muhuc âzâcnembiŋ: “Go wemocte fuŋnege hesoŋketec maŋjahec boc eeŋgopeneŋ? Go Kristo jukomecko mutaniŋkerâ nâzâc me!”
25Eme Jesuzi ʒiŋuc jazawec: “No ŋazape mi mana ʒakieeŋgopieŋ. Mamac‐nanere micte gie baekopac izi mutaniŋnuekac.
26Â ŋoŋe ine lamafâc‐nane mi erâ juŋgopieŋte dâŋnane mi mana ʒakieeŋgopieŋ.
27Lamafâc‐nane erâ juŋgopieŋ jaŋe dâŋnane manaengopieŋ. Eme noni mana tarac‐jopahape bâjâpecnueŋgopieŋ.
28Eme juju sanaŋ bâfua‐jarepe sisipiric tâmiric juraʒihuc juniŋmu. Jaŋe nore meonec moczi babatarac‐jopane mi fokac.
29Mamac‐nanezi norao râec‐jopawec e ŋic â wiac sasawa qâhuc‐jopa‐fârekac. Eme jaŋe moczi Mamac‐nanere meonec sâcne mi batarac‐jopaocmu.
30No â Mamac nâhe mocjaha.”
31Iŋuc mume Judaŋic jaŋe qânâ ameckerâ hezo embiŋ.
32Iŋuc epie Jesuzi ʒiŋuc jazawec: “Gie biaŋne fuŋne fuŋne Mamacte ŋesiŋko bape honembieŋ, eme ŋoŋe wenimo irec qânâzi hecnuzo eŋgopieŋ?”
33Eme Judaŋic jaŋe micnao rorâ ʒiŋuc âzâcnembiŋ: “Gie biaŋne baekic irec mâcne, go ŋic jaha juekiczi Anutu âkehockehuc gahacnere Anutu muekic, irec qânâzi hecguzo muŋgopeneŋ.”
34Iŋuc mupie Jesuzi ʒiŋuc jazawec: “Sâcmutâc dâŋŋeŋicko ʒiŋuc mukicne: ‘Noni mupo, ŋoŋe nemu’.
35Eme mitire dâŋqâreŋ i âke sipuhuc moc mumune mi fokac. Erâ Anuture dâŋ fua‐jare jujec iŋucne mac jaŋe nemu mujarewec.
36Ehame ʒi ine no Mamaczi mutiricnurâ sorecnume wahapozi ‘no Anuture Ŋokâ’ iŋuc mupe ŋoŋe wemocte muŋgopieŋ, ‘Go Anutu âkehockekic’?
37Gie baekopac i honepie Mamac‐nanere sâc mi eekacko dâŋnane qikiŋnepie sâckeocmu.
38Me honepie Mamac‐nanere sâc eekacko ine dâŋnanere mâcne, gie bapa‐nanere erâ ʒâŋitacnunʒepieŋ, ehuc Mamaczi no maŋnuekac â noni Mamac maŋkeekopac irec fuŋne mana taranʒepieŋ.”
39Iŋuc mume kâpâcwâru bazo ehuc bârucnepie rawec.
40Eme Jesu e Jordaŋ opâ ocniŋucnao Johanezi mârâc fuŋkerâ ŋic opâ rua‐jare jujecko ra juwec.
41Ira juhame ŋic bocjahazi erao fisirâ dâŋ ʒiŋuc mumbiŋ: “Johane e mâsi bapa i mi bawec, â ŋic kecʒirec dâŋ muwec ine fideteŋ efârekac.”
42Eme mâreŋ ira bocjahazi Jesu manasiŋkembiŋ.
