Yon 11:6-40

⁶Ning bungina lungu ba Lasaras busi, wauyu xaidap luwa muli mana longga wa mana ba.

⁷Sup baing harua na lipuxindi dinaxu mana ba, “Tagoxoya muli mala Yudia.”

⁸Baing lipuxindi dinaxu mana daharua na ba, “Ne Lipu Tubatubaingam, nulana Yudadi dituba ba daxatung siangia. Maxuna ubo ba ugoxoya mala muli la ba?”

⁹Yesu haxuya ba, “Mana xaidap tela, auwa lulianam 12 duwa. Lipu gaxarea haxa xaidabia bagula tatuaki te, namua na bagu titia li lulianoa.

¹⁰Ne bungina haxa yambong, bing tatuaki namua na lulian te.”

¹¹Harua haruanga ba laing sup, baing harua muli ba, “Riara Lasaras kinu. Ne ngala bu ngahaunghaung.”

¹²Baing lipuxindi dinaxu mana daharua na ba, “Toxoratamona, nabu kinu, bagula sok xai.”

¹³Yesu harua mana matianoa, ne ding dahagaxa ba harua mana kinunga ing ganina.

¹⁴Baing ina naga, baladi rangrang ba, “Lasaras mati ba,

¹⁵saing ngayaha ngawa la ba te, namua na bagula hauliang ba ahatum haringina. Ne tala rangua.”

¹⁶Baing Tomas (yan tela Didimas) harua na riandi dinaxu mana Yesu ba, “Tala xauna, bu tagabu Yesu tamati.”

¹⁷Yesu sok, baing bagu ba Lasaras wa guha gobagobia xaidap luwadi luwadi masup.

¹⁸Betani wa haxek monga mana Yerusalem, bila kilomita tuwa.

¹⁹Binabu Yuda xumana dima rangua Marta Maria tang, ba ditatua atidingdi mana tang moxongodinga matianoa.

²⁰Marta lungu ba Yesu ma yu, baing ila bu gugunia, ne Maria rung mua numia.

²¹Marta harua na Yesu ba, “Toxoratamona, nabu uwa la li, bing moxongogua sanga ba mati te.

²²Maxuna mati, ning ngaxabiau, hatata xauna Urana bagula sina naung baraxing baraxinta uxusunga mana.”

²³Yesu harua na ba, “Moxongoma bagula mesa muli.”

²⁴Marta haxuya ba, “Ngaxabia ba bagula mesa muli xaung lipu matiandi xaidap subingania.”

²⁵Yesu harua na ba, “Nga mesanga muli xaung walingua. Lipu gaxarea hatum haringina manga bagula wa, heku mati.

²⁶Lipu gaxarea wa xaung hatum haringina manga bagula mati te. Uhatum haringina mana haruanga li?”

²⁷Harua na ba, “Toxoratamona, wane. Ngahatum haringina ba ung Urana Lipuxing Mogunganama, Urana Garanoa ri ma titia.”

²⁸Harua bila ba masup, baing goxoya mala saing wagi kixinginoa Maria, xap mala singia saing harua na ba, “Lipu Tubatubaingama ma ba. Xusunga maung.”

²⁹Lungu, baing mesa sap saing ila rangua.

³⁰Ne Yesu luxu mana gananga ba teguyu, wauyu longga menau Marta sok mana.

³¹Yudadi duwa rangua Maria numia bu ditatua atindi, dibagu mesa sap sok mala, binabu disu mana namua na dahagaxa ba ila guhia gobagobia ba tang la ba.

³²Maria ila sok mana longga Yesu wa mana ba, bagu, baing turu mari kinia saing harua ba, “Toxoratamona, nabu uwa la li, bing moxongogua sanga ba mati te.”

³³Yesu bagu tang xaung Yudadi dima rangua ba ditang xauna, baing gamona xai te saing hatuminganoa mauxang sibuna.

³⁴Xusungadi ba, “Ata sangganoa matabu bi?” Dahaxuya ba, “Toxoratamona, uma ubagu.”

³⁵Yesu tang.

³⁶Baing Yudadi daharua ba, “Abagu murung sibuna mana baing!”

³⁷Ning teladi daharua ba, “Xaxa lipu maxang haxatiandi maxadingdi, ne baruta sanga ba bili matiyua ba xap lipua ba te?”

³⁸Yesu hatuminganoa mauxang sibuna muli, baing ila sok guhia gobagobia. Xaxagana ginangina, saing siang sabanga rangguti xuania.

³⁹Yesu harua ba, “Aunia siangga mala.” Marta, matia hamunganoa, harua ba, “Ne Toxoratamona, bagula saminganoa doa, namua na xaidap luwadi luwadi disup.”

⁴⁰Baing Yesu harua na ba, “Ngaharua naung masup ba nabu uhatum haringina, bing bagula ubagu Urana haringinganoa. Uhalingalinga lo?”