Dyan 11:6-40

⁶Na di kaklingen fandas Lasarus funan mnè di gumnean lwe butang fa,

⁷na kafnge én, man Dyisas di dad gal mlalò kenen, “Samfulê ito di banwe Dyudiya.”

⁸Kabay man i dad gal mlalò kenen, “To Tamdò, falami ani tafan ge tnudà i batu du dad Dyu mayè mati ge, na kan ku samfulê ge ditù?”

⁹Na tmimel Dyisas, manan, “Fakay sa fa ku salu ito ditù du sfalò lwe uras i sduh, na ku magu i to di mduh, là sa tlaab, du malwa fa.

¹⁰Kabay ku di butang i kagun tlaab kenen du kifu.”

¹¹Én timel Dyisas dale, na kafnge én, manan, “Gkudang i demeito sgalak Lasarus, bay salu agu ditù ani du nukatgu.”

¹²Na man i dad mlalò kenen, “Amu, ku gkudang kenen, too fye, du takagun mgulê.”

¹³Kabay én kayean fgadè tamati Lasarus, bay i fandam dad mlalò kenen ku btal kenen kudang.

¹⁴Taman too fbangal Dyisas di dale, manan, “Tamati Lasarus,

¹⁵na too fye du là gnumahgu kenen mto du fye teenyu i mkel kadang na faglut gamu. Mdà ito nan salu di kenen.”

¹⁶Na talù Tomas, i dnagit Fingin, di dademen mlalò ku Dyisas, manan, “Ditù ito, fye ku gagin ito i kfati Amuito.”

¹⁷Di kakel ale Dyisas di Bétani lingen tafat butang nan i klo Lasarus di lam lbang.

¹⁸Na mdadong i tukay banwe Bétani di syudad Dyérusalém, nun kè tlu kilumitru i kawagan,

¹⁹taman dee dad Dyu salu di ku Marta na Méri du mlala dale mdà di kfati lagila.

²⁰Di kaklinge Marta mdadong Dyisas, lamwà kenen du snitongan, bay fanak Méri di gumnèla.

²¹Na man Marta di ku Dyisas, “Amu, ku alò ge dini di kafdas lagimi là sa moon mati.

²²Kabay gadègu balù ani, ku tan i fnim di Dwata blén ge.”

²³Na man Dyisas di kenen, “Mték lêman lagim.”

²⁴Na man Marta, “Hae, gadègu mték kenen lêman du magin kenen di kték dad to mati kadang di fulé duh.”

²⁵Na man Dyisas di kenen, “Agu sa mték i dad mati, na agu sa mlé nawa, taman balù simto to faglut di deg balù ku mati kenen, mto kenen lêman.

²⁶Na balù dad to mto fa ku faglut ale di deg nun nawala landè sen. Man, fnaglutam kè i mangu ani?”

²⁷Tmimel Marta, manan, “Hae Amu, fnaglutgu ge i Tingà Dwata, dunan Krayst i Mgalék Dwata fakangan fsalu dini di tah tanà.”

²⁸Di kafnge Marta man ani mulê kenen, na tlon flanekan Méri du stulen alò ale, manan, “Tadini i To Tamdò, na snalekan ge.”

²⁹Di kaklinge Méri dun, gasil kenen tadag na smitong ku Dyisas,

³⁰du là fa kel Dyisas di gumnè ale Méri, bay déén fa kenen di gusmitong Marta kenen.

³¹Nun dad Dyu dademe Méri di gumnean mlala kenen, na di kitela kenen gasil tadag na lamwà, mlalò ale kenen du man nawala ku salu kenen di lbang du mngel ditù.

³²Di kakel Méri di gufanak Dyisas teenan kenen, na lkuad kenen di munan, manan, “E Amu, ku alò ge dini, là moon mati i flanekgu.”

³³Di kite Dyisas mngel Méri na i dad Dyu mlalò kenen, too matdel i nawan na mlidù,

³⁴na manan, “Tanè i gulambangyu kenen?” Na tmimel ale, “Ditù ito, Amu, fye teenam.”

³⁵Na mngel Dyisas.

³⁶Taman man i dad Dyu, “Neyeyu, too bong nawan ku Lasarus.”

³⁷Kabay man i dademe, “Kenen sa i fgulê i to butè, kan ku laan gafgulê ku Lasarus du fye laan mati?”

³⁸Na lêman too matdel nawa Dyisas, na salu kenen di gulambangla ku Lasarus, dunan satu ilib, na nun batu sang di baan.

³⁹Na man Dyisas, “Nwèyu i batu én.” Kabay Marta, libun i to mati, manan, “Amu tafat butang i klon lbang, na tasasè nan i bunan.”

⁴⁰Na man Dyisas di kenen, “Làgu kè gman di ge teenam kadang i kdatah Dwata, ku faglut ge?”