SAN JUAN 11:6-40

⁶Pɛ nu'bʉ mí 'yøde xʉn ʉ ra Lázaro, him 'bex bi nde da mba, 'bɛ bi døm' man yopa guepʉ mí 'bʉhmbe.

⁷M'bɛjua bʉya bi xije dyʉ xädigähe a: ―Ga mbähä bʉ Judea mahøn'a, bi 'yɛ̨nje.

⁸Pɛ dá ɛ̨mfe bʉya: ―Xänbate i, ha gui mba bʉ mahøn'a, nguetho nu ma mijudíohʉ 'bʉpʉ him maya'bʉ gue nde di bat'a do i, dá ɛ̨mfe.

⁹Nu ra Jesús bi xije n'da ran t'uti bʉya: ―Ha hinga gue'a 'dɛ'mayo ora n'da pa. Nu'bʉ ma pa i 'yo n'da ra ją'i, hin di fet rá gua nguetho in nu hapʉ i pa.

¹⁰Pɛ nu'bʉ 'yoxui n'da, di fet rá gua nguetho hinguin nu hapʉ i pa. Nu'a bi ma gue hingana søn ra ora da du.

¹¹Nɛ m'bɛjua bi 'yɛ̨nje mahøn'a: ―Nu'a ma amigohʉ ra Lázaro i ąha. Nɛ ga mbähä ga ents'ä a, bi 'yɛ̨na.

¹²'Bex dá ɛ̨mbähe a bʉya: ―Ma Hmu ahe, nu'bʉ i ąha da yąm 'bʉ, dá ɛ̨mfe.

¹³Pɛ nu ra Jesús bi ma gue bi du 'bʉ mí ma i ąha. Pɛ dá bɛ̨mhbe gue i ątho.

¹⁴'Bexque njuąntho bi man ra Jesús: ―Ya bi du ra Lázaro.

¹⁵Pɛ nangue ahʉ, xʉn ho gue hin dá nugä 'bʉ mín hyɛ̨n'na, gue man'da gui 'yɛ̨c'yɛigahʉ 'bʉ guin nuhʉ 'bɛ'a ga øt'ä ya. Nuya ga mbähä ba nuhʉ.

¹⁶Pɛ nu'a ra Tomás nɛ i t'ɛ̨mbi ra Go, ma mixädihe, bi 'yɛ̨nje: ―Mbähmahʉ 'bʉ, madague'a 'darpʉ ga tuhʉ.

¹⁷Nu'bʉ má sømhbe bʉ ra Jesús bʉya, ya ná goho pa xí t'ä a ra Lázaro.

¹⁸Nu bʉ Betania hinga ya bʉ Jerusalén, mbɛ made ora na 'yo.

¹⁹Janangue'a xʉn ngu ma mijudíohe bi mba bʉ rá ngu ra Marta nɛ ra María gue da hyurpa yʉ́ mbʉi ʉ, nangue'a rá įda bi du.

²⁰Nu'bʉ mí 'yøh ra Marta gue ba ɛ̨pʉ ra Jesús, bi mba nɛ bin c'at'ui bʉ 'yu. Pɛ nu ra María bi gotpʉ ja rá ngu.

²¹Nɛ nu'a ra Marta bi 'yɛ̨mp'a ra Jesús: ―Ma Hmu i, nu'bʉ xquím 'bʉque ua, hin xtán du ma įda.

²²Pɛ madague'bʉ ya bi du ya, pɛ dí pącä di 'da'a Oją hønt'a go 'bɛ'a gui 'yäpi, bi 'yɛ̨na.

²³Nu a ra Jesús bi dąt'a: ―Nu'a ni įda da ndants' mahøn'a, bi 'yɛ̨na.

²⁴Nu ra Marta bi 'yɛ̨na: ―Dí pącä da ndants'a rán zɛgui ra pa a, nɛ ʉ gätho xʉn du, bi 'yɛ̨na.

²⁵Nɛ nu ra Jesús bi 'yɛ̨mp'a: ―Nugä guecä dadí un ra te ʉ xʉn du. Nu'a to'o da 'yɛ̨c'yɛigui, madague'a da du, pɛ ga japi da ndants'i nɛ din ja ra 'da'yote maząi.

²⁶Nɛ nu'a to'o 'bʉi nanguecä nɛ ɛ̨c'yɛigui, njąm'bʉ da du a. Ha guí ɛ̨c'yɛi a dí xi i, bi 'yɛ̨mbi.

²⁷Nɛ bi 'yɛ̨mp'a: ―Hąha ma Hmu i, dí ɛ̨c'yɛi gue gue'e grá Cristo, rá Ts'ʉnt'ʉ i Oją, gue'e mí hma gua ɛ̨cua ja ra ximhäi, bi 'yɛ̨na.

²⁸Nɛ nu'bʉ mí gua'a bin yąui ra Marta a ra Jesús, bi mbeng bʉ rá ngu nɛ bin yąjodreui a rá juhuɛ ra María, nɛ bi xi a: ―Bí 'bäpʉ ra xänbate nɛ in zon'na i, bi 'yɛ̨na.

²⁹Nɛ nu'bʉ mí 'yø a 'bɛ'a bi sifi, bi ndants'a nɛ bi mba n'dihi guepʉ 'bäh ra Jesús.

³⁰Nu ra Jesús him 'bex bi zøm bʉ ja ra hnini, pɛ bim 'bätho bʉ ndehnini guepʉ xín yąui ra Marta.

³¹Nu ma mijudíohe mí hupʉ mbo rá ngu ra María gue i hurpa rá mbʉi, nu'bʉ mí nu bi ndants'a ra María nɛ bi mba n'dihi, bi dɛn'dʉ ma mijudíohe bʉya, nɛ bi 'yɛ̨n ʉ: “Masque ní mba ban zom bʉ ja ran 'yägui na.”

³²Nu'bʉ mí zøm bʉ ra María bʉ bí 'bäh ra Jesús, bin dąnyahmu bʉ ja rá gua, nɛ bi 'yɛ̨mp'a: ―Nu'bʉ xquím 'bʉque ua, hin xtán du ma įda 'bʉ, bi 'yɛ̨na.

³³Nu'bʉ mín nu ra Jesús gue i zon'a ra María, nɛ ʉ ma mijudíohe zoni gue'ʉ bi dɛnni, bin gąs' pʉya nɛ bi hyundumbʉi.

³⁴Nɛ nu ra Jesús bi 'yänni: ―Hapʉ bi t'ä a ra Lázaro. Nɛ bi t'ɛ̨m bʉya: ―Ma Hmu ahe, ga mbähä gua nu, bi t'ɛ̨mbi.

³⁵Nɛ a ra Jesús bin zom bʉya.

³⁶'Bex bin 'yɛ̨m zɛhɛ ma mijudíohe bʉya: ―Nunʉ ya mfądi ɛ̨mmɛ madi huɛ̨c'a, bin 'yɛ̨mp'ʉ.

³⁷Nɛ nu'ʉ 'da bi 'yɛ̨n'ʉ: ―Nuna guehna bi xocua yʉ́ dä ra xädä. Ha hin xtán zä xtí japi hin xtán du ra Lázaro 'bʉ.

³⁸Nu'bʉ mí zøm bʉ ja ran 'yägui ra Jesús, bin gą'ts' mahøn'a. Nu ran 'yägui n'da ra hyądo a nɛ bi juaspa n'da ra xįndo.

³⁹Nɛ nu ra Jesús bi 'yɛ̨mp'ʉ: ―Dami 'uejʉ ts'ʉ na ra xįndo. Pɛ nu ra Marta, rán ju a xí du, bi 'yɛ̨mbi: ―Ma Hmu i, masque xʉn xą ya nguetho má goho ma pa ya bi du, bi 'yɛ̨na.

⁴⁰Nu ra Jesús bi 'yɛ̨mp'a: ―Pɛ dí xi i mahøn'a, nu'bʉ gui 'yɛ̨c'yɛi gue i ja ma ts'ɛdi, guin nu rá ts'ɛdi Oją nuįxte, bi 'yɛ̨mbi.