Yohana 11:6-40

⁶Eze eve imbuli kugamba Lazalo ni mnyonje, Yesu ajendeleza kwikala hantu aho endaga kwa mazuwa maidi yongezekele.

⁷Akaheza awagamba wanampina wakwe, “Chiteni vituhu Yudeya!”

⁸Wanampina wamgamba, “Mhinyi, chipindi chijihi du chijinkile Wayahudi nawaunga wakukome kwa mayuwe, weye nawe waunga wite uko vituhu?”

⁹Yesu ahitula, “Togola, saa za msi sizo mlongo na mbili? Mntu akajenda nomsi hakudaha kukowadika, kwaviya awona ulangazi we isi ino.

¹⁰Mna mntu akajenda nechilo nakowadike, kwaviya ulangazi haumuli mndani mwakwe.”

¹¹Yesu eze abinde kulonga milosi iyo, awagamba, “Mbuyangu Lazalo kagona, mna miye nanite hamwinule.”

¹²Wanampina wakwe wamgamba, “Zumbe, uneva kagona, nahone.”

¹³Yesu nakalonga kugamba Lazalo kabanika, mna wanampina wakwe nawakagamba nakalonga mwe kugona ntongo.

¹⁴Yesu niyo awagambila pwipwipwi, “Lazalo kabanika.

¹⁵Mna selelwa kwa chausa chenyu kugamba sendile uko, chani mzumile. Haluse chiteni kwakwe.”

¹⁶Tomaso, yudya akwitangwa pacha awagamba wanampina weyawe, “Chiteni naswi chikabanike hamwenga naye!”

¹⁷Yesu eze abule uko, kabwila umwili wa Lazalo wikwa mwe mbila kwa mazuwa mane.

¹⁸Ikaya ya Besaniya neihaguhi na Yelusalemu, uhale ukubula maili ntatu vino.

¹⁹Wayahudi walozize nawabula kwa Matha na Maliyamu wawahongeze kwa kubanika mlukolo ywawo.

²⁰Matha eze eve kugamba Yesu eza, niyo aita akumsingila, mna Maliyamu kasigala kukaya.

²¹Matha amgamba Yesu, “Zumbe, hegu wendile wihano, mlukolo ywangu habanike!

²²Mna simanya kugamba hata vino haluse chochose noumlombeze Chohile nakwinke.”

²³Yesu amgamba, “Mlukolo ywako nauyuke.”

²⁴Matha niyo amhitula, “Simanya,” “kugamba nauyuke mwe zuwa dya udumo.”

²⁵Yesu amgamba, “Miye nuyo uyuso na ujima. Akunizumila miye nekale, hata hegu kabanika,

²⁶naho chila akwikala na kunizumila habanike mazuwa yose, Togola wayazumila ayo?”

²⁷Matha amgamba, “Heye Zumbe!” Ahitula “Nazumila kugamba weye nuyo Kulisito, Mwana ywa Chohile, yudya akwiza mwe isi.”

²⁸Matha eze alonge ayo, niyo aita akumwitanga lumbudye Maliyamu kwa chinyele, na kumgamba, “Mhinyi ehano,” “naho akwitanga.”

²⁹Maliyamu eze eve ivyo, niyo asunguza kwinuka ambasa Yesu.

³⁰Yesu nahanati kwingila mwe kaya, mna nachei ahadya hantu Matha ambwile.

³¹Wayahudi nawemndani hamwenga na Maliyamu wakamhongeza, weze wamwone kenuka akumpukila kuse. Wamtimila wakagamba akwila kwe mbila.

³²Maliyamu eze abule hantu hadya Yesu endile, eze amwone, amgwela heviga. Amgamba, “Zumbe,” “hegu wandile wihano, mlukolo ywangu habanike!”

³³Yesu eze amwone aila, naho eze awawone wadya Wayahudi wendile hamwenga naye nawo waila, niyo engilwa ni mbazi na chinyulu, niyo engilwa ni tumbwaziko mo moyo.

³⁴Niyo awauza. “Mumhamba hahi?” Wamgamba. “Soo uwone, Zumbe,”

³⁵Yesu niyo aila.

³⁶Wayahudi wagamba. “Kaulani ivyo amungile!”

³⁷Mna wantu watuhu wagamba, “Togola yuno amfumbule ameso yudya tuntu, vino hakudaha Kumtenda Lazalo asekubanika?”

³⁸Ivyo Yesu engilwa ni tumbwaziko vituhu mo moyo, abula kwe mbila, mbila yenye neimwe bome naho naigubikwa na yuwe mwe nchili.

³⁹Yesu agamba. “Usani idiyuwe!” Matha, lumbudye dya yudya abanike, amgamba, “Zumbe, akonga kulavya mpofa, kekala mwe mbila mazuwa mane!”

⁴⁰Yesu amgamba, “Togola sikugambile kugamba ukazumila nauwone ukulu wa Chohile?”