Ioanes 11:6-40

⁶A lao kotin mangier, me a somaudar, i ari kotikoteta wasa o pong ria pong.

⁷Ap kotin masani ong sapwilim a tounpadak kan: Kitail pan purelang Iudäa.

⁸Sapwilim a tounpadak kan potoan ong i: Rapi, Sus oko apton men kasuk ir, a re pan kotin purelang ia?

⁹Iesus kotin masani: So auer eisokriau ni ran eu? Meamen alialu ni ran, sota pan dipikelekel, aki a ngingar marain en sappa.

¹⁰A meamen alialu ni pong, a pan dipikelekel, aki marain sota mi re a.

¹¹A kotin kasoiada mepukat, ap masani ong irail: Kompoke patail Lasarus mairelar, a I kokolan kapirida i.

¹²A sapwilim a tounpadak kan indang i: Maing, ma a mairelar, a pan maureda.

¹³Ari, Iesus kotin masanieda duen a melar, a irail kiki ong, me a masanieda duen a mair en kamol.

¹⁴Iesus ap sansal masani ong irail: Lasarus melar,

¹⁵A I peren kida, me I sota mi wasa o pweki komail, pwe komail en posonla. Ari, kitail en koko wei re a!

¹⁶Tomas, me pil ad a Didimus, ap indai ong warok tei kan: Kitail en pil kokola, pwen iang i mela.

¹⁷Iesus lao kotido, ap kotin diarada, me a mi nan sousou pong pa pong.

¹⁸Petanien me koren iong Ierusalem impan mail riau.

¹⁹A Sus oko me toto ko dong Marta o Maria, pwen kamait ira la pweki ri ara ol o.

²⁰Marta lao rongadar, me Iesus kotido, ap koieila tu ong i. A Maria momod nan im o.

²¹Marta ap potoan ong Iesus: Maing, ma re kotikot met, ri ai ol sota pan mela.

²²Ari so, i asa meakot re pan kotin poeki ren Kot, Kot pan kotiki ong ir.

²³Iesus kotin masani ong i: Ri om ol pan maureda.

²⁴Marta potoan ong i: I asa, me a pan maureda ni ias en ni ran nik o.

²⁵Iesus kotin masani ong i: Ngai kamaur o maur, me poson ia, pan memaureta pil murin a mela.

²⁶A meamen me maur o poson ia, sota pan mela kokolata; koe kamelele mepukat?

²⁷A potoan ong i: Ei Maing, i poson, me ir me Kristus Sapwilim en Kot, me udan pwara dong sappa.

²⁸A lao indada met, ap koieila ren Maria ri a li, monginki ong i: Saunpadak kotidor kainoma uk.

²⁹A lao rongadar, ap uda, madang wei re a,

³⁰A Iesus saikenta lel ong kanim o, pwe a kotikoteta wasa Marta tu ong i ia.

³¹Sus oko, me mi re a nan im o, pwen kamait i ala, lao kilangada, me Maria madang uda tang wei, rap idauenla i, indinda: A pan ko ong ni sousou, pwen sangesang ia.

³²Maria lao lel wasa o, o kilang i, ap poridi ong ni aluwilu a indang i: Maing, ma re kotikot met, ri ai ol sota pan mela.

³³Iesus lao masani i sangesang, o Sus oko, me iang i kokodo pil sangesang, ap kupurola,

³⁴Masani: Komail pwilikidi ia i? Irail potoan ong i: Maing, kotido masani.

³⁵Iesus kotin tontonir.

³⁶Sus oko ap inda: Kilang duen a pok ong i!

³⁷A akai ir me indada: A so kak pan men et me kapad pasang mas en me maskun o, me ol men et ender mela?

³⁸Iesus pil kupurola koti dong sousou o. A por o ulong nan kisin dol o takai eu mi poa.

³⁹Iesus kotin masani: Katapure wei takai en! A Marta, en me melar ri a li, indada: Maing, a matalar, pwe a mi met pong pa pong.

⁴⁰Iesus kotin masani ong i: I so indai ong uk, ma koe poson, koe pan kilangada lingan en Kot.