1Betania haeo ŋic moc juwec ʒâŋene Lazaro, e huc bame fowec. Maria â Mata jahe hahac qozi hae irecteaŋ.
2Maria eki hâcne Wofuŋ opâ âsu biaŋ ruacnerâ qizec susuc‐ticnezi kikene bâkereŋkewec. Ɋaticne Lazaro hâcne huc fowec.
3Eme jahe hahac qozi Jesurao dâŋ kecʒiŋuc muhuc râepire rawec: “Wofuŋ go manac, âgoge huc fokac.”
4Eme Jesuzi biŋe manarâ ʒiŋuc muwec: “Huc irec fârine hâmoc fuaocte mâcne, Anuture mumuteŋ fuaocte mukicne. Anutu Ŋokâ‐ticne ere sambâŋ qâreŋ fua taniŋkeocte hâcne.”
5Mata â qoticne â Lazaro jaŋere Jesuzi ecnewec.
6Eme hucte biŋe manarâ juweckoa gie bapa jajahec mocwâc juwec.
7Iŋuc jurâ motecfâcne ʒiŋuc jazawec: “Warepie Judaia mâreŋko risie ranaŋ.”
8Mume motecfâcne jaŋe ʒiŋuc âzâcnembiŋ: “Qaqazu, Judaŋic jaŋe juc bânic moc ira qânâzi hecguzo mumbiŋ, eme ʒi wemocte jaŋerao mocwâc risiezo mukic?”
9Mupie Jesuzi ʒiŋuc jazawec: “Gie bapa dameŋ aua 12 fokac i! Moc e ʒoaŋko hata rahame wiac moczi he âkec mi ecneocmu, e tatamacko wiac sâcne honeocmu.
10Moc e ŋafeo tatamac basahuc hata rahame ine he âkec ecneocmu.”
11Iŋuc murâ dâŋ moc ʒiŋuc ʒuhuckewec: “Âgo‐nâŋec Lazaro guŋ fokac, eme no rarâ wiwickepemu.”
12Eme motec jaŋe ʒiŋuc mumbiŋ: “Wofuŋ, guŋ fohuc biaŋkeocmu.”
13Jesu e hâmocte dâŋ suŋsuŋne mume jaŋe guŋ jâmbâŋte mukac muhuc mi mana‐hâmombiŋ.
14Irec Jesuzi muɋaɋackerâ jazawec, “Lazaro hâmojec.
15No ira mi ra juhape hâmojecte ŋoŋere erâ bunane biaŋkekac, ŋoŋe mamanasiŋ fârihec eniŋte wiac i fuajec. Ʒi ine erao ranaŋ.”
16Eme Toma, ʒâŋene moc Didimo, eki motec âgofâcne ʒiŋuc jazawec: “Nâŋâc mâmâc rarâ ehec hâmonʒepeneŋ.”
17Lazaro ʒâŋeruŋko fohame ʒoaŋ gie bapa jahec â jahec ehame Jesu ra fisiwec.
18Betania hae i Jerusalem hae irec raʒimicne bembeŋko ŋewecte
19irecnec Judaŋic bocjahazi Mata â Maria ɋajekic hâmowecte soŋgâŋ fâsâc honec‐jofazo rambiŋ.
20Eme Mata e Jesu fisikac mupie manarâ Maria ficko ŋehame ra hatao bâfuawec.
21Bâfuarâ ʒiŋuc âzâcnewec: “Wofuŋ, go ʒira jutec muzac ɋanane mi hâmozac.
22Erâ ʒiŋuczia gore wâc manakopac, wiac irec me irec Anutu numucnetec mana‐gareocmu.”
23Eme Jesuzi ʒiŋuc âzâcnewec: “Ɋage ɋârerâ fahareocmu.”
24Mume Matazi ʒiŋuc muwec: “Juku dameŋ sâkoo ɋârerâ fahareocmu i manakopac.”
25Eme Jesuzi ʒiŋuc âzâcnewec: “Ɋâɋâre â juju rune no, irec moc e no manasiŋnuocmuzi hâmo‐bipierâ juocmu,
26â moc e ɋâricne juhuc manasiŋnuocmuzi hâhâmo tâmiric juraʒihuc juocmu sanaŋ. Go dâŋ i mana ʒakiekomec?”
27Eme Matazi muwec: “Go Kristo Anuture Ŋokâzi mâreŋko wahaocte mukicne hâcne, i maŋnanezi mana ʒakiekopac.”
28Dâŋ iŋuc murâ qoticne Maria wiracnerâ saŋucko ʒiŋuc âzâcnewec: “Qaqazu warejec gore mukac.”
29Eme Mariazi manarâ izia faharerâ Jesurao rawec.
30Jesu e hae upeo Mata dâŋ âzâcneweckoa domawec.
31Eme Maria e biac faharerâ rame Judaŋic soŋgâŋte ficticnao ŋembiŋ jaŋe ʒâŋeruŋko kioocte rakac muhuc bâjâpembiŋ.
32Eme Maria e hae upeo hurâ Jesu honerâ kikefuŋnao fodaperâ ʒiŋuc âzâcnewec: “Wofuŋ, go ʒira jutec muzac ɋanane mi hâmozac.”
33Iŋuc murâ kiome Judaŋic bâjâpembiŋ jaŋe e bafickerâ mâmâc kiombiŋ. Kiopie Jesuzi honec‐joparâ mana hâtâwehuc gâgâmârâwec.
34Iŋuc erâ wio‐jarewec, “Wena duckembieŋ?” Eme jaŋe mumbiŋ, “Wofuŋ ware honec.”
35Eme Jesu ʒâŋene ruruame ʒâŋeucne wahawec.
36Eme Judaŋic jaŋe honerâ mumbiŋ, “Honeniŋ, maŋne ere mo iŋucne domawec.”
37Â gâcnezi mumbiŋ, “Tiŋtuŋ moc ʒâŋene bâtâcneweczi ŋic kecʒi sâcne mi bâpiaŋkeme ɋiɋic qazac me?”
38Eme Jesuzi bune mocwâc hâhâtâwehame ʒâŋeruŋko ra fisiwec. Qâŋɋâŋ e qânâ hawecko fowec, motâcne qânâ kâcɋenezi âke bâzickekicne.
39Irec Jesuzi ʒiŋuc muwec: “Qânâ bârârieniŋ.” Mume hâmocnere hahac Mata eki muwec: “Wofuŋ, ʒoaŋ gie bapa jahec â jahec fowecte âsu fikac.”
40Mume Jesuzi ʒiŋuc âzâcnewec: “Dâŋ gazape mi manamec, go manasiŋnutec Anutu tâpiri‐ticnere qâreŋ fuame honecmu.”
41Eme qânâ bârâriepie Jesuzi faic fime fehame ʒiŋuc numuwec: “Mamac, go nunumu‐nane manamecte daŋge gazakopac.
42Go nunumu‐nane dameŋ sâc manaekic i manakopac. No mâc ŋic ʒi doma raŋgopieŋ jaŋe goki sorecnutec wahapo i maŋjeŋiczi mana ʒakieniŋte dâŋ iŋuc gazakopac.”
43Iŋuc murâ hahaŋne bahuc wirawec, “Lazaro go wahac.”
44Mume hâmokicnezi wahawec. Me kikene qoruczi qâfisekicne â ʒâŋe maine qoruczi foŋkekicne, irec Jesuzi ʒiŋuc jazawec: “Qoruc goroŋkepie raoc.”
45Judaŋic Mariarao fisimbiŋ jaŋeraonec bocjahazi Jesu wiac eme honerâ e manasiŋkembiŋ.
46Gâcnezi ine farisaio ŋic jaŋerao rarâ Jesuzi wiac ewec irec dâŋ binaŋ ejarembiŋ.
47Eme taha bapa micne â farisaio ŋic jaŋe dâŋ i manarâ micne bapa hefârec‐joparâ ʒiŋuc mumbiŋ: “Ŋic e mâsi bocjaha bakacte wenac enaŋ?
48Nâŋâc qâoma ecnehuc juhapene ŋic jaŋe erao qohota‐fârepie Romaŋic jaŋe râsi enârerâ mâreŋ â ŋic nâwoc rofâreniŋmu.”
49Eme jaŋere âgo moc, ʒâŋene Kaifa, jara dameŋ ira taha bapa sâko juwec, eki ʒiŋuc muwec: “Ŋoŋe maŋ mamanasu tâmiric juŋgopieŋ,
50erâ ʒiŋuc wâc mi manaŋgopieŋ: Ŋicguru nâŋâc sipiricke‐fârenʒipeŋte mocjahazi âkehoc‐nâpohuc hâmome izi ŋoŋe wâc bafic‐ŋopaocmu.”
51Dâŋ i maŋticnere mi muwec, e jara dameŋ ira taha bapa sâko juwecte fiŋdaŋdâŋ muwec. Jesu e jâmbomac ŋic jaŋere erâ hâmoocte mucnekicne,
52erâ Judaŋic jaŋere sawa mâcne, Anuture naru motecfâc mâreŋ sâc juraŋgopieŋ jaŋe mâmâc bâtumaŋ‐jopame guru mocjaha erâ juniŋte iŋuc mucnekicne.
53Eme micne bapa jaŋe ʒoaŋ gie bapa ira hâcne Jesu qaniŋte dâŋgie fuŋkembiŋ.
54Irec Jesu e Judaŋic jaŋerao mocwâc mi fua tâcnerâ juwec, e mâreŋ burocne irec mecqaŋeŋao hae moc ŋewec, Eferaim, ira motecfâcne rocjopame ra jumbiŋ.
55Eme Judaŋic aakic hombaŋ‐jeŋic bembeŋkehame hae pitickonec ŋic bocjahazi bahac wâwânâŋ gie‐jeŋic baniŋte biac bânierâ Jerusalem haeo rambiŋ.
56Eme taha ufuŋko Jesu basarâ ʒiŋuc muhuc nazaŋ gazaŋ embiŋ: “Ŋoŋe weniŋuc muŋgopieŋ, e hombaŋte wareocmu me mâcne?”
57Taha bapa micne â farisaio ŋic jaŋe ine mumupaŋ dâŋ ʒiŋuc mumbiŋ: “Moc e ŋeŋe juju‐ticne honerâ ware mufua‐nâreme kâpâcwâru banʒepeneŋ.”
