John 11:6-40

⁶Tusruktu ke el lohng lah Lazarus el mas, el mutana yen el muta we ke len luo pac.

⁷Toko el fahk nu sin mwet tumal lutlut, “Kut folokla nu Judea.”

⁸A mwet tumal lutlut elos fahk, “Mwet Luti, in pacl na fototo se somla, mwet in acn we tuh srike in tungal kom. Ya kom nunku kom in folok nu we?”

⁹Jesus el topuk, “Ya tia oasr ao singoul luo ke len se? Ke ma inge kutena mwet su fahsr ke len el ac tia tukulkul, mweyen el liye kalem lun faclu.

¹⁰A el fin fahsr ke fong el tukulkul, mweyen wangin kalem yorol.”

¹¹Jesus el fahk ma inge na el sifil fahk, “Lazarus, kawuk lasr, el motulla, tusruktu nga ac som okasulak.”

¹²Mwet tumal lutlut elos topuk ac fahk, “Leum, el fin motul, el ac kwela.”

¹³Kalmen ma Jesus el fahk uh pa Lazarus el misa, a elos nunku mu el kaskas ke motul in mongla.

¹⁴Ke ma inge Jesus el fahkang nu selos ke kas na kalem, “Lazarus el misa,

¹⁵tusruktu ke sripowos nga wokin lah nga wangin yorol, tuh kowos fah lulalfongi. Kut som nu yorol.”

¹⁶Thomas (su pangpang Fak) el fahk nu sin mwet lutlut wial, “Fahsru, kut nukewa welul som, tuh kut in wi pacna Mwet Luti misa!”

¹⁷Ke Jesus el sun acn we, el lohngak lah Lazarus el pukpuki len akosr lac tari.

¹⁸Tia sun mael luo Bethany nu Jerusalem,

¹⁹ac mwet puspis tuku liki acn Judea in akpwaryal Martha ac Mary ke misa lun mukul se wialtal inge.

²⁰Ke Martha el lohngak lah Jesus el tuku, el illa som in osun nu sel, a Mary el mutana in lohm ah.

²¹Martha el fahk nu sel Jesus, “Leum, kom funu oasr inge, mukul se wiuk inge lukun tia misa!

²²Tusruktu finne inge pacna, nga etu lah God El ac sot nu sum kutena ma kom siyuk sel.”

²³Jesus el fahk nu sel, “Ma wiom el ac sifil moulyak.”

²⁴Martha el topuk, “Nga etu lah el ac sifil moulyak ke len safla.”

²⁵Jesus el fahk nu sel, “Nga pa akmoulyauk mwet uh liki misa nu ke moul. Kutena mwet su lulalfongi in nga fah moul, el finne misa.

²⁶Ac kutena mwet su moul ac lulalfongiyu fah tiana misa. Ya kom lulalfongi ma se inge?”

²⁷Martha el topuk, “Aok, Leum! Nga lulalfongi lah kom pa Christ, Wen nutin God, el su God El wulela kac mu ac tuku nu faclu.”

²⁸Tukun Martha el fahk ma inge, el folokla ac mahma nu sel Mary, tamtael lal, ac fahk, “Mwet Luti el oasr inge, ac el siyuk kom.”

²⁹Ke Mary el lohng, el tuyak ac sulaklak som in osun nu sel. (

³⁰Jesus el soenna tuku nu yen mwet uh walil we, a el srakna oasr yen se Martha el sonol we ah.)

³¹Mwet ma muta lohm ah yorol Mary in akpwaryal, ke elos liye lah el tuyak ac sulaklak tufoki som, elos ukwalla mweyen elos nunku mu el ac som in tung ke kulyuk ah.

³²Mary el tuku nu yen Jesus el muta we, na ke el liyalak Jesus, el putati nu ke nial ac fahk, “Leum, kom funu muta inge, mukul se wiuk inge lukun tia misa!”

³³Jesus el liye lah el tung, oayapa mwet ma welul elos wi pac tung, na insial arulana asor ac el liksreni na oela.

³⁴El siyuk selos, “Kowos piknilya oya?” Elos topuk, “Leum, fahsru liye.”

³⁵Jesus el tung.

³⁶Ac mwet uh fahk, “Liye lupan nunak lal kacl!”

³⁷A kutu selos fahk, “El tuh sang liyaten nu sin mwet kun sac, na efu ku elan kofla in oru tuh Lazarus elan tia misa?”

³⁸Jesus el srakna asor yohk, na el som nu ke kulyuk ah, sie luf oan pe eol ah ac eot se itukyang kosrala mutun luf sac.

³⁹Jesus el fahk, “Eisla eot sacn!” Martha, su ma wien mas sac, el fahk, “Leum, ac arulana koluk fohlo, mweyen el pukpuki len akosr lac!”

⁴⁰Jesus el fahk nu sel, “Mea, nga tia fahk nu sum tari lah kom fin lulalfongi kom ac liye wolana lun God?”