San Juan 11:6-40

⁶Ijkuak okilijkeh Lázaro omokokoaya, Ye ok omoka ome tonati kan okatka.

⁷Otlanki Jesús okinmili itlamachtijkawah: —Matimokopakah Judea.

⁸Ijkuakó itlamachtijkawah okilijkeh: —Tlamachti, ayamó wejkawa n tlayakankeh judíojteh okinekiah mitsmiktiskeh ika tetl; ¿iwa oksepa tikneki timuikas ompa?

⁹Jesús okinmili: —Se tonati kipia májtlaktli iwa ome ora. Tla se tlakatl nemis ijkuak tlanestok amo moikxitlanwis, porke kita n tláwili non kajki itech nin tlaltíkpaktli,

¹⁰pero tla se tlakatl nemi de yuak, moikxitlanwia porke n tláwili amo kajki itech.

¹¹Satepa Jesús okinmili: —Totlasoj Lázaro kochtok, iwa Ne nio nikijxititi.

¹²Ijkuakó itlamachtijkawah okilijkeh: —Tejwatsi, tla san kochtok, pajtis.

¹³Pero Jesús okinekia kimilis Lázaro yomikki, pero itlamachtijkawah okiyejyekoliayah chamo okintlapowijtoka de n kochílistli non tinochteh tikpiah.

¹⁴Ijkuakó Jesús okinyekili: —Lázaro yomikki.

¹⁵Iwa nipaki porke amo ompa onikatka, ijkó nomejwah nontlaneltokaskeh. Tiawih, matikitatih.

¹⁶Ijkuakó Tomás non okiliayah Kuatsi, okinmili non oksikimeh itlamachtijkawah: —Matiwiah tejwah noiwa, para timikiskeh iwan Jesús.

¹⁷Ijkuak Jesús okalakito Betania, Lázaro yokiwikaya nawi tonati tooktok.

¹⁸Betania amo wejka omokawaya de Jerusalén, san kanaj eyi kilómetro.

¹⁹Miakeh judíojteh owalajkeh otetlajpaloko ichan Marta iwa n María para kinyolchikawaskeh porke omikki inmikni.

²⁰Ijkuak Marta okima Jesús yompa owalaya, okinamikito, pero María omoka itech kali.

²¹Iwa Marta okili n Jesús: —Noteko, tla nika tiyetoskia, nokni amo mikiskia.

²²Pero ne nikmati Dios mitsmakas nochi tlan Te tiktlajtlanilis.

²³Jesús okili: —Mokni moyolitis.

²⁴Marta okili: —Milák, ne nikmati moyolitis ijkuak non yomikeh moyolitiskeh itech n iksemi tonati.

²⁵Ijkuakó Jesús okili: —Ne niktemaka nemílistli iwa yolílistli. Akin nechneltokas maya mamiki, yolitos nochipa.

²⁶Iwa nochteh akimeh yolitokeh iwa nechneltokah ayik mikiskeh. ¿Tikneltoka?

²⁷Marta okili: —Ejé, Noteko, ne nikneltoka Tejwatsi Ti Cristo Ikone Dios, Akin walaskia itech nin tlaltíkpaktli.

²⁸Ijkuak ijkí okijto, Marta oyá san ichtakatsi okinotsato ikni María iwa okili: —N Tlamachti nika moitstika iwa mitsnotsa.

²⁹Ijkuak María okikak tlan Marta okili, omoketíkiski iwa okitato n Jesús.

³⁰Jesús ayamó okalakia kan altepetl, ok okatka kan Marta okajsito.

³¹Ijkuak n tlayakankeh judíojteh non okatkah itech kali okitakeh kenijki n María omoketíkiski, okikuitlapantokakeh. Okiyejyekoliayah chamo oyaya kichokiliti n Lázaro kan okitookakeh.

³²Ijkuak María okalakito kan okatka n Jesús, omotlankuáketski inawak iwa okili: —Noteko, tla nika tiyetoskia, nokni amo mikiskia.

³³Ijkuak Jesús okitak n María chokatok, iwa n judíojteh non okikuitlapantokayah noiwa, Jesús oyoltélinki asta oyolpatsiwik.

³⁴Iwa okintlajtlani: —¿Kani ononkitookakeh? Yejwah okilijkeh: —Tejwatsi, nika xiwalmuika iwa xikitaki.

³⁵Iwa Jesús ochokak.

³⁶N tlayakankeh judíojteh okijtojkeh: —¡Xikitakah, milák okitlasojtlaya!

³⁷Pero oksikimeh okijtojkeh: —Tla owéletki okimák itlachialis non amo otlachiaya, ¿amo weletiskia kichiwaskia itla para amo mamiki n Lázaro?

³⁸Jesús oksepa omoyolkoko iwa omijkuani kan okitookakeh n Lázaro. Non miketékochtli okatka ijtik se kúyoktli iwa otentsaktoka ika se tetl.

³⁹Jesús okinmili: —Xikachiwakah n tetl. Marta, iwelti n Lázaro, okili n Jesús: —Noteko, ye ya fiero kistos porke ya kipia nawi tonati tooktok.

⁴⁰Pero Jesús okili: —Yonimitsili, tla titlaneltokas tikitas iweyijkachiwalis Dios.