Yohana 11:6-40

⁶Viyabokele usenga uno kamba Lazalo kakala mtamu, Yesu kongeza siku mbili kukala aho haakalile.

⁷Abaho Yesu kawalongela wanahina zake, “Tubweleni Yudea.”

⁸Wanahina wamwidika, “Mfundiza, sambi sambi Wayahudi wa aho walonda kukutowa mabwe, abaho kofunga mwanza ubwele kuko?”

⁹Yesu kalonga, “Vino imisi yaduhu masaa longo na mabili? Avo wanhu wogenda imisi hawaikwala, kwavija wowona mulenge wa mwiisi ino.

¹⁰Lakini kamba wahagenda ikilo woikwala kwavija waduhu mulenge.”

¹¹Yesu viyamambukize kulonga avo, kalonga, “Mbwigaetu Lazalo kawasa, lakini nochola kumulamusa.”

¹²Wanahina wamwidika, “Mndewa, kamba kawasa kohona.”

¹³Yesu kakala yofambula kamba Lazalo kafa, lakini wanahina zake wagesa kakala yolonga kuwasa utulo.

¹⁴Avo Yesu kawalongela fulu ipile, “Lazalo kafa,

¹⁵lakini nodeng'helela mbuli yenu kwavija sikalile nayo muladi mutogole. Leka tucholeni kumwake.”

¹⁶Tomaso yakemigwe Pacha kawalongela wanahina wayage, “Tucholeni hiko hamoja na Mfundiza, tukafe nayo!”

¹⁷Yesu viyavikile ako, kaluvika lukuli lwa Lazalo lwa mdipanga siku nne.

¹⁸Betania ikala utali wa kamba kilometa ndatu kulawa Yelusalemu,

¹⁹Wayahudi wengi weza kuwalola Mata na Malia na kuwagoga makono mbuli ya ifa ya lumbu jao.

²⁰Mata viyahulike kamba Yesu kakala yokwiza, kalawa kunze kumbokela, lakini Malia kasigala mng'anda.

²¹Mata kamulongela Yesu, “Mndewa, maza ukalile baha lumbu jangu sambi yafe bule!

²²Lakini hata sambi nojuwa kamba Mulungu kokugwaa kinhu chochose kiumpula.”

²³Yesu kamulongela, “Lumbu jako kozilibuka.”

²⁴Mata kedika, “Nojuwa kamba kozilibuka mna isiku ya uhelelo.”

²⁵Yesu kamulongela, “Niye ayo uzilibuko na ugima. Wanhu wose wonhogola wokuwa wagima, hata wahafa,

²⁶na wanhu wose weli wagima na wonhogola niye honda wafe bule. Kozitogola mbuli zino?”

²⁷Mata kedika, “Ona Mndewa, notogola kamba gweye ayo Kilisito Mkombola, Mwana wa Mulungu ija yezile mwiisi.”

²⁸Mata viyalongile avo, kabweleganya mng'anda, kamkema mkulu wake Malia kinyelegezi. Kamulongela, “Mfundiza kabaha, kokukema gweye.”

²⁹Malia viyahulike avo, kenuka himahima kamcholela Yesu.

³⁰Yesu kakala yang'hali hanavika mkijiji, lakini kakala hanhu aho haamting'hane Mata.

³¹Avo, Wayahudi wakalile mng'anda na Malia womgoga makono, wamkweleleza viwamone kenuka himahima na kuchola kunze. Wagesa kochola kudipanga kulila.

³²Malia kavika aho haakalile Yesu, bahaja viyamone, kamfugamila, kalonga, “Mndewa, maza ukalile baha, lumbu jangu sambi yafe bule!”

³³Yesu viyamone Malia kolila, na Wayahudi wakalile nayo wolila vivija, kona usungu na kanyunyuwala muumoyo.

³⁴Yesu kawauza, “Mumzikila kwahi?” Wamwidika, “Mndewa izo ulole.”

³⁵Yesu kalila.

³⁶Wayahudi walonga, “Loleni viyamnogele Lazalo.”

³⁷Lakini wanhu wayagwe walonga, “Kamuhonya munhu msuwameso, hadahile vilihi kumtenda Lazalo sekeyafe?”

³⁸Yesu viyakalile yang'hali konyunyuwala muumoyo, kachola kudipanga, dikalile mhango igubikigwe na dibwe.

³⁹Yesu kawalagiza, “Segezeni idibwe!” Mata, lumbu wa munhu ija yafile, kedika, “Mndewa, kwiza honung'ha bundo, kwavija kana siku nne toka yazikigwe!”

⁴⁰Yesu kamulongela, “Vino sikulongele bule wahatogola kouwona ukulu wa Mulungu?”