San Juan 11:6-40

⁶per chi gudixteedeb lony dec racxú Lázaro, laany gucldaarulny stiop dxi rut zuguaany.

⁷Chiyru raipny de xpɨnny: —Gultoo nez Judea stuby.

⁸Chiy raipy de xpɨnny laany: —Maistrɨ, niclɨ gady gac xchi ni rcaaz de bniety Israel ni rbez nezqui niguinxú laabiu cun guia. Ne anre, ¿xínii rcaazbiu chiabiu nezqui stuby?

⁹Ax raipy Jesús laadeb: —Laat nántɨ dec tsɨbtiop hor rac tuby dxi. Ne belati rdxi icandzá bniety quɨtti riezgu ldapbɨ pur ni rguiaab nuu ni rzieeny lo guɨchliuré.

¹⁰Per belati guxin icandzá bniety nuu riezgu ldapbɨ pur ni runlieedxbɨ bieenqui.

¹¹Ziyza raipy Jesús laadeb: —A xmigunɨ Lázaro anayaaisy. Per anre chacuaaniab.

¹²Chiy raipy de xpɨnny laany: —Dad, belati araaisbɨ niy zelo dec ziacquɨb.

¹³Per ni gunii Jesús zelo dec aguty Lázaro, ne de xpɨnny ax rlilodeb dec laany rniiny raaissib.

¹⁴Chiyru gudixteldí Jesús lodeb raipny laadeb: —Aguty Lázaro.

¹⁵Per güenquɨ quɨt guzuguaatia ruy te pur par laat güenru ziy par chaldilaaztɨ nare. Anre gultoo choguiaanbɨ.

¹⁶Chiy Mally ni raipdeb “Cuach”, raipbɨ iraru de xpɨny Jesús: —Gultoo chonénny, te rut gatyny gatyzacnɨ.

¹⁷Chi bdzɨny Jesús Betania rut ná ladx Lázaro, agac guc tap dxi ni bgaatsbɨ.

¹⁸Ne Betaniaqui gaxzi ríian guɨdxqui par Jerusalén, zeczi chon kilómetro.

¹⁹Ax zieny de bniety Israel güetixlodeb Mart cun María par quɨt ibinlaazdeb pur ni guty bzaandeb.

²⁰Chi gucbee Mart dec azeddzɨngax Jesús ax bdiiab par güechalobny. Per María biianacbɨ lizdeb.

²¹Chiy raipy Mart Jesús: —Dad, belrulati zuguaabiu rurén, quɨt niaitti bzaana.

²²Per nare nánna dec Dios snɨɨdxny laabiu irate ni inaabbiu lony.

²³Ax raipy Jesús laab: —Teru ibíi ibány bzaanu.

²⁴Chiy raipy Mart laany: —Guldícbiu, nare nánna dec sbíi ibánybɨ chi ibány irate de bɨnguty, dxi ni gún Dios guelgurtisy xtenny.

²⁵Chiyru raipy Jesús laab: —Nare naa ni rsbány de bɨnguty, ne ni rguaad guelnabány bniety. Elquɨ ni chaldilaaz nare, masquɨ gatybɨ, per zapbɨ guelnabány nez lo Dios.

²⁶Ne irate de ni zeczi nabány belati reldilaazdeb naa, zapzadeb guelnabány nez lo Dios. ¿Ta reldilaazu ni caniia liú?

²⁷Mart ax cuaibbɨ: —Reldilaazla, Dad. Nare reldilaaza dec laabiuy Crist, Lliin Dios, ni ná par gueed lo guɨchliuré.

²⁸Chi gulull gunii Mart ziy, ax güetɨdxbɨ beldbɨ María, raipbɨ laab dxiga: —A Maistrɨ abdzɨny ne cabɨdxny liú.

²⁹Cuantpac bindiag María ziy, gueeldguilliú güesúb par zechalob Jesús.

³⁰Ne Jesús zeczi gady yiiutiny láani guɨdxqui. Zeczi zuguaany rut güechalo Mart laany.

³¹Chiy de bniety Israel ni zuguané María par quɨt cuenzi ibinlaazbɨ, chi gunádeb gueeldguilliú zé María ax güenalddeb laab. Rlilodeb dec ruu xpaa Lázaro zeguunbɨ.

³²Chi bdzɨny María rut zuguaa Jesús, ax guzullibbɨ lony guniigab: —Dad, belrulati zuguaabiu rurén, quɨt niaitti bzaana.

³³Chi guná Jesús ruun María cunru de bniety Israel ni zednéb, zecpaczaxnarul guzacny, quesentiand nalas bziienny

³⁴ax gunabdiidxny laadeb: —Calí bcuaatstɨb. Laadeb guniideb: —Edaguiaabiu, caniábiu Dad.

³⁵Jesús biinny.

³⁶Chiy gunii de bɨny Israel: —Gulguiaa caniát quesentiand bcaazny laab.

³⁷Per nuudeb guniideb: —Bnietquɨy bsiac bslo tuby ciagu. Anre, ¿ladxa quɨt xi nialee niunbɨ par quɨt niaitti Lázaro?

³⁸Jesús quesentiand nalas bziienny chi gubiiny ruu baaqui. Ne tuby cuevɨy blliú de baa ax bdxii tuby guia ruuni.

³⁹Chiy raipy Jesús laadeb: —Guldzɨcá guiac. Per Mart, bzaan togulqui, guniib: —Dad, ¿ta gati arldiadxabbɨ pur ni aguc tap dxi ni gutybɨ?

⁴⁰Jesús cuaibny: —¿Ta gati guniia liú dec belati reldilaazu, snioo guelrnabee xte Dios?