Ioanej 11:6-40

⁶A lao kotin manier, me a jomaudar, i ari kotikoteta waja o pon ria pon.

⁷Ap kotin majani on japwilim a tounpadak kan: Kitail pan purelan Iudäa.

⁸Japwilim a tounpadak kan potoan on i: Rapi, Juj oko apton men kajuk ir, a re pan kotin purelan ia?

⁹Iejuj kotin majani: Jo auer eijokriau ni ran eu? Meamen alialu ni ran, jota pan dipikelekel, aki a ninar marain en jappa.

¹⁰A meamen alialu ni pon, a pan dipikelekel, aki marain jota mi re a.

¹¹A kotin kajoiada mepukat, ap majani on irail: Kompoke patail Lajaruj mairelar, a I kokolan kapirida i.

¹²A japwilim a tounpadak kan indan i: Main, ma a mairelar, a pan maureda.

¹³Ari, Iejuj kotin majanieda duen a melar, a irail kiki on, me a majanieda duen a mair en kamol.

¹⁴Iejuj ap janjal majani on irail: Lajaruj melar,

¹⁵A I peren kida, me I jota mi waja o pweki komail, pwe komail en pojonla. Ari, kitail en koko wei re a!

¹⁶Tomaj, me pil ad a Didimuj, ap indai on warok tei kan: Kitail en pil kokola, pwen ian i mela.

¹⁷Iejuj lao kotido, ap kotin diarada, me a mi nan joujou pon pa pon.

¹⁸Petanien me koren ion Ierujalem impan mail riau.

¹⁹A Juj oko me toto ko don Marta o Maria, pwen kamait ira la pweki ri ara ol o.

²⁰Marta lao ronadar, me Iejuj kotido, ap koieila tu on i. A Maria momod nan im o.

²¹Marta ap potoan on Iejuj: Main, ma re kotikot met, ri ai ol jota pan mela.

²²Ari jo, i aja meakot re pan kotin poeki ren Kot, Kot pan kotiki on ir.

²³Iejuj kotin majani on i: Ri om ol pan maureda.

²⁴Marta potoan on i: I aja, me a pan maureda ni iaj en ni ran nik o.

²⁵Iejuj kotin majani on i: Nai kamaur o maur, me pojon ia, pan memaureta pil murin a mela.

²⁶A meamen me maur o pojon ia, jota pan mela kokolata; koe kamelele mepukat?

²⁷A potoan on i: Ei Main, i pojon, me ir me Krijtuj Japwilim en Kot, me udan pwara don jappa.

²⁸A lao indada met, ap koieila ren Maria ri a li, moninki on i: Jaunpadak kotidor kainoma uk.

²⁹A lao ronadar, ap uda, madan wei re a,

³⁰A Iejuj jaikenta lel on kanim o, pwe a kotikoteta waja Marta tu on i ia.

³¹Juj oko, me mi re a nan im o, pwen kamait i ala, lao kilanada, me Maria madan uda tan wei, rap idauenla i, indinda: A pan ko on ni joujou, pwen janejan ia.

³²Maria lao lel waja o, o kilan i, ap poridi on ni aluwilu a indan i: Main, ma re kotikot met, ri ai ol jota pan mela.

³³Iejuj lao majani i janejan, o Juj oko, me ian i kokodo pil janejan, ap kupurola,

³⁴Majani: Komail pwilikidi ia i? Irail potoan on i: Main, kotido majani.

³⁵Iejuj kotin tontonir.

³⁶Juj oko ap inda: Kilan duen a pok on i!

³⁷A akai ir me indada: A jo kak pan men et me kapad pajan maj en me majkun o, me ol men et ender mela?

³⁸Iejuj pil kupurola koti don joujou o. A por o ulon nan kijin dol o takai eu mi poa.

³⁹Iejuj kotin majani: Katapure wei takai en! A Marta, en me melar ri a li, indada: Main, a matalar, pwe a mi met pon pa pon.

⁴⁰Iejuj kotin majani on i: I jo indai on uk, ma koe pojon, koe pan kilanada linan en Kot.