Jon 11:6-40

⁶Iesu ka ongen ta u le Lasarus i sasem, isau le ka kiis pes iwu biitom e biing aiwa na maleh ae.

⁷Namih ka fas foron berbetat na fafausum kia le, “Kerek fis sabin una Iudaia.”

⁸Ri ka tara sing i, “Ah! Tom fafausum, pakanini sau foron famfamu ken fan Iudaia ri totof tah isi luumete wo. Isau le igii, o ka ier sabin isi ok fis unaiwa?”

⁹Iesu ka kiliis ri aragii, “I sangful ini wu e kiptin aunbiing na nenge biing. Kaltu i la na kiptin ien, biil in tipeh. Biil. Wara le i par na malal tina piklinbat.

¹⁰Isau le, aunbiing i la na wor, ke in tipeh, wara le biil i mel e malal kia.”

¹¹Namih Iesu ka use ta u arae, ka fas ri mang le, “Talrer sing Lasarus ka masun tah. Isau le ian la isi iak famat u.”

¹²Foron berberat na fafausum kia ri ka kiliis u aragii, “Kumguui, male i masun, ke sasem kia in rop koseng u ma in liu rokap.”

¹³Kamtinan orek ke Iesu le, Lasarus ka met tah, isau le berberat na fafausum kia ri ka wol le Lasarus i masun sau.

¹⁴Pesu, Iesu ka fas fatus ri mang le, “Lasarus ka met tah.

¹⁵Ma ia wol lo gam, pesu ia ka laes le ia biil tinaiwa na aisa, isi gamek unune. Isau le, kerek la mang usuf i.”

¹⁶Ke Tomas (nenge asa e Didimas, kamtina le Kasang) ka fas tikii berberat na fafausum le, “Kerek la nami sabin, isi kerek met tura.”

¹⁷Ke aunbiing Iesu ka tapiek aiwa, ka tafe u le, ka fet tah e biing lo Lasarus awii na matanfat una luun minet.

¹⁸Beteni i fatat isi Ierusalem, i fasih arae ituul sau e kilomita,

¹⁹pesu ifuun e fan Iudaia ri la tah unaisa Mata ru e Maria isi famor ruh namin minet ke fenelik ruh.

²⁰Aunbiing Mata ka ongen u le Iesu apiek, ka suuh isi tafe u, isau le Maria tinaiwa tom na fel.

²¹Mata ka fas Iesu aragii, “Kumguui, le wo ta tom aga, ke feneklik biil tom in met.

²²Isau le igii, ia usum le sanih o sising u sing God, God in ta u.”

²³Iesu ka fas u aragii, “Fenemlik in aptih fis sabin.”

²⁴Mata ka kiliis u aragii, “Ia usum le in aptih fis sabin na aunbiing na apaptih fis na farfarop na biing.”

²⁵Iesu ka fas u aragii, “Iau tom e apaptih fis ke iau tom e liu, seh i unune lo iau, taftawa male in met, in liu sabin,

²⁶ma fanseh ri liu ma ri unune lo iau, biil in to met. O unune na sanih ia use u igii?”

²⁷Mata ka fas u aragii, “Tekentu kanaka, Kumguui, ia unune le wo Mesaia, ma wo e Kalalik ke God, ae keme usum le in la uga na piklinbat.”

²⁸Aunbiing Mata ka use ta u aragii, ka fis sabin ma ka kam fakum pes kisilik sing Maria, ke ka fas u le, “Tom fafausum igii, ma i diik isi wo.”

²⁹Aunbiing Maria ka ongen ta u arae, ka sangar suuh isi tafe u.

³⁰Iesu biil biitom i tapiek na maleh kiruh, isau le, i tinaiwa biitom na falifuh ae Mata i tafe ta u lo.

³¹Fan Iudaia ae ri batme ta Maria awii na fel, ri ka par u i sangsangar na aptih ma ka suuh, ke ri ka mi lo, wara le, ri wol le ka la una matanfat una luun minet isi teng.

³²Ke aunbiing Maria ka tapiek na falifuh ae Iesu tinaiwa lo, ka par u ma ka luut uf na famu lo Iesu ma ka tarah, “Kumguui, male wo ta tom aga, ke feneklik biil tom in met.”

³³Aunbiing Iesu ka par Maria i teng ke fan Iudaia ae ri la tura, ri ka teng sabin, ka purngis e bala ma ka ier isi teng.

³⁴Iesu ka diik ri le, “Fia gam ka faborong u wah?” Ri ka kiliis u aragii, “Kumguui, la ke ok par u.”

³⁵Ma Iesu ka teng.

³⁶Ke fan Iudaia ri ka tara, “Gam par u, i mais kanaka u tom.”

³⁷Isau le fal lo ri, ri ka tara le, “I sapeng tah na matan nenge kut. Isi sah biil ik lupes ta kaltu igii isi gong i met?”

³⁸Ka purngis sabin e bala Iesu, ke ka la una matanfat una luun minet. Matan fat ae, i e nenge matanfat ri babat kale u ini nenge tara na fat.

³⁹Iesu ka fas ri aragii, “Tel ufu fat ae.” Mata, fenelik e kaltu ae i met, ka tara, “Kumguui, ka fet tah e biing kale u ma igii ik mapuh tah.”

⁴⁰Ke Iesu ka tara sing i aragii, “Ia ka fas ta wo tah, male on unune, ke on par memeh ke God.”