Juan 11:6-40

⁶Na rukꞌ ta kꞌu riꞌ, echiriꞌ xuto yewaꞌ ri Lázaro, kꞌa xkanaj chi kan kebꞌ qꞌij pa ri luwar pa kꞌo wi.

⁷Tekꞌuchiriꞌ, xubꞌiꞌij chike rutijoꞌn: —Joꞌ tanchi Judea —xchaꞌ.

⁸Ekꞌu rutijoꞌn xkibꞌiꞌij che: —Lal tijonel, ¿na kꞌakꞌ ta nebꞌa laꞌ raj judiꞌabꞌ ya laj xkikamisaj la paꞌbꞌaj? Na rukꞌ ta kꞌu riꞌ, ¿woꞌora keꞌek tanchi la chilaꞌ? —xechaꞌ.

⁹Ri Jesús xubꞌiꞌij chike: —¿Na qatzij ta nebꞌa laꞌ kabꞌlajuj ora kꞌo che ri jun qꞌij? Yey e junoq kabꞌin paqꞌij na kuchiq ta ri raqan, ma karil rubꞌe ruma ri qꞌijsaq re ruwachulew.

¹⁰Noꞌj we junoq kabꞌin chaqꞌabꞌ, riꞌ kuchiq ri raqan ma pa qꞌequꞌm kꞌo wi —xchaꞌ.

¹¹Tekꞌuchiriꞌ, xubꞌiꞌij chike: —E ri qamigo Lázaro, kawarik. Kinꞌek kꞌu che ukꞌosoxik —xchaꞌ.

¹²Xkibꞌiꞌij kꞌu rutijoꞌn che: —Qajawal, utz we kawarik, ma riꞌ e kꞌutubꞌal re kutzir uwach —xechaꞌ.

¹³Ri xkichꞌobꞌ rike e xa kuxlan ri Lázaro; noꞌj ri Jesús e kachꞌaꞌt puwi rukamik ri Lázaro.

¹⁴E uwariꞌche ri Jesús xuqꞌalajisaj chike: —Ri Lázaro kaminaq chik.

¹⁵Yey iwuma kꞌu riꞌix, lik kinkiꞌkotik ri na in jinta chilaꞌ rukꞌ echiriꞌ xkamik, ma jelaꞌ kanimar ri kubꞌulibꞌal ikꞌuꞌx wukꞌ. Woꞌora joꞌ, jeꞌqilaꞌ —xchaꞌ.

¹⁶Ekꞌuchiriꞌ, ri Tomás ri kabꞌiꞌx “Yoꞌx” che, xubꞌiꞌij chike ri jujun chik rachbꞌiꞌil: —Kojꞌek riꞌ chaꞌ jelaꞌ kojkam junam rukꞌ ri Jesús —xchaꞌ.

¹⁷Kajibꞌ qꞌij chi lo riꞌ muqutal ri Lázaro echiriꞌ ri Jesús xopon Betania.

¹⁸Waꞌ xa chunaqaj Jerusalem kꞌo wi, laj oxibꞌ kilómetro kꞌo wi lo che.

¹⁹E kꞌi chike raj judiꞌabꞌ e petinaq kukꞌ ri María y ri Marta re koꞌlkibꞌochiꞌij kikꞌuꞌx ruma rukamik ri kixibꞌal.

²⁰Ekꞌuchiriꞌ ri Marta xuto katajin roponik ri Jesús, xel bꞌi che ukꞌulik; noꞌj ri María xkanaj kan chwa ja.

²¹Ekꞌu ri Marta xubꞌiꞌij che ri Jesús: —Wajawal, we ta e laꞌ kꞌo la wara, na kakam ta riꞌ ri nuxibꞌal.

²²Na rukꞌ ta kꞌu riꞌ, lik wetaꞌam, tobꞌ ne kꞌa e waꞌ, ri Dios kuya cheꞌla ronoje ri katzꞌonoj la che —xchaꞌ.

²³Ri Jesús xubꞌiꞌij che: —Raxibꞌal kakꞌastaj lo chikixoꞌl ri ekaminaq —xchaꞌ.

²⁴Ri Marta xubꞌiꞌij che: —Qatzij, riꞌin wetaꞌam kakꞌastaj lo che ri kꞌisbꞌal qꞌij re ruwachulew echiriꞌ kekꞌastaj lo konoje ri ekaminaq —xchaꞌ.

²⁵Ri Jesús xubꞌiꞌij che: —E riꞌin ri kinkꞌastajisan lo ke ri ekaminaq yey e riꞌin ri kinyaꞌw kꞌaslemal. China kꞌu ri kakubꞌiꞌ ukꞌuꞌx wukꞌ, tobꞌ kakamik, kakꞌastajik.

²⁶Yey konoje ri e kꞌaslik y kakubꞌiꞌ kikꞌuꞌx wukꞌ, na kekam taj ma kꞌo kikꞌaslemal na jinta utaqexik rukꞌ ri Dios. ¿Kakoj riꞌat waꞌ? —xchaꞌ.

²⁷Ri Marta xukꞌul uwach: —Kankojo, Wajawal, ma riꞌin nukojom rilal lal ri Cristo, Rukꞌajol ri Dios, ri bꞌiꞌtisim loq kakꞌun che ruwachulew —xchaꞌ.

²⁸Echiriꞌ ri Marta xukꞌis ubꞌiꞌxik waꞌ, xeꞌek che usikꞌixik ruchaqꞌ María y xew che rire xubꞌiꞌij: —Ri Qajawal kꞌo wara y katusikꞌij —xchaꞌ.

²⁹Xew xuta waꞌ ri María, na jampatana xyaktaj bꞌi y xeꞌrila ri Jesús.

³⁰Ri Jesús kꞌamajaꞌ ne kok pa ri tinamit, ma kꞌa kꞌo pa ri luwar pa xkꞌul wi ruma ri Marta.

³¹Ekꞌu raj judiꞌabꞌ e kꞌo rukꞌ ri María re kakibꞌochiꞌij ukꞌuꞌx, xkilo echiriꞌ na jampatana xyaktajik y kanik xel bꞌi. Rike xeterej kꞌu bꞌi chirij, ma e chikiwach rike e riꞌ keꞌek chwa ri muqubꞌal chaꞌ keꞌroqꞌej ruxibꞌal.

³²Echiriꞌ ri María xopon pa kꞌo wi ri Jesús, xew xril uwach, xuxuk ribꞌ chwach, y jewaꞌ xubꞌiꞌij che: —Wajawal, we ta e laꞌ lal kꞌo la wara, na kakam ta riꞌ ri nuxibꞌal —xchaꞌ.

³³Ri Jesús echiriꞌ xrilo lik kebꞌoqꞌ ri María y raj judiꞌabꞌ eteran lo chirij, lik xok chukꞌuꞌx y xuchap bꞌis.

³⁴Xubꞌiꞌij kꞌu chike: —¿Pa ximuq wi? —xchaꞌ. Rike xkibꞌiꞌij: —Qajawal, peta la y chilape la —xechaꞌ.

³⁵Ekꞌu ri Jesús xoqꞌik.

³⁶Xkibꞌiꞌij kꞌu raj judiꞌabꞌ: —¡Chilape alaq, lik kꞌax kunaꞌo! —xechaꞌ.

³⁷E kꞌo jujun chike raj judiꞌabꞌ xkibꞌiꞌij: —Wa waꞌchi e xtzuꞌnisan re ri jun potzꞌ. ¿Suꞌbꞌe kꞌu riꞌ na jinta xuꞌano chaꞌ na kakam ta ri Lázaro? —xechaꞌ.

³⁸Ri Jesús lik xok tanchi bꞌis chukꞌuꞌx, xqibꞌ chwa ri muqubꞌal. Waꞌ jun jul worotal paꞌbꞌaj y tzꞌapal uchiꞌ rukꞌ jun abꞌaj.

³⁹Ekꞌu ri Jesús xubꞌiꞌij: —Chiwesaj laꞌbꞌaj —xchaꞌ. Yey ri Marta, ri ranabꞌ kan ri kaminaq, xubꞌiꞌij che: —Wajawal, laꞌ lik chu chik, ma e ukaj qꞌij waꞌ muqutalik —xchaꞌ.

⁴⁰Ri Jesús xubꞌiꞌij che: —¿Na nubꞌiꞌim ta nebꞌa chawe, we kakubꞌiꞌ akꞌuꞌx wukꞌ, kawil runimal uwach uqꞌij ri Dios? —xchaꞌ.