Juan 11:6-40

⁶Jesús wisgusgu, Lázaro uelemaiye, bia-na-maidgi ibabo amba megis-gusad.

⁷Geb a-sorba, Jesús na e-sapinganga sokalid: —Gannar anmar Judease namarye.

⁸E-sapingan ega sogded: —Odurdaked-saila, emide Judiomar akwagi be-makbi-gusmaladde, ¿degite gannar be nabarde?

⁹Jesús, abin-sogded: —¿Ar neg-ibgined wachi-irambe-gakabo niksursi? Ar dule neg-ibgi gudiile, geg yoleged, ar we-napneggined neg-meegwadba gudiid.

¹⁰Ar dule neg-mutikidgi gudiirdi, yoledo, ar agindi gwallu-meegwad sulid. An-burgoed-iba-nonikidse geb an burgoed, emigindi an-oburgosurmalad, ar ibginedyob an gudiid.

¹¹We-degi-sogsad-sorba Jesús na e-sapinganga sogdesunnad: —Anmar-ai-Lázaro gabmaid, an ese naer-gebed odakegar.

¹²E-sapingan ega sogdemalad: —Dummad, ar Lázaro gabmaile, nuguodo. Degite, ¿ibiga be nabisunna? Mer be nae.

¹³Ar Jesús we-degi-sogsa-gusadi, sognaindo: “Lázaro burgwar maiye.” Ar e-sapingandi, gabed-sunnad ega obarye bienad.

¹⁴Geb degi Jesús bakar-buud sogdesunnad: —Lázaro burgwis maiye.

¹⁵Bemar-ular yeer an itoged, ar Lázaro-walik an gudigussurgu, adi bemar mer angi bengumalagar. Degisoggu, anmar Lázarose namargwelo.

¹⁶Degi Tomás, Dídimoye bimarbalid, e-sordamarga sogdesunnad: —Anmar Jesúsba namarmodo, adi anmar eba burgwemarmogagar.

¹⁷Degi Jesús Betaniase nonigu, daknonikid, Lázaro ibabakegus bato neg-uangi digles-mai.

¹⁸Betania dakargu Jerusaléngi itakaa siid, unnila wachi-abala nanae-wilub.

¹⁹Lázaro-burgwisad-ular, Judiomar-bukidar Martase, degi, Maríase nonigusmalad, adi wis e-gwage odimakegar.

²⁰Marta itosgu Jesús daniye, e-abin nade-gusad, Maríadi neggi besa-gusad.

²¹Degi Marta Jesúsga sogded: —Dummad, be wegi anmar-abargi gudigusana, an-sus burgwissulinad.

²²Emigi an wisbardo, ar ibu Bab Dummadse be egisele, Bab Dummad bega ukoed.

²³Jesús, abin-sogded: —Be-sus gannar durguoed.

²⁴Marta, abin-sogded: —An wisi, ibagan-bergusar, an-sus dulemar-gannar-durguoed-ibagi gannar durguoed.

²⁵Jesús, abin-sogde: —Ani an gannar sunna dule-odurguedid, degi, ani an burba-geg-bergued ukedbalid. Ar dule angi bensulile, ar burgwar mai-inigwele, gannar durguoed.

²⁶Ar bela-dula-gudidimalad angi bensulile, bar e-san-burba berguosulid, degi-sadeguoed. ¿Ar we an-bega-soged be bensuli?

²⁷Marta, Jesús-abin sogded: —Dummad, eye, an bensuli, be Cristo, Bab-Dummad-Machi, we-napnegse be danikoye be sogles-gusadid.

²⁸Marta deyob sogsad-sorbali, e-urbase gornaded, ega arbakee sogdapid: —Odurdaked-saila noni, bese gole.

²⁹Deyob ega soge itosgu, María yog gwisguar imaksad, Jesússe nade-gusad.

³⁰Jesús deun amba yo neggweburse doged, ar bia-Marta-e-abingusadgi amba gudiid.

³¹Judiomar wis María gwage odimakegala, e-neggi-eba-bukmaladi, daksamargu, María gwae gwisgus node, eba nodmarmogad. Amar sogdemalad: —María neg-uanse naded, ase bonaded.

³²María, Jesús-siidse modapgu, Jesús dakdegu, e-abin yokorgi sindigar sigdapid, ega sogded: —Dummad, be wegi anmar-abargi gudigusana, an-sus burgwissulinad.

³³Jesús dakdegu, María ise-boale, degine, Judiomar-wis-María-gwage-odimakega-nonimalad ise-boarmarmoga, na ulubgi nue-nunmak ito-nadmogad, degi, nue-María-wile-dakded.

³⁴Jesús Maríaga sogded: —¿Bia bemar Lázaro-digsamala? Jesúsga sogdemalad: —Dummad, be dage, be dakdage, bia digar mai.

³⁵Degi Jesús boded.

³⁶Degi Judiomar sogdemarsunnad: —Nue be dake, ibiyobi Jesús Lázaro-nue-sabena.

³⁷Degi Judio-baigan sogdemarmogad: —Ar we-Jesúsde, dule-ibya-sulidga ibya-egasadde, ¿ar sunna wede Lázaro oburgwesuli geg imakgussi? Deyob imake-wilubbinad.

³⁸Jesús nue ulubgi bukib itodbargu, neg-uanse nonikid. Dakargua, gusgu na Judiomar mui digdamalad akwa-yaa-ollogwad-yaba, geb akwa-dummad e-doged-idu sii-damalad.

³⁹Jesús dulemarga sogdesunnad: —Akwa-dummad-onirmar. Marta, dule-burgwisad-e-bun, sogded: —Dummad, ¿Ibiga akwa be onirbie? Bato ibabakegus diglesad, degisoggu, ¿bato nun yapansursi?

⁴⁰Jesús, Marta-abin sogded: —¿An bega sogsasursi, be bensulile, Bab-Dummad-gangued be dakoye?