Jan 11:6-40

⁶Mé lè i tann nouvèl-la ki Lazaròs té malad, i wèsté koté i té yé-a pou dé jou ankò.

⁷Apwé sa, i di sé disip li-a, “Annou déviwé Joudiya.”

⁸Sé disip-la di, “Titja, i pa ni djè lontan dépi sé Jwif-la té vlé tjwéʼw èk wòch èk ou vlé viwé an menm plas sala?”

⁹Jézi di, “On jou pa ni douz nèditan-an, on? Népòt moun ki maché gwan lajouné pa kay tonbé, paski i ka wè klèté-a ki ka kléwé latè-a.

¹⁰Mé si i maché òswè, i kay konyen pyéʼy, paski i pa ka wè pyès klèté.”

¹¹Lè Jézi fini di sa, i di yo ankò, “Kanmawad nou Lazaròs ka dòmi, mé mwen kay alé èk mwen kay lévéʼy.”

¹²Sé disip la di, “Mèt, si i ka dòmi, sa bon. I kay vini byen.”

¹³Jézi té vlé di yo sé mò Lazaròs té mò, mé yo té konpwann sé dòmi i té ka dòmi.

¹⁴Kon sa Jézi di yo aklè, “Sé mò Lazaròs mò,

¹⁵mé pou lapéti zòt, mwen kontan mwen pa té la épiʼy, pou zòt sa kwè an mwen. Annou koté i yé-a.”

¹⁶Tonmas (yo té ka kwiyé Jimo-a) di sé lézòt disip-la, “Annou alé èk Mèt-la, pou nou sa mò ansanm épiʼy.”

¹⁷Lè Jézi wivé la, i jwenn yo té ja téwé Lazaròs dépi kat jou ki pasé.

¹⁸Bèfanni té bò dé lyé hòd Jérouzalèm.

¹⁹An pil sé jan Joudiya-a té ja vini pou konsolé Mafa èk Mari pou lanmò fwè yo.

²⁰Lè Mafa tann di Jézi té ka vini, i pati alé jwenn li, mé Mari wèsté asid an kay-la.

²¹Mafa di Jézi, “Senyè, si ou té la, fwè mwen pa té kay mò.

²²Mé mwen sav jis atjwèlman Bondyé ka baʼw népòt bagay ou mandéʼy pou.”

²³Jézi diʼy, “Fwèʼw kay viwé vivan ankò.”

²⁴I di, “Mwen sav i kay viwé vivan ankò asou dènyé jou-a.”

²⁵Jézi diʼy, “Sé mwen ki ka fè moun wésisité èk sé mwen ki ka ba yo lavi. Népòt moun ki kwè an mwen kay viv, menm si i ja mò.

²⁶Moun-an ki ka viv èk ki ka kwè an mwen-an pa kay janmen mò. Ou kwè sa mwen di-a?”

²⁷Mafa di, “Wi Senyè, mwen kwè sé ou ki Mèsaya-a, Gason Bondyé ki té ni pou vini an latè-a.”

²⁸Lè Mafa fin di sa, i déviwé èk i ay kwiyé séséʼy Mari. I diʼy an zòwèy, “Titja-a la, ʼi. I ka mandé pou ou.”

²⁹Lè Mari tann sa, i lévé vitman ay jwenn Jézi.

³⁰Jézi pʼòkò té wivé an vil-la, mé i té an menm plas-la koté Mafa té jwenn li-an.

³¹Lè sé Jwif-la ki té an kay-la ka konsolé Mari-a wè i lévé vitman èk i pati, yo swiv li. Yo kwè sété bò twou-a i té ka alé ay pléwé.

³²Lè Mari wivé koté Jézi té yé-a, kon i wèʼy, i tonbé an pyéʼy èk i di, “Senyè, si ou té la, fwè mwen pa té kay mò!”

³³Lè Jézi wèʼy ka pléwé èk mannyè sé Jwif-la ki té épiʼy-la té ka pléwé, sa touché tjèʼy, èk sa distwéʼy an chay.

³⁴I di, “Koté zòt téwéʼy?” Yo di, “Mèt, vini wè.”

³⁵Jézi pléwé.

³⁶Sé Jwif-la di, “Gadé mannyè i enmenʼy, on!”

³⁷Mé adan yo di, “Si i fè nonm-lan ki té avèg-la wè klè, ou pa kwè i té kay sa anpéché Lazaròs mò?”

³⁸Jézi té distwé an tjèʼy ankò. I alé bò twou-a, ki sété on kav yo té fouyé an kayè-a èk yo té mété an wòch bouché djòl li.

³⁹Jézi di yo, “Débouché twou-a!” Mafa, ki té sésé nonm-lan ki mò-a, di, “Senyè, i ni kat jou dépi yo téwéʼy. Pou atjwèlman i ja ka santi!”

⁴⁰Jézi diʼy, “Ès mwen pa té ja diʼw ou kay wè pouvwa Bondyé si ou kwè?”