يَيَ 11:6-40

⁶عَ تٌ لَسَرُ قُرَقٍ مّ، عَ مُ سِفَ دّدّ، عَ نَشَ لُ نَا شِ قِرِن مَن.

⁷نَ شَنبِ، عَ نَشَ عَ قَلَ عَ قْشِرَبِرّيٍ بّ، «وٌن شَ فبِلٍن يُدَيَ بْشِ مَ.»

⁸عَ قْشِرَبِرّيٍ نَشَ عَ قَلَ، «كَرَ مْشْ، يُوِقِيٍ كَتَشِ عِ قَشَدٍ دّننَشّ يَ، عِ تَن فبِلٍنقٍ مّننِ نّ؟»

⁹عِسَ نَشَ عٍ يَابِ، «وَشَتِ قُ نُن قِرِن شَ مُ نَ قّيحّن كٍرٍن كُي؟ شَ نَشَن يٌ عَ حّرّ مَ يَنيِ رَ، عَ مُ عَ سَنيِ رَدِنمَ بَرِ مَ يِ دُنِحَ نَءِيَلَنيِ يَنبَمَ عَ بّ.

¹⁰كْنْ شَ نَشَن يٌ عَ حّرّ مَ كْي رَ، عَ عَ سَنيِ رَدِنمَ نّ، بَرِ مَ نَءِيَلَنيِ يٌ مُ عَ بّ.»

¹¹عَ نَ قَلَ شَنبِ، عِسَ مَن نَشَ عَ مَسٍن، «وٌن شَنُنتٍنيِ لَسَرُ بَرَ شِ، كْنْ ﭑ سِفَقٍ عَ رَشُنُدٍ.»

¹²عَ قْشِرَبِرّيٍ نَشَ عَ قَلَ عَ بّ، «مَرِفِ، شَ عَ نَ شِقٍ، عَ يَلَنمَ نّ.»

¹³عِسَ تٌ لَسَرُ شِقٍ قَلَ، عَ نُ عَ قَشَقٍ نَن مَ، كْنْ عَ قْشِرَبِرّيٍ تَن حْشْ عَ مَ، عَ عَ نُ مَلَبُي شِ شْلِ نَن مَ.

¹⁴نَ كُي، عِسَ نَشَ وْيّن عٍ بّ عَ قِيشّ رَ، «لَسَرُ بَرَ لَاشِرَ

¹⁵كْنْ نَ رَبَقٍ ﭑ شَنبِ، عَ بَرَ قِندِ سّيوّ رَ ﭑ بّ، بَرِ مَ عَ شْلِ ﭑ مَ وٌ شَ دَنشَنِيَ سْتْ يِ قٍ كُي. يَكْسِ، وٌن شَ سِفَ عَ يِرٍ.»

¹⁶نَ تّمُي تٌمَسِ، عَ نُ قَلَمَ نَشَن بّ «فُلِ»، عَ نَشَ عَ قَلَ عِسَ قْشِرَبِرّ بٌورٍيٍ بّ، «وٌن بِرِن شّي، وٌن نُن كَرَ مْشْ بِرِن شَ قَشَ!»

¹⁷عِسَ تٌ سٌ نَا، عَ نَشَ عَ لِ لَسَرُ قُرٍ بَرَ شِ نَانِ رَبَ فَبُرِ كُي.

¹⁸كِلٌ سَشَن حْندْن نَن نُ نَ بٍتَنِ نُن دَرِ سَلَمُ تَفِ. عٍ تٌ مَكْرّ،

¹⁹يُوِقِ فبٍفبٍ نُ بَرَ قَ مَرَتَ نُن مَرِيَمَ شْنيِ، عٍ مَاشّمّ حْنقٍ كُنقَ بَدٍ.

²⁰مَرَتَ تٌ عِسَ قَقٍ مّ، عَ نَشَ سَ عَ رَلَن، كْنْ مَرِيَمَ تَن دْشْشِ نَشَ لُ بَنشِ.

²¹مَرَتَ نَشَ عَ قَلَ عِسَ بّ، «مَرِفِ، شَ عِ نُ نَ بٍ نُ، ﭑ مَاشّمّ مُ قَشَمَ نُ.

²²كْنْ هَلِ يَكْسِ، ﭑ عَ كٌلٌن عَ عِ نَ قٍقٍ مَشْرِن عَلَ مَ، عَ عَ رَبَمَ نّ عِ بّ.»

²³عِسَ نَشَ عَ قَلَ عَ بّ، «عِ شُنيَ كٍلِمَ نّ قَشّ مَ.»

²⁴مَرَتَ نَشَ عَ يَابِ، «ﭑ عَ كٌلٌن تَن، عَ كٍلِمَ نّ قَشّ مَ دُنِحَ رَحْنيِ، قَشَمِشِيٍ كٍلِمَ تّمُي نَشّ.»

²⁵عِسَ نَشَ عَ مَسٍن عَ بّ، «ﭑ تَن نَن نَ مَرَكٍلِ نُن كِسِ رَ. نَشَن نَ دَنشَنِيَ ﭑ مَ، عَ كِسِمَ نّ، هَلِ عَ قَشَ.

²⁶نَشَن يٌ بَلٌشِ، عَ دَنشَنِيَشِ ﭑ مَ، نَ كَنيِ مُ لْيمَ عَبَدَن. عِ لَشِ نَ رَ؟»

²⁷عَ نَشَ عَ يَابِ، «عِيٌ، مَرِفِ! ﭑ لَشِ عَ رَ عَ عِ تَن نَن نَ عَلَ شَ مِشِ سُفَندِشِ رَ، عَلَ شَ دِ، نَشَن لَن عَ شَ قَ دُنِحَ مَ.»

²⁸مَرَتَ نَ قَلَ شَنبِ، عَ نَشَ سِفَ عَ شُنيَ مَرِيَمَ قْشْ رَ، عَ عَ قَلَ عَ بّ عٍ دٌرٌ مَ، «كَرَ مْشْ بَرَ قَ، عَ نَ عِ شِلِقٍ.»

²⁹مَرِيَمَ تٌ عَ مّ، عَ نَشَ كٍلِ كٍرٍن نَ، عَ سِفَ عِسَ رَلَندٍ.

³⁰نَ تّمُي، عِسَ مُ نُ سٌشِ تَا كُي. مَرَتَ عَ لِ دّننَشّ، عَ نُ نَ مّننِ نّ سِندٍن.

³¹يُوِقِ نَشٍيٍ قَشِ كُنقَ بَدٍ، نَشٍيٍ نُ نَ مَرِيَمَ قّ مَ بَنشِ كُي، عٍ تٌ عَ تٌ كٍلِ رَ مَقُرٍن نَ، عٍ نَشَ بِرَ عَ قْشْ رَ تَندٍ. عٍ حْشْ عَ مَ عَ عَ نَ سِفَقٍ فَبُرِ يِرٍ نّ، عَ شَ سَ وَ نَا.

³²مَرِيَمَ تٌ عِسَ يِرٍ لِ، عَ قّقّ عَ تٌ، عَ نَشَ سُيِدِ عَ بّ، عَ عَ قَلَ، «مَرِفِ، شَ عِ نُ نَ بٍ نُ، ﭑ مَاشّمّ مُ قَشَمَ نُ!»

³³عِسَ تٌ مَرِيَمَ تٌ، عَ نَ وَقٍ، يُوِقِ نَشٍيٍ نُ نَ عَ قْشْ رَ، نٍيٍ قَن وَقٍ، عَ نَشَ سُننُن، عَ بْحّ نَشَ رَحَاشُ عَ مَ.

³⁴عَ نَشَ مَشْرِنيِ تِ، «وٌ عَ رَفَتَشِ مِندٍن؟» عٍ نَشَ عَ يَابِ، «مَرِفِ، قَ، مُشُ شَ نَ مَسٍن عِ بّ.»

³⁵عِسَ نَشَ وَ.

³⁶نَ كُي، يُوِقِيٍ نَشَ عَ قَلَ، «عَ مَتٌ، لَسَرُ نُ رَقَنشِ عَ مَ كِ نَشّ!»

³⁷كْنْ ندٍيٍ عٍ يَ مَ، عٍ نَشَ عَ قَلَ، «ثٍ، يِ نَشَن دْنشُي يَ رَبْو، عَ مُ نُ نْمَ لَسَرُ رَتَنفَدٍ قَشّ مَ شّ؟»

³⁸عِسَ بْحّ مَن نَشَ رَحَاشُ عَ مَ. عَ نَشَ سِفَ فَبُرِ يِرٍ. قْنمّ ندٍ نَن نُ عَ رَ، فّمّ بٍلٍبٍلٍ دْشْشِ نَ دّ رَ.

³⁹عِسَ نَشَ عَ قَلَ، «وٌ فّمّ بَ نَا.» مَرَتَ، قَشَمِشِ مَافِنّ، عَ نَشَ عَ قَلَ، «مَرِفِ، عَ شَ مَرَفَتّ شِ نَانِ نَن تٌ! عَ عَ لِمَ عَ قُرٍ شِرِ بَرَ مِنِ يِ وَشَتِ مَ.»

⁴⁰عِسَ نَشَ عَ قَلَ عَ بّ، «ﭑ مُ عَ قَلَ شّ عِ بّ، عَ شَ عِ دَنشَنِيَ، عِ عَلَ سّنبّ مَكَابَشِ تٌمَ نّ؟»