Jone 11:6-40

⁶Dopaka doko, baame Lasatasa yaina silyamo lapae doko sepala dokopa, baa kateamo yuu dokonya koto gii lapoma mee katea.

⁷Dopa petala maitakao baanya disaipele dupa lamaiyoo, “Naima Jutia dee pilyemana,” lea.

⁸Dopa leamopa disaipele dupame baa lamaiyoo, “Mana Lenge Akali, ene epapu Juta dupame kaname emba pyalanya pipimino doko, deaka embame yuu dokonya patoo leepe?” leami.

⁹Dokopa Jisasame dupanya pii yanu pyakamaiyoo, “Yongama gii dokonya pituu alemandi tuu lao kiloko gii kingi ita mende-kisa dee lapoma daa kandamuape? Endakali mende kotaka kaitini paelyamo kandao doko, lombapae nasingi. Doko, baa kotaka kandao paenge.

¹⁰Dopaka doko, endakali mende kuka paelyamo kandao doko, baa lombapae singi. Doko, tii napilyamosa dopa pingina,” lea.

¹¹Baame dopa latala maitakao dokaita lamaiyoo, “Naimanya kaita miningi Lasatasa doko luu palipapya lamona, nambame baa pyale tala patowana,” lea.

¹²Dokopa disaipele dupame baa lamaiyoo, “Kamongo, baa luu palitamo kandao doko, dee baa yaka joo pilyamona,” leami.

¹³Jisasame Lasatasa kumatapyana lao leamopa dupame mee luu palipumopa lelyamo lao masiami.

¹⁴Dopa piaminosa Jisasame dokaita panao lamaiyoo, “Lasatasa kumatapya.

¹⁵Nyakamame masoo minalapale lao nambame nyakama lao masetala baa kumapyamo gii dokopa namba baapa awapa nakatapu dokonya mona yaepelyo. Dopaka doko, indupa baa silyamo dokonya muaa,” lea.

¹⁶Tomasa lenge Pakao Mandenge lengema dokome disaipele yangi dupa lamaiyoo, “Naima apata baa-pipa awapa kumamana muaa,” lea.

¹⁷Jisasa pao pyakamatala Lasatasa malu petae koto kitomende katapeamo doko kandea.

¹⁸Yuu Betani doko Jetusaleme tengesa kilomita tepoma joo sia.

¹⁹Dokopa Juta longo dupame Mata Matiapa pimalenge dolapo kumanda peteambino dokonya kumanda epeami.

²⁰Mata dokome Jisasa epelyamo lapae sepala kaitinisa kandanyalanya pea. Dopaka doko, Matia baa andaka mee petea.

²¹Dokopa Matame Jisasa lamaiyoo, “Kamongo, emba ae kateeli kandao doko, nambanya pimalenge doko kumala nayali.

²²Dopaka doko, indupa nambame masilyona, embame opale mende Gote-kisa tee latenopa baame emba dyaapomona,” lea.

²³Dokopa Jisasame enda doko lamaiyoo, “Embanya pimalenge doko dee sakatatana,” lea.

²⁴Dokopa Matame baa lamaiyoo, “Yuu etatamo gii dokopa endakali kumapae dupa sakatatamino gii dokopa baa sakatatana lao nambame masilyona,” lea.

²⁵Dokopa Jisasame enda doko lamaiyoo, “Sakatengepi dee lete katengepi doko nambaka. Dopana, namba lao masoo miningi endakali mende kumatamo kandao doko, kumapalapi dee lete katata.

²⁶Endakali saka katao namba lao masoo minilyamo doko pitaka kumalapi nayatamina, embame dopa lao masoo minilipi?” lea.

²⁷Dokopa Matame Jisasa lamaiyoo, “Kini, Kamongo, emba Kataisana, Gote Ikiningi isa yuunya ipupenge dokona lao nambame masoo minao petelyona,” lea.

²⁸Matame dopa latala pao baanya kakingi Matia epena latala elyakao lamaiyoo, “Mana Lenge Akali doko ipao ae katapala emba ipu lelyamona,” lea-pyaa.

²⁹Matiame doko sepala yapa lao baa sakatao Jisasa kateasa epea.

³⁰Jisasa baa yuu taono dokonya naepenya wamba Matame kandanyiamo dosa mee katea.

³¹Dokopa Juta endakali Matia-pipa awapa kumanda peteamino dupame kandeaminopa Matia baa yapa sakatatala kamaka peanya, baa malunya ee laa pelyamo lao masetala watao epeami.

³²Dokopa Matia Jisasa kateamo dokonya ipupala baa kandea. Dopa petala baa ipao Jisasanya moko kateamo dosa tombauli sepala baa lamaiyoo, “Kamongo, emba ae kateeli kandao doko, nambanya pimalenge doko kumala nayalina,” lea.

³³Jisasame kandeamopa baa ee leamo dokopa Juta awapa epeamino dupa ee leamiaka. Dokopa baa mona etete kenda kayao yamataka lea.

³⁴Dokopa Jisasame lao pituu, “Nyakamame baa anja malu piamipi?” lea. Dopa leamopa dokaitame baa lamaiyoo, “Kamongo, embame kanja ipu,” leami.

³⁵Dokopa Jisasa baa ee lea.

³⁶Dopa piamopa Juta dupame lao pituu, “Akali doko baame etete auu kaengena kanjepa!” leami.

³⁷Dopa leaminopa yangi dupame lao pituu, “Akali dakeme endakali lenge monda mende lenge tasala nayapya kandamuape? Kapa pao baame akali dake kumina kayapyalipi?” leami.

³⁸Dokopa deaka Jisasa mona kenda kayao yamataka latala baa malunya pea. Malu doko kananda mendenya petala kambu doko kana yale mendeme pai leami-pyaa.

³⁹Jisasame lao pituu, “Nyakamame kana dake nyoo kapya laapa,” lea. Dopa leamopa akali kumiamo dokonya pimalenge Mata dokome baa lamaiyoo, “Kamongo, indupa baa ai pyatao pilyamo. Baa malu petae katamopa koto kitomende patapyana,” lea.

⁴⁰Dokopa Jisasame enda doko lamaiyoo, “Nambame emba wamba langyoo, embame masoo minao pititino kandao doko, Gotenya tii pipae doko kandatena langya nayalope?” lea.