Yohani 11:6-40

⁶Hata naha, papikanishili kucha Lasalu katakwa ayikalili majuva mavili kukula kula ngajila kuyenda kumlola.

⁷Pambeli kavawombela vandundami vaki, “Tuyendi kandi Uyawudi!”

⁸Vala vandundami vamuwombela, “Muwula! Mwandi mwandi hela Vayawudi vakakusakeyi vakugumi na miganga kukula kula, yuwi ukudayila kuyenda kandi kuku?”

⁹Yesu kayangula, “Saa sha pamusi lilongu na mavili, duhu? Mundu payendayenda pamusi ayikwali ng'odu, nongwa akulola lwengi lwa mulima.

¹⁰Mundu payendayenda pamihi dayikwali, nongwa kavahela lwengi.”

¹¹Yesu pamalilili kudeta naha, kavawombela, “Ghanja wetu, Lasalu kawonja, lakini nguyenda ngamyimushi.”

¹²Vanachuli vaki vamuwombela, “Bambu leki pawonja, akunana.”

¹³Veni vamanya kucha Yesu kawomba milandu ya kuwonja ng'onju, kumbi kawomba milandu ya njifwa ya Lasalu.

¹⁴Yesu kavawombela ngatu hela, “Lasalu kasova,

¹⁵lakini nenga ngusekilela kwanongwa ya yumwi kucha ngaveli aku ha, ili muweshi kujumila. Ponopa tuyendi kwa Lasalu.”

¹⁶Tomasi yivamkema mambila kavawombela vandundami vamonga, “Tuyendi na yufwi tukasovi pamu na mweni!”

¹⁷Yesu pafikili awonili Lasalu vamvikili kala musembi, majuva mchechi vapitili.

¹⁸Chijiji cha Betaniya chaveli pabehi na Yelusalemu, utali kucha kilomita ndatu.

¹⁹Vayawudi vatangalili vafikili kwa Malita na Maliya kuvakola mawoku kwa chivembu cha mhaja wawu.

²⁰Malita papikanishili kucha Yesu akwisa, ayendili kumyanga, Maliya asighalili munyumba.

²¹Malita kamuwombela Yesu, “Bambu, kucha ungaveli apa, mhaja wangu angasovili ha!

²²Lakini ponopa manya kucha fyofyosi fiwudayila kumluva Chapanga dakugayili.”

²³Yesu kamuwombela, “Mhaja waku dashukuki.”

²⁴Malita kamyangula, “Manya kucha dashukuki mulijuva lya kushukushiwa.”

²⁵Yesu kamuwombela, “Nenga ndi awu ushukushu na unofu. Yajumila nenga, hata pasova, dayikali kandi.

²⁶Na yula yayikala na pajumila nenga, dasovi ha jola, wuli! ukufijumila afi?”

²⁷Malita kamuwombela, “Yina, Bambu! Nenga, ngujumila kucha yuwi ndi Kilistu, mwana wa Chapanga, yula dayisi mumlima.”

²⁸Malita pamalilili kudeta fila, kayenda kumkema Maliya mkulu mundu, kamuwombela pambali, “muwula kava panji, akukukema.”

²⁹Mweni papikanishili, kalopu kamukovekela Yesu.

³⁰Yesu aveli akali hela kuyingila muchijiji, aveli akali hela pahala pala pamuyangilili Malita.

³¹Vala Vayawudi yivaveli pamu na Maliya kayaki, vayisili pala pachivembu pavamuwonili akutandamuka kalopu na kufuma panji vamkovekelili. Vakacheyi akuyenda kusembi akalili.

³²Maliya pafikili pala pavelili Yesu, pamuwonili kamuwila mumawulu, kamuwombela, “Bambu, kucha ungaveli baha mhaja wangu angafwili ha!”

³³Yesu pamuwonili Maliya akulila na vala Vayawudi vayilongushili pamu vakulila, limkola lihingili mundima.

³⁴Pambeli kavadasha, “Mumuvika koti?” Vamuyangula, “Bambu, wisi loli.”

³⁵Yesu kalila na misosi pwaa.

³⁶Ila Vayawudi vadeta, “Mloli ndambu yamtamili!”

³⁷Vamu vawomba, “Nakaka! Ayu yamgolili yula ngalimesu aloli, aweshi ng'odu kumgola Lasalu akotoo kusova?”

³⁸Yesu yaveli na lusungu mundima yaki, kayenda kusembi. Sembi yeni yaveli mumbaku, yigubikiwa na ligonguveli.

³⁹Yesu kadeta, “Muliwushi ligonguveli ali!” Malita mhaja mundu na yula yasovili kamuwombela, “Bambu, ponopa akununga, kwanongwa kana majuva mchechi tangila asovi.”

⁴⁰Yesu kamuwombela, “Nenga ngakuwombilili du kucha pamuwujumila damuwuwoni ukomi wa Chapanga?”