San Juan 11:6-40

⁶gate benne̱' quebe chawe' zua Lázaro na', begá'ane̱' naga zue̱' xechupa zra.

⁷Ca gudé na' guzre̱' benne' ca' dxusé̱dene̱': ―Le chu'u naga nababa Judea xetú.

⁸Nadxa benne' ca' gulé̱'e̱ Le̱': ―Benne' Wese̱de, ná'asca benne' judío ca' zaj zre̱'e̱ na' gulaca lazre̱' xelútie̱' Lue' nen xiaj. ¿Dxaca lazru' chéaju' na' xetú?

⁹Jesús guzre̱' benne' ca': ―¿Quebe nun Dios dute̱ te zra gate dxelún bénneache zrin? Che nu benne' dxedé̱' te zra, quebe cheajchazie̱' lu da ste̱be lawe' da dxelé'ene̱' xel-la' naxaní' da nuzúa Dios lu xe̱zr la xu nigá.

¹⁰Che nu benne' dxedé̱' chizrela, dxechégüe̱' lawe' da quebe zúale̱ xel-la' naxaní' le̱'.

¹¹Ca gudé na' guzre Jesús benne' ca': ―Benne' ljwézredxu Lázaro ba dxásie̱'. Cha'a neda' cheajsebana' le̱'.

¹²Nadxa benne' ca' gulé̱'e̱ Jesús: ―Xran, che dxásie̱', wexaque̱'.

¹³Da nigá da gunná Jesús zéaje̱ na ba gute Lázaro. Benne' ca' dxusé̱dene̱' guléquene̱' gunná Jesús dxáseze̱'.

¹⁴Nadxa Jesús bzéajni'ine̱' benne' ca', gunné̱': ―Ba gútequeze Lázaro.

¹⁵Dxebeda' lawe' da quebe zua' na'. Caní gácadxa chawe' chee̱le le'e, chee̱ chéajle̱le chia'. Le chu'u cheajnnadxu Lázaro.

¹⁶Nadxa Tomás, bénnea' lé̱queze̱' bilide', guzre̱' xezícala benne' ca': ―Le chú'uqueze dxi'u chee̱ gátedxu tu zren nen Jesús.

¹⁷Gate belezrine̱' xe̱zre Betania, na' bene Jesús gudapa zra bulucache̱' Lázaro.

¹⁸Betania dxe' na gáguze naga dxe' Jerusalén, ca cadite sadxu tu chí'idau'ze zrindxu na',

¹⁹na' benne' zan benne' judío ca' xjaque̱' xeajlenné̱'e̱ Marta ne María, na' xulunézruje̱' le̱' xel-la' zren lazre' lawe' da gute bi zane̱'.

²⁰Gate ben Marta ba za' Jesús, na' guzé̱'e̱ zeajxrígale̱' Le̱', na' María begá'ane̱' xu'u.

²¹Marta guzre̱' Jesús: ―Xran, chela zu' nigá, quebe gute bi zana'.

²²Neda' nezda' Dios gunne̱' Lue' bítete̱ze da nabu'.

²³Jesús gunné̱': ―Webán bi zanu'.

²⁴Nadxa Marta guzre̱' Le̱': ―Nezda' webane̱' lu zra xelexebán benne' gate ca', zra bze̱be na'.

²⁵Nadxa gunná Jesús: ―Neda' naca' benne' dxusebáne̱' benne' gate ca', ne benne' dxunne̱' xel-la' nabán li lazre'. Nu benne' dxéajle̱'e̱ chia', lácala gatie̱', webane̱',

²⁶na' xúgute̱ benne' zaj naca bane̱', ne dxeléajle̱'e̱ chia', québequeze xelatie̱' tu chi'ize. ¿Dxéajle̱'u da nigá?

²⁷Marta guzre̱' Jesús: ―Awe', Xran. Neda' dxéajle̱'a nacu' Cristo, Zri'ine Dios, Bénnea' guche̱be lazre' Dios sel-le̱'.

²⁸Ca gudé gunná Marta da nigá, na' guxíaje̱' xeajzenne̱' bi bile̱' María, na' guzre̱' le̱' zrize: ―Ba bla' Benne' dxuse̱de, ne dxenné̱' lue'.

²⁹Ca ben María da nigá, na' guxase̱' guzé̱'e̱, xeajnné̱'e̱ Jesús.

³⁰Jesús quebe ne chu'e̱ xe̱zre na', na' zue̱' naga bezraga Marta Le̱'.

³¹Benne' judío ca' zaj zra' xu'u na' dxulunézruje̱' María xel-la' zren lazre', gate belelé'ene̱' guxasa María, ne chadí bdxúaje̱', na' xjácale̱ benne' caní le̱', dxeléquene̱' zéaje̱' dxu'a ba zeajchezre̱' na'.

³²Gate bzrin María naga zua Jesús, na' bzu zribe̱' zran ni'a Jesús, gunné̱': ―Xran, chela zu' nigá, quebe gute bi zana'.

³³Gate ble'e Jesús dxebezre María, ne cá'anqueze dxelebezre judío ca', benne' zjácale̱ne̱' María, na' bexíajele̱'e̱ne̱', ne guzúe̱' ste̱be lu lázrdawe̱'.

³⁴Na' bche̱be̱' benne' ca': ―¿Ga bcáchele bénnea'? Na' gulé̱'e̱ Le̱': ―Xran, gudá le'enu'.

³⁵Na' gudxezre Jesús.

³⁶Nadxa gulenná benne' judío ca': ―Le nna'xque cátite̱ nazrí'ine̱' le̱'.

³⁷Bal-la benne' ca' gulenné̱': ―Benne' nigá bexune̱' benne' la chul-la. La zue̱' nigá, ¿quebe guzéquene̱' ájala gune̱' chee̱ quebe gute Lázaro?

³⁸Jesús guzúe̱' ste̱be xetú, na' bzrine̱' dxu'a ba. Ba na' naca na tu bluaj, na' da' tu xiaj ta'a dxu'e na.

³⁹Gunná Jesús: ―Le xecá'a xiaj nigá. Marta, bi zan benne' gate na' guzre̱' Jesús: ―Xran, ba dxelá bénnea' tula, lawe' da ba guca tapa zra na'a gutie̱'.

⁴⁰Na' Jesús gunné̱': ―¿Quebe gucha' lue' che chéajle̱'u chia', walé'enu' xel-la' szren chee̱ Dios?