Johane 15

1

2

3

4

5

6

7

8

9

10

11

12

13

14

15

16

17

18

19

20

21

¹“No waiŋjâc fuŋqizecne jâmbâŋ, â Mamac‐nanezi waiŋ gie rune.

²Tieŋne moc norao foipiehuc fârinehec mi eme qâtâcne behec eocmu, â tieŋne moc fârinehec fome gie bacneme soka biaŋ eocte soŋaŋkeocmu.

³Ŋoŋe ine miti ŋazape manahuc biac ɋaɋackembiŋ juŋgopieŋ hâcne.

⁴Eme ŋoŋe no maŋnupie noni ŋoŋe iŋuc jaha maŋŋopapemu. Waiŋ tieŋnezi jâcnehec ʒuʒuhuc mi fohuc e jahackoaŋ sawa fârinehec mi eocmu. Eme ŋoŋe iŋuc jaha no mi maŋnuhuc wemocko fârinehec eniŋmu.

⁵Waiŋjâc fuŋqizecne no, tieŋ taeŋne ŋoŋe. Moc e no maŋnuhame noni e maŋkepemu, eme iŋucnezi fârine sâkohec eocmu. Ŋoŋe no tâmiric juhuc wiac eene i mi fokac.

⁶Moc e no mi maŋnume e behezo, eme waiŋ tieŋne behepie ɋaŋame qâzuckerâ behepie ʒocko ʒaekac, sâc ijaha ecnezo.

⁷Ŋoŋe no maŋnuhuc dâŋnane maŋkeniŋmu, eme wiac irec me irec numupie fua‐ŋareocmu.

⁸Ŋoŋe fârine sâkohec ehuc motec jâmbâŋfâc‐nane erâ jupie Mamac‐nanere mumuteŋ fuaocmu.

⁹“Mamaczi no maŋjauŋ enareekac, iŋuc jaha noni ŋoŋe maŋjauŋ eŋareekopac. Eme ŋoŋe nore maŋjauŋkoa junʒepieŋ.

¹⁰Micdâŋ‐nane reŋkehuc ine nore maŋjauŋko juniŋmu, no iŋuc jaha Mamac‐nanere micdâŋ reŋkehuc ere maŋjauŋko juekopac.

¹¹Nore bubiaŋzi ŋoŋerao fotâcneme ŋoŋerezi fufusuc foocte dâŋ ʒi ŋaza‐fârekopac. Erâ ŋoŋerao fohuc fua sawec ezejec.

¹²Micdâŋ‐nane kecʒiŋuc ŋazakopac: Noni maŋjauŋ eŋareekopac, iŋuc jaha ŋaŋaczia maŋjauŋ eec enʒepieŋ.

¹³Moc e âgofâcne jaŋere riŋ rohuc juju‐ticne qaisockeocmu, irec maŋjauŋ fekicne sâko muzo.

¹⁴Gie muŋareekopac i bapie honec‐ŋopape âgofâc‐nane eniŋmu.

¹⁵No dameŋ ʒi kiŋaŋ qaqa mocwâc mi muŋarekopac, mana‐ŋarepe âgofâc‐nane eŋgopieŋ. Kiŋaŋ qaqazi bomboŋ‐ticnere maŋko dâŋ foekac i mi manaekac. Noni ine Mamac‐naneraonec dâŋ manapo sâc mufuarâ ŋaza‐fârepore honec‐ŋopape âgofâc‐nane eŋgopieŋ.

¹⁶Ŋoŋe no mi rowosâecnumbiŋ, noni ŋoŋe rowosâec‐ŋopapo, erâ ra juhuc fârine bâfuaniŋte muŋarepo. Eme fârine bâfuapie fofonehec ezejec. Iŋuc erâ nore ʒâŋe bajuhuc Mamac numucnepie sâc ŋareocmu.

¹⁷Maŋjauŋ eec enʒepieŋ, micdâŋ ine hâcne ŋazakopac.

¹⁸“Miti tâmiriczi qaisoc‐ŋopapie ʒiŋuc munʒepieŋ: ‘Wofuŋ e mârâcko iŋuc hâcne fuŋkerâ qaisockembiŋ.’

¹⁹Miti tâmiric jaŋere guruo raʒipie muzac âgo eŋarenʒapiŋ. No ine jaŋere guruonec rowosâec‐ŋopape eebapa‐jeŋic râpeckembiŋte qaisoc‐ŋopaeŋgopieŋ.

²⁰No dâŋ moc kecʒiŋuc ŋazapo irec manasunʒepieŋ: Kiŋaŋ qaqazi bomboŋ‐ticnere sâc sirickerâ jujune mi fokac. Jaŋe no râsi enarembiŋko ŋoŋe râsi jaha eŋareniŋmu, jaŋe nore dâŋ mana maŋ embiŋko ŋoŋere dâŋ iŋuc jaha mana maŋ eniŋmu.

²¹Sorecnuwec e mi ʒâŋitaeŋgopieŋte nore erâ iŋuc hâcne eŋareniŋmu.

²²No jaŋerao mi waharâ fuŋne mi jazape muzac kiŋ tâmiric junʒapiŋ. Ʒi ine kiŋjeŋic wemocko murârâŋneniŋmu.

²³Moc e no qaisocnuekaczi Mamac‐nane iŋuc jaha qaisockeekac.

²⁴No ŋondeŋ‐ŋeŋicko mâsi sâko, ŋiczi mi bapane, i mi bazapo muzac kiŋ tâmiric junʒapiŋ. Ʒi ine bape hone‐fâre‐bipiehuc no qaisocnuhuc Mamac‐nane iŋuc jaha qaisockeeŋgopieŋ.

²⁵Iŋuc epie mitio dâŋ moc kecʒiŋuc fokac, i sanaŋkekac hâcne: ‘Jaŋe oma jâmbâŋ qaisocnumbiŋ.’

²⁶Neŋgoc ŋesiŋ, dâŋ fâri qizecnere Mâro hâcne, Mamactao jukac, e sorepe Mamactaonec waharâ fuŋne‐nane mutaniŋkeocmu.

²⁷Erâ ŋoŋe gie fuŋkepoonec nohec juwarembiŋte iŋuc jaha fuŋne‐nane mutaniŋkenʒepieŋ.