Jon 11:6-40

⁶Mewö malökmö, töndup kawölŋaŋgö buzupŋi möta miri malöhi, miaŋgöreŋök sömaŋ yahöt toroqeba malök.

⁷Mi mali nalö mi teköiga gwarekurupŋi yeŋgöra kewö jii mötket, “Nini mönö Judia prowinsnöŋ liliŋgöba anbin!”

⁸Mewö jiiga meleŋget, “Ketaŋamnini, Juda yeŋön uruwale kapaŋ köla kötnöŋ gila guhubingö mötket. Miaŋgöra kunbuk Judia liliŋgöba anmamgö jizani, mi qahö dop kölja.”

⁹Mewö meleŋgetka Jisösnöŋ keu kewö jiyök, “Wehöngö auaŋi 12 ahözei, kunŋan miaŋgö asakŋe köna anmawi, yaŋön mönö yuai kunŋan qem mizit qahö ak waŋgima. Gölmegö asakŋan asarim waŋgiiga ölöp eka anma.

¹⁰Ölöp anmapmö, kunŋan kiwaŋi qahö ahöm waŋgiiga suŋgem jipjap anmawi, yaŋön mönö qem mizit miwikŋaima.”

¹¹Keu mi jibagun kewö jii mötket, “Alanini Lazarusnöŋ gaunwat ahözapmö, nöŋön anda gaunöhök möndöbi wahötma.”

¹²Keu mi möta kewö jiget mörök, “Kembu, ölŋa gaun ahöza ewö, mönö ölöp ahöba ölöwakŋa.”

¹³Jisösnöŋ Lazarus kömuyöhaŋgö keu saiŋi jiyökmö, gwarek yeŋön ‘Gauna ahöza,’ jiyöhi, miaŋgö möt bibihiba keu könaŋi qahö möt kutuget.

¹⁴Qahö möt kutugeraŋgöra Jisösnöŋ aukŋeyök jim miwikŋaiba jiyök, “Lazarusnöŋ kömuyöha ahöza.

¹⁵Nöŋön yambuk qahö malbiga kömuyöhaŋgöra nöŋön anda mem gulibiga wahöri eketka mötnaripŋinan asuhum köhöima. Mewö aiga eŋgöra söŋgaiba ‘Simbawoŋ akŋe!’ jizal. Mönö wahötketka yaŋgöreŋ anin.”

¹⁶Mewö jim miwikŋaiiga Tomas qetŋi kun Siwisiwi qetkeri, yaŋön gwarek alaurupŋi yeŋgöra kewö jii mötket, “Nini ölöp mohotŋe miaŋgöreŋ anin. Andagun yambuk kömuin.” Mewö.

¹⁷Lazarusnöŋ kömumba wehön 4 lök qaksirinöŋ ahöi teköiga Jisösnöŋ kaŋgoriga buzupŋi mewö jiget mörök.

¹⁸Betani taon mi Jerusalem siti mosöta 3 kilomita anangö dop dowe ahöyök.

¹⁹Miaŋgöra Juda ambazip gwötpukŋan Marta Maria nenŋiri kömuyöhaŋgöra ‘Soŋgon etkekin,’ jiba kaba tatket.

²⁰Tatketka Martanöŋ “Jisös kaza,” jiget möta miri mosöta könanöŋ anda miwikŋaiyökmö, Marianöŋ mire tarök.

²¹Könanöŋ miwikŋaiba kewö jii mörök, “Kembu, gi kiaŋgöreŋ malbanak ewö, nenan mönö qahö kömumbawak.

²²Qahö kömumbawakmö, göŋön nalö kewöŋe mewöŋanök Anutugö yuai kungöra köuluköman ewö, mi pakpak ölöp miwikŋaim gihiiga asuhuma, mewö mötzal.”

²³Keu mi möta Jisösnöŋ jii mörök, “Göhö nengan mönö guliba wahötma.”

²⁴Mi möta Martanöŋ jiyök, “Gölmegö nalö teteköŋe kömukömuŋi yeŋön wahötmei, yaŋön mönö nalö ketaŋi miaŋgöreŋ guliba wahötmawi, mi möt yaközal.”

²⁵Mewö jiiga Jisösnöŋ jii mörök, “Kömupnöhök wahötwahötkö Toŋi mi nöŋön akzal. Nanak Malmal köhöikŋaŋgö Toŋi akzal. Miaŋgöra kunŋan ni möt narim niŋgizawi, yaŋön kömumapmö, töndup toroqeba mal köhöiba malma.

²⁶Kunŋan kun gölmenöŋ mala möt narim niŋgiza ewö, yaŋön mönö nalö kunöŋ qahö kömum köhöima. Qahö! Keu mi möt narizan me qahö?”

²⁷Martanöŋ keu mi möta jiyök, “O Kembu, mi möt narizal. Göŋön Anutugö Nahönŋi akzan. Amötqeqe Toŋi Kraist gölmenöŋ asuhumapkö jigeri, göŋön mönö mia akzan. Mewö möt narizal.” Mewö.

²⁸Martanöŋ keu mewö jiba miriŋe liliŋgöba anda munŋi Mariagöra keu ölöŋ jiiga göraŋe kaiga jiyök, “Böhinöŋ kaba könanöŋ kinda göhöra endu anda ekŋangöra jiza.”

²⁹Mewö jiiga Marianöŋ keu mi möta miaŋgöreŋök i mosöta Jisösgöreŋ anök.

³⁰Anökmö, Jisösnöŋ miri sombemnöŋ qahö kaŋgoriga endu Martanöŋ köna namŋe miwikŋaiba ehöhi, miaŋgöreŋök kinök.

³¹Juda ambazip yeŋön Mariabuk miri uruŋe uru qesawölökö tatketka Marianöŋ zilaŋ wahöta gumnöŋ eta aniga eka kewö mötmöriba jiget, “Yaŋön mönö qaksirinöŋ anda sahötma.” Mewö jiba yaŋgö andöŋe wuataŋgöba anget.

³²Marianöŋ anda Jisös kinöhaŋgöreŋ aŋgota eka könaŋe sipköba eta kewö jii mörök, “O Kembu, göŋön ki malbanak ewö, nenan mönö qahö kömumbawak.”

³³Mewö jiba silata qeta sahöriga Juda ambazip yambuk kaba naŋgöba mohotŋe sahötkeri, Jisösnöŋ mi eka wösöŋi pölpölgöiga jeŋi asöliiga köna böröŋi jönömŋambuk unduyök.

³⁴Jönömŋambuk undui qesim eŋgiyök, “I denike alget ahöza?” Qesim eŋgiiga jiget mörök, “Kembu, kewö kaba eknöŋ!”

³⁵Mewö jigetka Jisösnöŋ sahörök.

³⁶Sahöriga Juda ambazip yeŋön eka jiget, “Yei! Mönö alaŋaŋgöra önöŋi qahö ak waŋgii malök.”

³⁷Mewö jigetmö, tosatŋan keu mi qeba kewö jiget, “Jegömöl ambazip jeŋini metohoba malök ewö, mönö ölöp Lazarus jiiga qahö kömumbawak me?” Mewö.

³⁸Mewö laŋ jigetka Jisösgö wösöŋi kunbuk pölpölgöiga jeŋi asöliiga qaksirinöŋ anök. Qaksirinöŋ anda yuai kewö ehök: Köt köteŋ urorohoba qamötŋi miaŋgö uruŋe ala naŋguŋi köt ketaŋan köl közipkögetka tarök.

³⁹Mi eka kewö jiyök, “Mönö köt qililiŋgögetka anök.” Mewö jiiga azi kömuyöhaŋgö nenŋi Marta yaŋön kewö jii mörök, “O Kembuni, sömaŋ 4 ahözawaŋgöra lök wörönŋambuk akza.”

⁴⁰Jisösnöŋ mi möta Martagöra kewö jiyök, “Gi möt narim niŋgibanak ewö, Anutugö kukösumŋan aködamunŋambuk asuhuiga ekanak. Mutuk keu mewö jibiga mötnöŋ me qahö?”