John 11:6-40

⁶Jesus apmer ikwerel arteny anenh-antey, arlta atherrel alhey-angenh.

⁷Ikwer-penh ra kwertengerl ikwerenh-rnem-warl angkek-anem, “Apmer Judea-ampeny-warl anwantherr alpetyek.”

⁸Kwertengerl-rnem apatemel angkek, “Akalty-anthenh-anthenhay! Lyert arwa Jew-rnemel ngenh apwertel ipmek wetyek-anek. Nga ikwer-rnem-warl angkep arrpemarl alpey-angenh!”

⁹Jesus-el tyernek, “Awaretyel ayeng alhetyek, arlta ikwerel. Ranem angkanem ilek ikwer-rnem. Artwa ingwerenty itwernekarl apek alheyel, ra nthakenh aytney-angenh. Ra aketh areyel ingkenyelarl arrtyerneyel-angkwarr.

¹⁰Atwemengkel apek alhem, rap aytnemarl, nthakenh arey-angenharl. Awaretyel ra alheyel itwernewarl. Awaretyel ayeng alhey arrpemarl.”

¹¹Ikwer-penh Jesus angkek, “Lazarus ra ankwaynteyel, awaretyel ayeng ikwer-warl alhey, renh akemelhiletyek.”

¹²Kwertengerlel-rnem tyernek, “Ingkartay! Ra apek ankwaynteyel, ra amentel akemirreyenh.”

¹³Jesus ra iterl-arek, Lazarus rarl kel ilwek, ipma ayntenh. Kwertengerl-rnem rernem iterrenh Lazarus ankwaynterl-anenty-arrpantey.

¹⁴Jesus-el renh-rnem aketh-anem ilek, “Lazarus kel ilwek.

¹⁵Mwerr ayeng ikwer-warl alhey-angenh-antey, arrantherr ayenh iterl-arayntetyek-anem. Mpa, kel anwantherr alhey ikwer-warl.”

¹⁶Thomas, itna ingweran Atyew, ra kwertengerl ingwer-rnem-warl angkek, “Alhey anwantherr Jesus-angkwarr, anwantherrap ikwer-itwel ilwetyek.”

¹⁷Jesus ra tawen Bethany-warl alhek. Apmer-arenyel-rnem ikwer iley-ayntek, artwa Lazarus-arl arrewaly kel awenngel ayntek arlta 4-pelel.

¹⁸Bethany ra Jerusalem-they arrer-antey, 3 kilometre apek.

¹⁹Jew akngerr akarrirrek Mary Martha ikwer-atherr-warl Jerusalem-they, renh-atherr arternpiletyek.

²⁰Martha-el awek, Jesus rarl apetyenh. Mary apmerel arteny anenh. Martha Jesus ikwer-warl arnekirrek,

²¹rap angkek, “Ingkartay! Nga ngwangk-antey apey-alhemer, ayteyaty atyenh itetharl anemer!

²²Aleyan atha ngenhant tnakeyel, Akngey ntwa ayernenty, ra kel ngkweng awelhem.”

²³Jesus ikwer-warl angkek, “Ayteyengkw ngkwenh itethirreyenh arrpemarl.”

²⁴Martha-el renh tyernek, “Ayeng akalty, ra iteth akemirreyenh arlta ingkernel.”

²⁵Jesus ikwer-warl angkek, “Ayengarl ran ipmepenh itetheley-angkeran. Ingwerel ayenh tnakenty, ra intem-antey iteth aneyenh.

²⁶Ra ayenh tnakenty, ra intem-antey ilwey-angenh, iteth aneyenh. Ntwa ayenh tnakeyel?”

²⁷Martha angkek, “Ya Ingkartay! Atha ngenh tnakem, ngan Akngey-kenh alerikw Christ-arl, renhey-antey Akngeyel ra arrwekeleny-rnem ilek ahern-areny-rnem-warl thwenetyek, renh-rnem ingkerrenh itethiletyek.”

²⁸Alakenh-anyem angkek-penh ra Mary-warl angkey-alpek, “Akalty-anthey-angker kel ra apetyek, ra ngkweng-anem yangkelhek.”

²⁹Mary ra anamerl-antey akemirrerl-alhek, ikwer-warl alhek.

³⁰Jesus ra tawen-warl alhey-angenh-antey, ra akwerrel-antey anek.

³¹Akngerr akarrirrek ikwer-atherr-warl arternpiletyek. Rernem Mary renh arek, rarl anamerl-antey warl-they tyerrelhenhek aketh-warl, awenng-warl alhenty-arrpantey. Rernem renh apentenh,

³²Mary Jesus-warl apetyek, ampwethel-atherr arrernelhemel. Ra renh ilek, “Ingkartay! Nga awank-antey nhenh-warl apey-alhemer, ayteyaty atyenh iteth-anteyarl anemer.”

³³Jesus-el arek, rarl artnenh, Jew ingwer-rnem artnenh arrpemarl. Ranem amperrngirrek ikwer-rnem.

³⁴Ra renh-rnem ayernek, “Nthenh-warl arrantherr arrewaly renh irrtyert-akwernek?” Rernem renh ilek, “Ingkartay apetya, intwaretyek.”

³⁵Jesus-anem artnek.

³⁶Jew-rnem angkerrek, “Ran Lazarus-ek artewentyel ilkelhek.”

³⁷Ingwer-rnem alakenh angkerrenh, “Ra artwa aparrngantarl annga rlkelhilek awankan rlterrk ilkwakert, ran apetyey-angenh arrewaly yanh mwerriletyek!”

³⁸Jesus aleth-antey amperrngirrenh. Ra intey-warl alhek intwaretyek. Intey-itwek rernem apwert ilkwa arriw arrngertewek Jesus-el arey-alhek.

³⁹Jesus-el renh-rnem ilek, “Apwert ilkwa yanh arnangelhilenherr-arey arriw-they.” Martha angkek, “Ingkartay! Arrewaly ayntek arlta 4-ek-atwety, aley-anem ra arrewaly inteng-anem inteyel.”

⁴⁰Jesus angkek, “Atha ngenh kel ilek, ntwa ayenh tnakenty, ntwap areyenh, Akngey rlterrk ilkwakert inngarl aneyel!”