Jon 11:6-40

⁶Ning ka longor tari mang e Lasarus i kurah, i kes ulak pas naur a pukakiar ana hanua ning i kes ia.

⁷Lamur e Iesu i atai a kakak a asaerla mange, “Dalar ulak utumo na papar Judia.”

⁸Pa la atai i mange, “Tena Asaer, nating ka a Juda la mang sur lar wolot amat u, pa ne u mang sur ur ulak utumo?”

⁹E Iesu i keles la mange, “Ning a pukakiar i arlar ana ning a bonot pa pisir naur a matana kamis, gepi? Ning tik ir taltal ana kamis bel ir buh a hana, anasa i tai ana talapor ana rakrakan hanua.

¹⁰Ika ning tik ir taltal ana morom ir loloko, anasa bel ta talapor.”

¹¹Lamur i atongi otleng mange, “A halindala e Lasarus ka borbor duman, pa ar han sur ar amata pasi.”

¹²A kakak a asaer la kelesi mange, “Leklek, ning i borbor duman ka, ir langolango ulak ka.”

¹³E Iesu i warwara ana minat e Lasarus, ika a kakak a asaer la nuki mang e Lasarus i borbor duman ka.

¹⁴Pa e Iesu i atai talapor la mange, “E Lasarus ka mat.

¹⁵Pa iau, a gas ning bel a kes tumo, sur mulor tortorot. Pa dalar han teteki.”

¹⁶E Tomas, ning di atongi otleng mang a Kasang, i atai a kakak a asaerla mange, “Dalar han taum sur dala otleng dalar mat taum onoi.”

¹⁷Ning e Iesu i hanot, i longori mang di ka akas tar a minat e Lasarus ana kulam a minat, ka diat a pukakiar alari.

¹⁸E Betani i milau ka e Jerusalem, i arlar ka ana natola kilomita,

¹⁹pa galis a Juda la hanot tetek e Mata pa e Maria sur lar kes amahat diau ana tasindiau ning i mat.

²⁰Ning e Mata i longori mang e Iesu kaning ma ot, i purum sur ir han barati, ika e Maria i kes ka ting narumai.

²¹E Mata i atai e Iesu mange, “Leklek, ngandek ning ur kes ot te, a tasiklik bel ir mat.

²²Ika a tasmani mang, ning ur nunung e God sur ta utna onone, ir sarani ka tam.”

²³E Iesu i atai i mange, “A tasimlik ir laun ulak ka.”

²⁴E Mata i kelesi mange, “A tasmani mang ir laun ulak ana ararop a pukakiar.”

²⁵E Iesu i atai i mange, “Iau a lalaun ulak kusun a minat, pa iau a lalaun momol. Esining i tortorot hok, ning ir mat, ir laun ulak,

²⁶pa esining i laun pa i tortorot hok, bel ir mat. U tortorot ot ana warwara ne?”

²⁷E Mata i kelesi mange, “Leklek, i momol. A tortorot mang u a Karisito, a Nat e God, ning i sune u ute na rakrakan hanua.”

²⁸Lamur ning e Mata ka atong tari larne, i ulak pa i kabah kumnan pas e tasna hane e Maria, pa i atai i mange, “A Tena Asaer ka hanot pa i deke sur u.”

²⁹Ning e Maria i longori, i purum kapit pa i han teteki.

³⁰E Iesu belot i hanot ting na hanua, i kaning ot ana pukna ning e Mata i pastetek tari ia.

³¹A Judala ning la kes taum o e Maria ting narumai sur lar kes amahati, la oroi mang i purum kapit kusun la utumo lapiu, pa la muri. Anasa la nuki mang ir han sur a kulam a minat sur ir domos.

³²Ning e Maria i hanot ana pukna ning e Iesu i kes ia, i oroi teteki, i kes ana bokona hana salanigo tana, pa i atongi mange, “Leklek, ngandek ning ur kes tar ot te, a tasiklik bel ir mat.”

³³Ning e Iesu i oroi e Maria taum ana Judala ning la han taum ono la domos, a tnan puka marmaris i hanot ting na inguna pa i bal maris.

³⁴E Iesu i deken la mange, “Mulo suah a minatna taha?” La kelesi mange, “Leklek, han ute sur ur oroi i.”

³⁵Pa e Iesu i domos.

³⁶A Juda la atongi mange, “Mulo oroi, i katnan koli!”

³⁷Ika dingla onla, la mang, “I apalpalas pas a matana kutla, pa i mangasa ning bel i alangolango pas a barsan ne, sur gong i mat?”

³⁸E Iesu i bal maris kol, ning i hanot ting na kulam a minat. A kulam a minat ning di suah alari ana tnan hat.

³⁹E Iesu i atai la mange, “Mulor lakir sen a hat.” Pa e Mata, a tas a barsan ning i mat, i kelesi mange, “Leklek, kar goh, anasa ka diat a pukakiar alari!”

⁴⁰E Iesu i atongi mange, “Mangasa, bel a atai nigon tar u mang, ning ur tortorot, ur oroi a matatar ane God?”