João 11:6-40

⁶Henneme ig ka atak gutkis nikwenéwatma. Ig timá kiyapwiye Lázaru gak ku ig kakahrip, ig msakwa gidukwenewa ayge adahan pina hawkri akiw.

⁷Ayteke ig awna ta wothu usuh gikannuhnipwi: ―Uyay atak ta gipinwat Lázaru ayhtéhan Judeyamnaw.

⁸Usuhme awna git: ―Kiyapwiye, mmahki pis atere akiw? Nerras uwewkistenwiy ayge kuhwekwa igkis aharit pipedkepten.

⁹Igme kaytwa wownhu: ―Ka sam. Igkis ka hiyá nusamanak. Kote danuhte ahawkanaprik adahan nah pisenwa nukehni Uhokri gannipwi. Nighu ikí nuthu hawkri adahan nah keh gibetki amadga inin hawwata ku samah ig ikí hawkri arit kamuw adahan igme uguhne hawkri mataytak adahan madikawku ler akak pina arawna (12). Ku aysaw ig pisenwa gannipwi metakwa ig pituk. Hawwata akiw ku samah ig kamuw uguh wahina hawwata Uhokri uguh nuhiyakemni adahan nah ka taraksa. Ku pariye hiyeg wew puwipwak, ig ka tuguh mmanawa kamuw abutni uguh gahina.

¹⁰Henneme ku pariye hiyeg wew tiyegim, ig tuguhe mmanawa yuma kabutniki adahan uguhne gahina. Nahme uguhka nuhiyakemni adahan nah kehnenekwa gibetki.

¹¹Pisenwa inakni giwn ig awna wothu: ―Ukagmadawiy Lázaru kuwis himeke. Henneme nah atere iwasapri adahan nah giwadsetni.

¹²Usuh timapni henne, usuh awna git: ―Kiyapwiye, mmahki pis ta giwadsepten? Kabay ig himak adahan ig makniw.

¹³Henneme ig Kiyapwiye Jesus awna gimin kiyapwiye Lázaru gimiremni. Usuhme upewkan ig awna amin ku ig mayekne.

¹⁴Ig hiyapni henne, ig awna wothu huwewe. Giwn: ―Lázarumni miyapi.

¹⁵Kibeynekata nah ka aygenama ku samah ig kakahrip. Aysawnemenek yis pi kamaxwate nupitit akiw awaku ini. Henneme uyay atere git kuri.

¹⁶Kiyapwiye Tomé timapni henne, ig awna ta wothu usuh giyakipwi Kiyapwiye Jesus gikannuhnipwi, ig ku pariye usuh kanumri Abes. Ig awna: ―Uyay atak gihapti adahan wixwiy umahkiswe peyeke gikak. ―Uyay. Usuh tipik atere.

¹⁷Ig Kiyapwiye Jesus danuh atere ewka giwen kiyapwiye Lázaru. Ig ayipa apuhpika paxnika hawkri gaw.

¹⁸Ini paytwempu Betâniya in kennesa arimkat Jerusalém. Mpana kilomet ta arimkanit.

¹⁹Inneki keh kaayhsima judeyenepwi giwewkistenkis jerusalémyenepwi atere gutkis kiyapuno Marta gukak kiyapuno Mahi. Igkis atere adahan gaydhetnikis adahan egkis ka kadni giharit gegnikis mpiynepepyema.

²⁰Eg kiyapuno Marta kinetni Kiyapwiye Jesus gak ku ig nemnik. Eg timapni henne, eg pes gitiput eg patiptakig atere apigku ahin. Egme kiyapuno Mahi msekwe paytrik.

²¹Eg kiyapuno Marta patiptaka Kiyapwiye Jesus atere, eg awna git: ―Kiyapwiye, waké pis aybe amakohnokwabe, negni ka miyakam.

²²Henneme nah ndukwenewa kamaxwa pipitit. Nah hiyakni ku Uhokri ikí pit madikte ku pariye payapni git.

²³Igme awna gut: ―Pegni kannikaw akiwnek.

²⁴Egme kaytwa giwn: ―Nah hiyak ku ig kannikaw akiwnek amaksemni hawkri ku aysaw madikte miyarapyenpu kannikaw.

²⁵Igme awna gut: ―Nahnewa kannikasene hiyeg. Nahnewa keh igkis aymuhwa. Ku pahapwi kamaxwepye nupitit, hiyawa ig miyá henneme ig aymuhwanek gimun Uhokri adahan apanenekwa.

²⁶Ku pahapwi kadeheten, ku ig kamaxwepye nupitit, iggi ka miyati. Ba pis iha inakni nuwnhu?

²⁷Egme kiyapuno Marta kaytwa giwn: ―Ihi, Kiyapwiye. Nah iha ku pis Cristo, pis Uhokri gikanyan adahan ukumaduketni. Pis Uhokri gikamkayh ku pariye danuhne atan amadgat inin.

²⁸Pisenwa inakni gunetnikis eg kiyapuno Marta tipik diyuhe ta gut gusamru kiyapuno Mahi. Eg danuh atere, eg humakru monye. Eg awna gut: ―Mim. Ukannuhten kuwis danuh. Ig muwaka pis atak git.

²⁹Eg kiyapuno Mahi timapni henne, eg kannikew kibentenwa. Eg tipikwiyo ta gimkat Kiyapwiye Jesus.

³⁰Igme Kiyapwiye Jesus kote apitma paytwempu. Ig gidukwenewa ku kiney kiyapuno Marta patiptakig.

³¹Nerras judeyenepwi giwewkistenkis ku pariye ayge paytrik adahan gaydhetnikis igkis hiyapni henne ku kiyapuno Mahi kannikaw kibentenwa eg tipik, igkis makeke guhapu butte. Gitkis eg ta arit kiyapwiye Lázaru gimew adahan eg tihano giharit.

³²Egme kiyapuno Mahi danuh atere git Kiyapwiye Jesus. Eg hiyapri, eg paberetusaw gikimpuit. Eg awna git: ―Kiyapwiye, waké pis aybe amakonohkwabe, negni ka miyakam.

³³Eg tihano. Nerras guhaptiyepwi judeyenepwi giwewkistenkis igkis hawwata tihenes. Ig Kiyapwiye Jesus hiyapni henne, ig katiw apit giyakni. Ig kahhekanaw.

³⁴Ig awna: ―Kineypa yis sarayhpig? Igkisme kaytwa giwn: ―Kiyapwiye, ba ayta iwasapri. Ayhté ig.

³⁵Ig Kiyapwiye Jesus hiyapni henne, ig suke gikantak.

³⁶Nerras judeyenepwi giwewkistenkis hiyapni henne, igkis awna: ―Ipegnamwi ku samah ig batek gikak.

³⁷Igkisme gaytakkis awna: ―Ignewa ku pariye keh pahapwi motpiye hiyap. Mmah nikwe ig ka mpitha amekenemni Lázarumni ariw miyaka?

³⁸Ayteke nikwe igkis danuh atere arit kiyapwiye Lázaru gimew. Ayge ig Kiyapwiye Jesus kahhekanaw akiw. Ig kiyapwiye Lázaru gimew agiku tip amiyokni. Asabwatip egwata tip.

³⁹Ayteke nikwe ig Kiyapwiye Jesus hiyapni henne, ig awna ta gitkis hiyeg: ―Wokanabay asabwat. Eg kiyapuno Marta ner miyapye gisamru eg timapni henne, eg awna git: ―Kiyapwiye, ka ba wokisni. Ig negni gipit kuwis busip. Mmanawa paxnika hawkri gaw kuwis ig ayge agiku gimew.

⁴⁰Igme awna gut: ―Ka ba pis timá ku samah nah kuwis awna pit: “Ku pis kamaxwa nupitit, Uhokri hiyapkis gikiythani pit”?