João 11:6-40

⁶Razaru kure pyra exiry poko turuse tahtao moroto ro tõmehse Jezu. Asakoro kynẽmehne moroto, teh rokene.

⁷Moromeĩpo ynara tykase ynororo typoetory tomo a, —Ehmaropa Jutea rãnaka Petania pona ropa, tykase Jezu typoetory tomo a.

⁸—Arypyra, pake hkopyra oetapary se nexiase morotõkomo, juteu tõ esamo. Ytopyra exiko morotona, tykase toh repe.

⁹Ynara tykase Jezu eya xine, —Ritonõpo omipona kuahtao xine, “Epo,” kara ro Ritonõpo ahtao orihpyra sytatose. Mãpyra, “Epo,” tykase Ritonõpo ahtao orihnõko sytatose. Morara exiryke ehmaropa jetapatohpo pyra ro mana.

¹⁰Xinukutumae sã oytorykohtao osetapãko matose saereme pyra exiryke, tozure pyra oexirykõke, tykase Jezu.

¹¹Morarame ynara tykase ropa ynororo typoetory tomo a, —Kuepekõ mã nyhnõko Razaru. Yrome ẽpakase ropa ytõko ase, tykase Jezu eya xine.

¹²Ynara tykase ipoetory tõ eya, —Inykyryhtao kure. Ekurãkãko ropa mana, tykase ipoetory tomo Jezu a.

¹³Yrome Razaru orihtoh poko tõturuse Jezu repe. Yrome tynyhse rokẽ tokarose ipoetory tomo a.

¹⁴Morara exiryke typoetory tomo a ynara tykase ynororo, —Razaru toorihse mana.

¹⁵Enese ytopyra exiase aporo. Yrome seromaroro enese ytõko ase rahkene. Seromaroro roropa Ritonõpo jamitunuru enẽko matose jenetupuhtohme yronymyryme oya xine. Morara ahtao tãkye exĩko ase opoko xine. Ehmaropa, senetatose, tykase Jezu tymarõkomo a.

¹⁶Tome esety akorõ Kamaramanõpo wãtasemy. Ynara tykase ynororo imehnõ Jezu poetory tomo a, —Tuisa maro ehmaropa imaro kuorihtohkõme, tykase ynororo.

¹⁷Morarame morotona toeporehkase Jezu, Petania pona. Moroto asakoropane aorikyhpyry ẽmehtopõpyry waro toehse toto, tokarose exiryke imehnomo a.

¹⁸Atameke pyra Jerusarẽ kynexine Petania maro.

¹⁹Mame juteu tõ toytose tuhke, Maria tomo a, xitase, ipiry hnamose.

²⁰Morarame Jezu oepyry waro toexiryke, kỹtone Maata, ẽpatakãmase. Maria moroto rokẽ kynexine tytapyĩ tao.

²¹Ynara tykase Maata Jezu a, —Taro awahtao otarãme ypiry orihpyra exiry.

²²Yrome zuaro ase, ekaroporyhtao oya emero mã ekarõko Ritonõpo oya, tykase nohpo Jezu a.

²³—Opiry ẽsemãnõko ropa mana, tykase Jezu Maata a.

²⁴—Ỹ, zuaro ase. Aorihtyã ẽsemãkatoh ropa po ẽsemãkapõko ropa Ritonõpo mana, tykase Maata eya.

²⁵Ynara tykase Jezu eya, —Ywy ase ẽsemãkaponeme ropa. Ypoe rokẽ orihpỹme exĩko matose. Jenetuputyryhtao toorihse awahtao xine ro ẽsemãnõko ropa matose.

²⁶Jenetuputyryhtao orihpỹme exĩko matose jũme. Moro menetupuhno? tykase Jezu eya.

²⁷—Ỹ, enetupuhnõko ase. Omoro mase Ritonõpo nymenekahpyry ynakurãkaneme. Omoro mase ynaneraximahpyry. Ritonõpo nenehpohpyryme mase sero nono pona, tykase Maata Jezu a.

²⁸Morarame morara kaxĩpo kỹtone ropa Maata takorõ kohmase tokare pyra. —Tuisa kynako oya, tykase takorony a.

²⁹Morara kary etaryke tyya axĩ toytose ynororo Jezu enese.

³⁰(Pata pona eporehkara ro Jezu kynexine. Maata maro tõseporytopõpyrykõ poro kynexine.)

³¹Morarame xitase aytotoh rokẽ tokarose toto a, juteu tomo a. Morara exiryke Maria tokahmase eya xine. Mokaro Maria emuhkehkananomo, ixity akorehmananõ roropa.

³²Morarame Jezu a toytose tahtao kỹporohne imyhtokoxi xitase, —Taro awahtao ypiry orihpyra exiry, tykase eya.

³³Mokyro xitary eneryke tyya, samũ tykase Jezu tãtasamase tukurohtao. Juteu tõ xitary etaryke roropa tyya samũ tykase ynororo yronymyryme tukurohtao.

³⁴—Otoko monẽtohu? kynako Jezu kynekaropone. —Seze, kynako toto, nohpo marõkomo eya.

³⁵Tyxitase Jezu.

³⁶Morotõkõ ynara tykase, —Enẽko matose. Ipyno yronymyryme nexiase, tykase toto ipoko.

³⁷Yrome imehnõ ynara tykase, —Otãtome tonurãkara tukurãkase ropa eya? Oty katoh mose onukurãkara ropa kynako orihpyra ro ahtao? tykase toto ipoko.

³⁸Samũ tykase Jezu tãtasamase yronymyryme. Morarame toytose ynororo aorikyhpyry ekepyry esaka. Ypy onuhtoh po kynexine okepy eny. Apuru kynexine topu risemy.

³⁹—Apuru isyryhmatoko, kynako Jezu. Ynara tykase Maata, aorikyhpyry oryxiry, —Otarãme tymotase mana. Asakoropane nẽmehno moroto, tykase eya aoryxiry.

⁴⁰Ynara tykase Jezu eya, —“Enetuputyryhtao oya, Ritonõpo jamitunuru enẽko mase,” ykã puh oya, tykase Jezu eya.