YOHAAN 16

1

2

3

4

5

6

7

8

9

10

11

12

13

14

15

16

17

18

19

20

21

¹Aha/ okina ris to ’baar mo e um mo mmonon um ’peni mo jin minu kol um mo be.

²Uni mini ur um ka pije/ ’peni gu’b gi montul is mo. Ka jiŋ gana/, mo midi p̱u’du/ mo ki a’diyin jin midi ’kosh um mo tani midi ṯosh ki a’di mii to mmoluŋa a’diya luŋ goma Arumgimis mo.

³Dhali uni mini mii mii yansan haali/ uni ’koki misha Baba mo walla aha/ mo be.

⁴Hili aha/ okina to gwansan e um mo, ki mom buni mini p̱u’du/ mo tani um ki ka gwo e ki aha/ ṯorkina um uni mo be. Aha/ dinaki o gwo gwansan ’peni ka muŋ’kup̱ mo haali/ aha/ dikina nyaḵki um mo be.

⁵Hili shwane/ aha/ yana ya e a’di jin hashki aha/ mo. Hili jan ṯal ’deŋ kamu/ ’peni um diki doṯ aha/ gwo mo ki: /E yani ya mana mo?

⁶Hili haali/ aha/ ṯorkina um gwo gwansan mo tani bwan diṯi’d ’tu’dki uma dum bum mo be.

⁷Bahili aha/ ṯorkina um gwoŋ gana/ mo. A’di ta shi/ miim ’boro’d bum mo jin miga/ ya mo haali/ waḵki/ aha/ dinaki ya mo tani Amanmalas midi diki yayu/ i um mo. Hili waḵki/ aha/ yana mo tani aha/ mina hashki a’di i um mo be.

⁸Dhali ki a’di midi p̱u’du/ mo tani a’di midi pucur ’kwaniny’cesh ki gwo mo gom miinthus mo dhali gom mo ma ḵar/e mo dhali gom gwo jin minu dwall mo be.

⁹Gom gwo gi miinthus mo haali/ uni ’koki gam gwo is e aha/ mo be.

¹⁰Gom mii ma ḵar/e mo haali/ aha/ yana ya Ababa mo, dhali um mini ’koki p̱ar jis/em pem e mo be.

¹¹Gom gwon dwall mo haali/ tap̱a gi mony’cesh yansan a’di torkunu gwon dwall ’twa/a ’cesh mo be.

¹²Hili aha/ tana gi gwon tiya ka ris mmo/o um mo tani hili um mol uni bu’th shwane/ mo be.

¹³Ki Shi/in gi gwoŋ gana/ midi p̱u’du/ mo tani a’di midi shu um bway eya ris gwoŋ gana/ ’baar mo. Haali/ a’di midi diki ṯor gwo gi moshirr ki is piti mo. Hili ma to yin jin mina a’di ciḵ mo tani a’di mina a’di iṯor mo dhali a’di midi ṯor um eya tente/ to kun mini p̱u’du/ mo be.

¹⁴A’di midi kar aha/ ki ca mo haali/ a’di midi bu’th jim pem mo dhali ṯor um a’di eya tente/ mo be.

¹⁵Aris to ’baar mo kun ta ku ma Baba mo tani uni ta kum pem mo. A’di oka/ gwo mo wakan ki: A’di midi bu’th jim pem mo dhali ṯor um uni eya tente/ mo be.

¹⁶Shini naskina/ dhali um mini ’koki p̱ar aha/ e doḵ/e mo. Doḵ/e shini naskina/ dhali um mini p̱ar aha/ e mo be.

¹⁷Kun tiya ’peni imanciḵ a’di gwo oki gwo ka rem ’kup̱ mo ki: Gwonta okina a’di ana kan mo ki: Shini naskina/ dhali um mini ’koki p̱ar aha/ e mo dhali doḵ/e, shini naskina/ dhali um mini p̱ar aha/ e mo, dhali, haali/ aha/ yana iya Ababa mo?

¹⁸Uni oki gwo mo ki: ’Pemen gwo yansan wakata jin ona a’di ki: Shini naskina/. Aman ’konaki mish ’pemen gwo jin ona a’di mo.

¹⁹Yesus nyiṯẖki’d ki uni ona bwa ki doṯ a’di mo tani a’di ona a’di uni gwo mo ki: A/gom gwo yan a’di idoṯkina um gwo ki is bum mo jin oka/ ’pemen piti ki: Shini naskina/ mo dhali um mini ’koki p̱ar aha/ e mo, dhali doḵ/e, shini naskina/ mo dhali um mini p̱ar aha/ e mowa?

²⁰Ka jiŋ gana/, ka jiŋ gana/ aha/ ona um gwo mo ki: Um mini ko mo dhali ko ki kony jabu’th mo, hili ’kwaniny’cesh uni imina bwa i’kuny mo. Um a’di imina bwa idiṯadiṯ mo, hili bwan diṯi’d bum midi war ki moŋ’kuny bwa mo be.

²¹Ka ’bom shwan ma ’ci mo tani ayim diṯa bwa mo haali/ ayim p̱u’dki’di mom piti mo. Hili ka yim ki dhotha ’ci mo tani ayim yisa di’di moka gwo e mo goma nyor pitiya, gom bwaŋ ’kunyu’d mo ka ’ci dho’thkunu mo e mony’cesh mo be.

²²Wakan um diṯkina bwa shwane/ mo, hili aha/ mina p̱ar um e doḵ/e mo dhali adum bum minu ’tu’d ki moŋ’kuny bwa mo dhali wathin ṯal ’deŋ kamu/ yisa di’da jin midi bu’th moŋ’kuny bwa yan ’peni um mo be.

²³Dhali ka tee c̱aan mo tani um mini ’koki doṯ aha/ gwondoṯa kamu/ mo. Ka jiŋ gana/, ka jiŋ gana/ aha/ ona um gwo mo ki: Waḵki/ um mini doṯ toŋ kamu/ ’pena Baba mo tani a’di midi c̱iki um uni ki gway pem mo be.

²⁴Ntagi shwanesan mo tani um ’koki doṯ toŋ kamu/ ki gway pem mo. Doṯi mo ma dhali um mini bu’th to mo ki moŋ’kuny bwam bum minu ’tu’d mo be.

²⁵Aha/ okina gwo yansan e um ki jim poḵ mo. Mo midi p̱u’du/ mo ki aha/ mina diki doḵ/e ṯor um gwo ki jim poḵ mo, hili aha/ mina ṯor um gwo ka ji sho’k goma Baba mo be.

²⁶Dhali ka tee c̱aan mo tani um mini doṯ ki gway pem mo. Dhali aha/ dinaki o um gwo mo ki aha/ mina doṯ Ababa gom um mo.

²⁷Haali/ Ababa ki is piti enki um mo haali/ um enki aha/ mo dhali gamki gwo is ki aha/ p̱u’dkina ’pena Baba mo be.

²⁸Aha/ pikina ’pena Baba mo dhali aha/ p̱u’dkina i ’kwaniny’cesh mo be. Doḵ/e aha/ mura idhal ’kwaniny’cesh ’pen mo dhali ya Ababa mo be.

²⁹Imanciḵ a’di gwo o gwo mo ki: Ayy, shwane/ /e ṯorki gwo shoka ’cesh mo, yisa ki ari gwoŋ kamu/ jin poḵa /eya.

³⁰Shwane/ aman misha ki /e mishkina ris to ’baar mo dhali /e mini mii diki ta gi jan ṯal ’deŋ kamu/ mmodoṯ /e gwo mo. Gom ’kup̱ mii yan mo tani aman gamkina gwo is ki /e p̱u’dkin ’peni Arumgimis mo be.

³¹Yesus ki thoḵ uni gwo mo ki: A/gwo gama um is shwane/ mowa?

³²Mo midi p̱u’du/ mo. Ka jiŋ gana/ a’di p̱u’dki’d mo ki um minu c̱eker bwa mo, aris umi ’baar mo e gu’b bum ka ’deṯe/ ’deṯe/ mo dhali um mini dhal aha/, aha/ ’de/ mo. Hili aha/ dina aha/ ’de/ yisa, haali/ Ababa a’di nyaḵki di ki aha/ mo be.

³³Aha/ okina gwo yansan e um mo ki e aha/ mo tani um mini ta gi moŋḵu’th is mo. E mony’cesh yan mo tani um mini gam monṯo’c bwa mo, hili roc̱i shoka ’cesh ’te/ ma, haali/ aha/ p̱ikina mony’cesh yansan e ki mii mo be.