YOHAAN 1

1

2

3

4

5

6

7

8

9

10

11

12

13

14

15

16

17

18

19

20

21

¹Ka muŋ’kup̱ tani Gwo diki’d dhali Gwo di’d eya Arumgimis mo dhali Gwo ta’da Arumgimis mo be.

²A’di diki’d ’peni ka muŋ’kup̱ nyaḵka Arumgimis mo be.

³Aris to ’baar mo ’kokunu mo mmo/uḵ ki a’di mo dhali ton ṯal ’deŋ kamu/ yisa di’da jin uḵu ki dar gi a’di mo.

⁴E a’di mo tani mondiki/e diki’d mo dhali mondiki/e a’di ta moŋkush gi ’kwani mo be.

⁵Dhali moŋkush a’di ’twaḵki mondhurumi’d bwa mo dhali mondhurumi’d diki p̱i a’di e mo be.

⁶Wathi/ diki’d jin ṯu’ckin ma Arumgimis ki yaku/ mo, a’di jin yuḵu gway ka Yohaan mo be.

⁷A’di p̱u’dki’d mo gom gwo mmoṯor mo, mmoṯor gwo mo gom moŋkush mo, ka ris ’kwani ’baar mo mini gam gwo is e a’di mo be.

⁸A’di diki ta moŋkush ki is piti mo. Hili a’di p̱u’dki’d mo mmoṯor gwo gom moŋkush mo be.

⁹Dhali moŋkush gana/ a’di diki’d mmoyayu/ i ’kwaniny’cesh mo be, a’di jin ta moŋkush gana/ mmokusha ris ’kwaniny’ceshi ’baar mo ka ’deṯe/ ’deṯe/ mo be.

¹⁰A’di diki’d e mony’cesh mo dhali ’kwaniny’cesh uḵkunu ki a’di mo tani hili a’di ’kona ’kwaniny’cesh ki nyiṯẖ mo be.

¹¹A’di p̱u’dki’d e kum piti tani dhali ’kwanim piti ’koki bu’th a’di mo be.

¹²Hili aris uni ’baar mo kun bu’thki a’di kun gam gway piti is mo tani a’di c̱iki uni mom’bi’th mo mmowar ki uc̱i ma Arumgimis mo be.

¹³Uni gun dhodhu ’pena bas yisa, walla ’peni bwa gi buŋgwar is yisa, walla ’peni bwa wathi/ yisa, hili ’peni Arumgimis mo be.

¹⁴Dhali Gwo warki’d ki buŋgwar mo dhali shurki c̱a’b mo e bwam ana mo, ’tu’du/ ka ’the dhali ki gwoŋ gana/ mo. Ana mishkina cam piti mo, monyca gi Ya/ jin di’d ṯal ’de/ ’peni Com mo be.

¹⁵(Yohaan a’di ṯorki gwo gom a’di mo dhali cuu gwo mo ki: Wathi/ yansan a’di ta jin ṯorka/ um gwo mo ki: A’di jin midi p̱u’du/ i’ko’di aha/ mo tani a’di icaki’d ki aha/ mo haali/ a’di diki’di ṯwa/a/ ki aha/ mo be.)

¹⁶Dhali ’pena ’tu’d piti mo tani ana ’baar bu’thkina ’the mo mmomara ’the is mo be.

¹⁷Haali/ gwoŋḵan jin c̱inu mo tani a’di c̱ikunu ka Musa mo. Hili a’the dhali gwoŋ gana/ p̱u’dkin ’pena Yesus Ḵrisṯẖos mo be.

¹⁸Wathin ṯal ’deŋ kamu/ yisa di’da jin p̱arki’da Arumgimis e ki sule/ sule/ mo be, hili jasi Ya/m pitin ṯal ’de/ a’di jin diki’da bor gi com mo, a’di jin ṯorki a’di eya tente/ mo be.

¹⁹Dhali yansan ta gwo jin ṯor ma Yohaan mo ki ’Kwani Yahuuda/ hashki igasiis mo dhali ’Kwani Lawi ’peni Pa Urushaliim mo mmodoṯ a’di gwo mo ki: Ki /e tana ajaye?

²⁰A’di ki pi gwo mo. A’di diki ur gwo mo. Hili a’di piki gwo mo mmo/o gwo mo ki: Aha/ dinaki ta Ḵrisṯẖos mo be.

²¹Dhali uni ki doṯ a’di gwo mo ki: Ba /e tana ja sa/? /E tana Iliyya ’taa? A’di ki o gwo mo ki: Aha/ tana a’di yisa. Dhali uni ki o a’di gwo mo ki: I/e tana manc̱i gwo de? Dhali a’di ki thoḵ uni gwo mo ki: Yisa.

²²Dhali yan’ko’d uni ki o a’di gwo mo ki: Ba ki /e tana jaye? Dhalki aman mina mii tagi gwon thoḵ gom uni gun hashki aman mo. Ata ona /e gwo gom is pini kan mo sa/?

²³A’di ki o gwo mo ki: Aha/ tana ’twa/ wathin ṯal ’de/ mo mmocuu gwo mo e mombwaasho ki: Kari bway Tap̱a ka ji sho’k mo ma, me’d gwo jin okin ma manc̱i gwo ma Arumgimis kadhamo/ mo jin yuḵu gway ka Ishaya mo.

²⁴Dhali uni hashkunu mo ’peni ’Kwani P̱arisiyiin mo be.

²⁵Dhali uni doṯki a’di gwo mo ki: Katinta imiikina /e ’kwani ki yi’de/ mo waḵki/ /e diki ta aḴrisṯẖos mo walla Iliyya mo walla amanc̱i gwo mo?

²⁶Dhala Yohaan ki thoḵ uni gwo mo ki: Aha/ miikina mii jin miikunu ki yi’de/ mo tani hili wathi/ doshki’di bwam um mo jin molkina um mo be.

²⁷Isi a’diyini jin midi yayu/ i’ko’di aha/ mo, dhali wac̱kana p̱p̱am piti mo tani aha/ dinaki ha me’d mo mmo’cuḵ uni mo be.

²⁸Mii yansan a’di bu’thki mo mo e Pam Beeṯaniya mo e bwamp̱o/ Yi’deŋ Ḵumma/ Uurdun mo e mo jin miikin ma Yohaana mii ki yi’de/ mo be.

²⁹Dhali ka cim jiŋ ’ko’d mo tani a’di p̱arki’da Yesus e mo mmoyayu/ ’kup̱ kadhoŋ mo i a’di mo dhali o gwo mo ki: Hili mo mo ma, Ari Ḵa’bal ma Arumgimis a’di jin midi ḵal miinthus gi ’kwaniny’cesh mo be.

³⁰Wathi/ yansan a’di ta a’di jin ṯorka/ um gwo mo ki: ’Ko’di aha/ tani wathi/ midi p̱u’du/ mo a’di jin caki’d ki aha/ nṯwa/a/ mo haali/ a’di diki’di ṯwa/a/ ki aha/ mo be.

³¹Aha/ ki is pem dinaki mish a’di mo. Hili gom mii yan mo tani aha/ p̱u’dkina mo mmomiiya mii jin miinu ki yi’de/ mo ki a’di minu ṯor eya tente/ e ’Kwani ma Israyiil mo be.

³²Dhala Yohaan ṯorki gwo mo mmo/o gwo mo ki: Aha/ p̱arkina Shi/in Dheleladhelel e mo mmothulu/ me’d gurko/ ’peni momis mo mmoc̱a’ba p̱o/ a’di mo be.

³³Aha/ ki is pem dinaki mish a’di mo. Hili a’di jin hashki aha/ mo mmomiiya mii jin miinu ki yi’de/ mo tani a’di o aha/ gwo mo ki: A’di jin mina /e p̱ar Shi/in e mmothulu/ mo dhali c̱a’ba p̱o/ a’di mo tani a’di ta a’di yansan jin mii’da mii jin miinu ki Shi/in Dheleladhelel mo be.

³⁴Dhali aha/ mishkina mo mo dhali ta aman/o gwo ki a’di yansan ita Ya/ ma Arumgimis mo be.

³⁵Dhali ka cim jiŋ ’ko’d mo tani aYohaan a’di doshki’d mo nyaḵki imanciḵ a’di gwo isu/ mo be.

³⁶Dhali a’di ki p̱ara Yesus e mo me’d jin yayina a’di mo dhali o gwo mo ki: Hili mo mo ma. A’di ta Ari Ḵa’bal ma Arumgimis mo be.

³⁷Dhali imanciḵ a’di gwo su/ ciḵki gwo mo mmo/ona a’di gwo yansan mo dhali uni baṯẖkina Yesus nsho’k mo be.

³⁸Yesus ki ṯuka bor mo dhali p̱ar uni e mo mmobaṯẖkina uni a’di nsho’k mo dhali o uni gwo mo ki: Atinta ŋap̱a um mo? Dhali uni ki thoḵ a’di gwo mo ki: Rabbi, (a’di jin ta ’pemen gwo jin onu ka Manṯor Gwo mo) ki /e dini mana mo?

³⁹A’di ki thoḵ uni gwo mo ki: Iiyu/ mo ma dhali p̱ar mo e mo. Uni p̱u’dkin mo dhali p̱ar mo e mo jin c̱a’bkina a’di mo dhali uni nyaḵki ’ko ki a’di ka tee c̱aan mo haali/ atente/ ta’da tente/ idoŋon mo be.

⁴⁰Jan ṯal ’de/ ’peni uni su/ jin ciḵ gwo ma Yohaan jin ṯora a’di mo dhali jin baṯẖ a’di nsho’k mo tani a’di ta’da Andaraawus mo, jin ta’da kam ma Simaan Buṯerus mo be.

⁴¹A’di gamki’da kam piti nṯwa/a/ mo jin ta’da Simaan mo dhali o a’di gwo mo ki: Aman gamkina aMasiyya (jin ta ’pemen gwo jin onu ka Ḵrisṯẖos mo be).

⁴²A’di suski’da kam piti eya Yesus mo dhala Yesus p̱arki a’di e mo dhali o a’di gwo mo ki: Hayyiye /e tana Simaan jin ta ya/ ma Yohaan mo. /E minu yuḵ gway ka Sap̱a mo (a’di jin ta ’pemen gwo ka Buṯerus mo).

⁴³Dhali ka cim jiŋ ’ko’d mo tani Yesus p̱u’da/ bwa ka pije/ mo mmoya Pany Jaliil mo. Dhali a’di gamki’da P̱ilibbus mo dhali o a’di gwo mo ki: Baṯẖi aha/ nsho’k mo ma.

⁴⁴Dhala P̱ilibbus a’di ta wathi/ gi Pam Beeṯsayda mo jin ta ’peŋkuman bampa/ ma Andaraawus dhala Buṯerus mo be.

⁴⁵Dhala P̱ilibbus a’di gamki’da Naṯẖana/iil mo dhali o a’di gwo mo ki: Aman gamkina wathi/ yin jin okin ma Musa mo e gwoŋḵan jin c̱inu mo dhali imanc̱i gwo ma Arumgimis kadhamo/ mo, uni si’da/ ’kwarki gwo mo goma Yesus gi Pa Naasira mo, a’di jin ta Ya/ ma Yuusup̱ mo.

⁴⁶Dhala Naṯẖana/iil ki thoḵ a’di gwo mo ki: A/mina tom ’boro’da kamu/ piyu/ mo ’peni Pa Naasira mowa? P̱ilibbus ki thoḵ a’di gwo mo ki: Yayu/ mo ma dhali p̱ar e mo.

⁴⁷Dhala Yesus mishki’da Naṯẖana/iil mo mmop̱u’du/ e a’di mo dhali o a’di gwo mo ki: Hili mo mo ma. Wathi/ ’peni ’Kwani ma Israyiil ka jiŋ gana/ jin dar ga maḵ mo.

⁴⁸Dhala Naṯẖana/iil ki thoḵ a’di gwo mo ki: /E mishi aha/ kata moye? Yesus ki thoḵ a’di gwo mo ki: Nṯwa/a/ ka P̱ilibbus diki yuḵ /e mo ki /e dina lamp̱u/ mo tani aha/ p̱arkina /e e mo be.

⁴⁹Dhala Naṯẖana/iil ki thoḵ a’di gwo mo ki: Rabbi, /e ta Ya/ ma Arumgimis mo. /E tana Maliḵ gi ’Kwani ma Israyiil mo be.

⁵⁰Dhala Yesus ki thoḵ a’di gwo mo ki: Haali/ gom gwo jin oka/ /e ki aha/ p̱arkina /e e eya lamp̱u/ mo tani a’di igama /e gwo is mowa? /E mini p̱ar dhan to kun caaca e mo mmobol gwansan e mo.

⁵¹Dhali a’di ki o a’di gwo mo ki: Ka jiŋ gana/ ka jiŋ gana/ aha/ ṯora /e gwo mo ki um mini p̱ar momis e mo mmodi ki ḵany mo, dhali iman’doyu gwo ma Arumgimis mo mmoseku/ mo dhali mmothulu/ mo ap̱o/ Ya/ gi ’Kwani mo be.