YOHAAN 3

1

2

3

4

5

6

7

8

9

10

11

12

13

14

15

16

17

18

19

20

21

¹Dhali wathiŋ kamu/ diki’d ’peni ’Kwani P̱arisiyiin jin yuḵkunu gway ka Nikudimus mo a’di jin ta tap̱a gi ’Kwani Yahuuda/ mo be.

²Wathi/ yansan p̱u’dki’da Yesus mon’thiny mo dhali o a’di gwo mo ki: Rabbi, aman misha ki /e tana Manṯor Gwo jin p̱u’dki’d ’peni Arumgimis mo. Haali/ jan ṯal ’deŋ kamu/ yisa di’da jin midi mish jamas mii gwansan mii mo kun miina /e mo, hili isi ciki/ Arumgimis midi nyaḵ di i a’di mo be.

³Yesus ki thoḵ a’di gwo mo ki: Ka jiŋ gana/, ka jiŋ gana/, aha/ ṯora /e gwo mo ki: Isi ciki/ waḵki/ jan ṯal ’deŋ kamu/ dinuki dho’th ki dho’th this ’peni momis mo tani a’di midi mol se Bampa/ ma Arumgimis mo be.

⁴Nikudimus ki thoḵ a’di gwo mo ki: Ki wathi/ jin ca’d minu mish dho’th kata mo? Mina a’di mish se bwaŋ kum doḵ/e ki a’di minu dho’th mowa?

⁵Yesus ki thoḵ a’di gwo mo ki: Ka jiŋ gana/, ka jiŋ gana/, aha/ ṯora /e gwo mo ki: Isi ciki/ waḵki/ jan ṯal ’deŋ kamu/ dinuki dho’th ’peni yi’de/ dhali ’peni Shi/in mo tani a’di midi mol cic̱ Bampa/ ma Arumgimis mo be.

⁶C̱aan jin dhodhu ’peni buŋgwar is mo tani ta buŋgwar is mo dhali c̱aan jin dhodhu ’peni Shi/in mo tani a’di ta shi/in mo be.

⁷Dhalku/ ki mer mo gom gwo jin oka/ /e mo ki: Um minu mii dho’th ki dho’th this ’peni momis mo.

⁸’Tham poshki’d ki bwam piti mo dhali /e ciḵki is jin gwona a’di mo, hili /e diki mish mo jin yayina a’di mo walla mo jin yakina a’di mo. A’di ta mondho’th gi wakan be jin dhodhuwa ris ’kwani ’baar mo ka ’deṯe/ ’deṯe/ kun dhodhu ki Shi/in mo be.

⁹Dhala Nikudimus ki thoḵ a’di gwo mo ki: Yan minu mish mii kataye?

¹⁰Dhala Yesus ki thoḵ a’di gwo mo ki: /E tana manṯor ’Kwani ma Israyiil gwo mo dhali /e din naskina/ mmodiki mish gwo yansan ’ban mowa?

¹¹Ka jiŋ gana/, ka jiŋ gana/, aha/ ṯora /e gwo mo ki: Haali/ aman ṯora gwo gi to jin misha aman mo dhali ṯor gwo gi to jin p̱ara aman e mo. Hili um ’koki bu’th gwo jin ṯora aman mo be.

¹²Waḵki/ aha/ ṯora um gwo gom to ga ’cesh mo dhali um ’koki gam gwo is mo tani ba um mini mish gwo gam is kata mo waḵki/ aha/ ṯora um gwo gom to gi momis mo?

¹³Wathin ṯal ’deŋ kamu/ yisa di’da jin seki momis mo, hili a’di jin thulki’d ’peni momis mo, a’di jin ta Ya/ gi ’Kwani mo, a’di jin diki’d e momis mo be.

¹⁴Dhali me’d jin ’de’k ma Musa tasha/ e mombwaasho mo tani wakan si’da/ Ya/ gi ’Kwani minu mii ’de’k mo be,

¹⁵ki a’diyin jin midi gam a’di gwo is mo tani midi ta gi mondiki/e ki sule/ sule/ ya ye ’ba/ mo be.

¹⁶Haali/ Arumgimis enki ’kwaniny’cesh kagahara tani a’di c̱ikina a’di Ya/m piti jin di’d ṯal ’de/ mo, ki a’diyin jin midi gam a’di gwo is mo tani midi ’taki diki this e mo hili midi ta gi mondiki/e ki sule/ sule/ ya ye ’ba/ mo.

¹⁷Haali/ Arumgimis hashki Ya/m piti i mony’cesh yansan yisa mmowaḵ ’kwaniny’cesh mo, hili ki ’kwaniny’cesh minu woṯẖ ki a’di mo be.

¹⁸A’diyin jin gam a’di gwo is mo tani yisa waḵuwa, hili a’diyin jin diki gam gwo is mo tani a’di waḵkunu hila/ mo be haali/ a’di diki gam gway gi Ya/ ma Arumgimis jin di’d ṯal ’de/ is mo.

¹⁹Dhali miiwaḵ a’dan be ki moŋkush p̱u’dki’d e ’kwaniny’cesh mo tani dhali ’kwaniny’cesh enki mondhurumi’d mo, mmodhal moŋkush e i is mo haali/ miim buni kun miikina uni mo tani ta thus ki thus mo be.

²⁰Haali/ aris uni ’baar mo kun miiki to kun ta thus ki thus mo tani shi/ki moŋkushi e mo dhali ’koki iiyu/ imoŋkush mo isi ciki/ ki miim buni minu ’taki be’d mo be.

²¹Hili a’di jin boṯki’d mmomii gwoŋ gana/ mo tani a’di p̱u’dki’d mo e moŋkush mo, ki a’di minu ṯor eya tente/ mo ki miim piti kun miikina a’di mo tani uni wagaskin ma Arumgimis mo be.

²²Dhali yan’ko’d ki mii yansan mo tani Yesus dhali imanciḵ a’di gwo uni iikin e Bampa/ Yahuudiyya mo, dhali nyaḵki c̱a’b ki uni imun mo dhali mmomiiya mii ki yi’de/ mo be.

²³Dhala Yohaan si’da/ a’di miiki’da mii ki yi’de/ e Pa Enuun jin ’dish Pa Saliim is mo haali/ yi’de/ caaca imun mo. Dhali ’kwani p̱u’dkin mo dhali ’kokunu mo mmomiiya mii ki yi’de/ mo be.

²⁴Haala Yohaan dinuki kara sijin naskina/ mo be.

²⁵Dhali gwo jin sugu mo cuki’d mo ibwaman imanciḵa Yohaan gwo mo dhali Wathi/ Yahuudaŋ kamu/ mo gom mii jin miinu mmolam to mo me’d mii gi gwoŋḵan jin c̱inu mo be.

²⁶Dhali uni p̱u’dkina Yohaan mo dhali o a’di gwo mo ki: Rabbi, a’di jin nyaḵki di ki /e e bwamp̱o/ Yi’deŋ Ḵumma/ Uurdun mo tani a’di jin ṯorkina /e gwo mo tani a’di a’dani, miiki’da mii jin miinu ki yi’de/ mo, dhali aris ’kwani ’baar mo iikini a’di mo be.

²⁷Yohaan ki thoḵ uni gwo mo ki: Wathin ṯal ’deŋ kamu/ yisa di’da jin midi bu’th toŋ kamu/ mo hili isi ciki/ a’di c̱ikunu a’di ’peni momis mo be.

²⁸Um ki is bum ta iman/o gwo gom aha/ mo, gwo jin oka/ um ki aha/ dinaki ta Ḵrisṯẖos mo, hili aha/ hashkunu nṯwa/a/ mo gom a’di mo be.

²⁹A’diyin jin ta gi nyaranyaŋa’b mo tani a’di ta wathinyaŋa’b mo, dhali amugu gi wathinyaŋa’b jin doshki’d mo dhali ciḵ a’di ’twa/ mo tani a’di ’kunya bwa ki ’kuny kagahara mo mmociḵ ’twa/ gi wathinyaŋa’b mo. Dhali wakan si’dayi a’di ’kunyka/ bwa ki ’kuny mo shwane/ jin ta bwaŋ ’kunyu’d pem mo.

³⁰A’di midi mii eḵa/ eḵ mo, hili aha/ mina mii wa she/ is kan mo be.

³¹A’di jin p̱u’dki’d ’peni momis kan mo tani a’di ta ji gi di’d ap̱o/ ’kwani ’baar mo. A’di jin yayi’d ’peni mony’cesh mo tani ta ji jin cil ma ’cesh mo dhali ki ’twany ’cesh mo tani a’di ki o gwo mo. A’di jin p̱u’dki’d ’peni Momis mo tani a’di ta ji gi di’d ap̱o/ ’kwani ’baar mo be.

³²A’di ṯorki gwo gom a’di jin p̱arkina a’di e mo dhali gwo jin ciḵkina a’di mo, dhali wathiŋ kamu/ yisa di’da naskina/ jin bu’thki gwo jin ṯora a’di mo be.

³³A’diyin jin bu’thki gwo jin ṯora a’di mo tani ’dap̱ka’d ki a’di yansan mo ka Arumgimis ta jiŋ gana/ mo be.

³⁴Haali/ a’di jin hashkin ma Arumgimis mo tani a’di ṯorki gwo ma Arumgimis mo haali/ a’di diki c̱i a’di Shi/in me’d jin baru to mo.

³⁵Haali/ a’di jin ta Com enki Ya/m piti mo dhali c̱iya ris to ’baar mo e me’d piti mo be.

³⁶A’diyin jin gamki gwo is e Ya/m piti mo tani a’di ta’d gi mondiki/e ki sule/ sule/ ya ye ’ba/ mo be. A’diyin jin diki ha gwo gi Ya/ e mo tani a’di midi diki p̱ar mondiki/e e mo, hili anyor ma Arumgimis c̱a’bki’d ap̱o/ a’di mo be.