YOHAAN 15

1

2

3

4

5

6

7

8

9

10

11

12

13

14

15

16

17

18

19

20

21

¹Aha/ tana cwalman gana/ mo dhali Ababam pem a’di ta’da manḵor mo be.

²Arisa bim pem kun daḵ dho’th mo tani uni ’ciṯẖa/ a’di mo mmo’do ka pije/ mo, dhali arisa bi kun dho’th maman mo tani a’di ki thoson mo dhali ’ciṯẖ mo ki uni mini dho’th maman ki nyanye/ mo be.

³Um dhelelkin mo hila/ ki gwo jin ṯorkika/ um mo be.

⁴’Koyi e aha/ mo ma dhali aha/ e um mo. Me’da biny cwa jin moli maman dho’th ki is piti mo isi ciki/ a’di midi mii di e cwalman mo, wakan um si’da/ isi ciki/ um mini ’ko e aha/ mo be.

⁵Aha/ tana cwalman gana/ mo, dhali um a’di itana bi mo. A’diyin jin c̱a’bki’d e aha/ mo dhali aha/ e a’di mo tani a’di be jin dhothi maman kagahara mo, haali/ ki dar gi aha/ mo tani um moli toŋ kamu/ mii mo be.

⁶Waḵki/ wathi/ diki c̱a’b e aha/ mo tani a’di biṯu ka pije/ me’da biny cwa mo dhali a’di ki ḵu’th mo dhala binycwa tulkunu is mo mmoṯa’k i o’d mo, dhali o’d ki shwa mo be.

⁷Waḵki/ um ’kon e aha/ mo dhali gwom pem ’kon e um mo tani doṯi ma to yin jin ona bwa um mo dhali a’di minu mii gom um mo be.

⁸Ki ’kup̱ mii yan kan mo tani Ababam pem karkunu ki ca mo mmodho’thkina um maman kagahara mo, dhali wakan um ki nyo/ mii mo mmota imanciḵ aha/ gwo mo be.

⁹Me’d jin enkin ma Baba aha/ mo tani wakan si’da/ aha/ enkina um mo. ’Koyi e mo/en pem mo ma.

¹⁰Waḵki/ um dhu gwoŋḵan pem kun ’kwarkunu mo tani um mini ’ko e mo/en pem mo, me’d jin dhukika/ gwoŋḵan ma Babam pem mo kun ’kwarkunu mo dhali c̱a’b e mo/en piti mo be.

¹¹To gwansan ṯorkika/ um mo ki moŋ’kuny bwam pem midi di e um mo dhali ki bwaŋ ’kunygam bum minu ’tu’d mo be.

¹²Gwo yansan a’di ta gwoŋḵan pem jin ’kwarkunu mo ki um mini en ka rem ’kup̱ mo me’d jin enkika/ um mo be.

¹³Mo/en jin ca’da kamu/ yisa di’da e wathiny’cesha kamu/ jin wakansan mo jin mina wathi/ kar mondiki/em pitiya ’cesh gom ikam piti mo be.

¹⁴Um ta ikam pem mo waḵki/ um ki mii gwo kun ḵankika/ um mo be.

¹⁵Aha/ yisa dikina mmoyuḵ um ki c̱iŋkina/ haali/ c̱iŋkina/ diki mish to jin miina tap̱am piti mo be. Hili aha/ yuḵkina um ki ikam pem mo haali/ aris to kun ciḵkika/ ’pena Babam pem mo tani aha/ ṯorkina um uni eya tente/ mo be.

¹⁶Um ’koki kwany aha/ mo tani hili aha/ ikwanykina um mo dhali dhu um mo ki um mini ’taki ’ko mo dhali dho’th maman mo dhali ki maman bum mini ’taki ’ko mo. Wakan ki ma to yin jin mina um doṯa Baba ki gway pem mo tani a’di midi c̱iki um uni mo be.

¹⁷Gwo yansan ḵankika/ um mo ki um mini en ka rem ’kup̱ mo be.

¹⁸Waḵki/ ’kwaniny’cesh shi/i um i e mo tani um ki mish mo ki uni shi/ki aha/ i e nṯwa/a/ mo dhali uni mini shi/ um i e mo be.

¹⁹Waḵki/ um mini ’taki ta ku gi ’kwaniny’cesh mo tani ’kwaniny’cesh mini ’taki ena en gom kum buni mo, hili haali/ um ’koki ta ku gi ’kwaniny’cesh mo haali/ aha/ kwanykina um mo ’peni ’kwaniny’cesh mo tani a’di ishi/kina ’kwaniny’cesh umi e kan mo be.

²⁰Kayi gwo e jin ṯorka/ um mo ma ki c̱iŋkina/ yisa ica’d ki tap̱am pitiya. Waḵki/ uni ṯo’cki aha/ ’kus mo tani uni si’da/ mini ṯo’c um ’kus mo. Waḵki/ uni mini dhu gwom pem mo tani uni si’da/ mini dhu gwom bum mo be.

²¹Hili aris to gwansan mina uni mii mo gom gway pem mo haali/ uni ’koki mish a’di mo, a’di jin hashki aha/ mo be.

²²Waḵki/ aha/ mina ’taki diki p̱u’du/ mo dhali o uni gwo kan mo tani uni mini ’taki dar gi miinthus mo ba/. Hili shwane/ uni dar gi gwo mmoc̱i miinthus buni ’ko’d mo be.

²³A’diyin jin shi/ki aha/ i e mo tani shi/ki’da Babam pemi e si’da/ mo be.

²⁴Waḵki/ aha/ mina ’taki diki mii to ibwam uni, mii jin dina jan ṯal ’deŋ kamu/ ki mii mo tani uni mini ’taki dar gi miinthus mo. Hili shwane/ uni p̱arki mo e mo dhali shi/ aha/ i e mmonṯal ’de/ nyaḵka Ababam pem mo be.

²⁵A’di ta gwo jin minu thim moyi jin ’kwarkunu mo e gwoŋḵan buni jin c̱ikunu mo ki: Uni shi/ki aha/ i e ka ḵar ’kup̱ mo be.

²⁶Hili ka Manmalas midi p̱u’du/ mo a’di jin miga/ hashu/ i um ’pena Baba mo tani isi a’diyi jin ta Shi/in gi gwoŋ gana/ mo a’di jin piyi’d ’pena Baba mo, a’di midi ta Man/o gwo gom aha/ mo be.

²⁷Dhali um si’da/ mini ta iman/o gwo mo haali/ um nyaḵki ’ko ki aha/ ’peni ka muŋ’kup̱ mo be.