Juan 16

1

2

3

4

5

6

7

8

9

10

11

12

13

14

15

16

17

18

19

20

21

¹»Ximbꞌiꞌij kꞌu ronoje waꞌ chiwe chaꞌ na kasach ta ri kubꞌulibꞌal ikꞌuꞌx wukꞌ.

²Ma kopon ruqꞌijol echiriꞌ kixesax ne bꞌi riꞌix chupa taq ri sinagogas. Y china ri kakamisan iweꞌix, e chwa rire uchak ri Dios ri kuꞌano.

³E kakiꞌan waꞌ ma na ketaꞌam ta kꞌana uwach ri Nuqaw y na ketaꞌam tane nuwach riꞌin.

⁴Kambꞌiꞌij waꞌ chiwe, ma we xopon ruqꞌijol waꞌ, kꞌuna chikꞌuꞌx nubꞌiꞌim chi lo waꞌ chiwe. »Na ximbꞌiꞌij ta lo waꞌ chiwe chwi ri jeqebꞌal loq, ma kꞌa in kꞌo iwukꞌ.

⁵Noꞌj woꞌora kinꞌek chaꞌ kineꞌkꞌola rukꞌ ri taqayom lo we riꞌin, yey na jinta chi ne junoq chiwe kutzꞌonoj chwe pa kinꞌek wi.

⁶Yey ruma ne nubꞌiꞌim waꞌ chiwe, lik xok bꞌis chikꞌuꞌx.

⁷Pero qatzij wa kambꞌiꞌij chiwe: Lik utz chiwe riꞌix we kinꞌek. Ma we na kinꞌek taj, na kakꞌun ta iwukꞌ ri Toꞌbꞌel re kubꞌochiꞌij ikꞌuꞌx. Noꞌj we xinꞌek, kantaq lo chiwe.

⁸»Echiriꞌ kakꞌun ri Ruxlabꞌixel ri Dios, kuya na chi retaꞌmaxik chike ri winaq re ruwachulew china ri kꞌo umak, china ri lik jusukꞌ chwach ri Dios y china puwiꞌ kꞌo wi ri qꞌatbꞌal tzij re ri Dios.

⁹Kuqꞌalajisaj kꞌut china ri kꞌo umak: Waꞌ e ri na kakubꞌiꞌ ta ukꞌuꞌx wukꞌ riꞌin.

¹⁰Kuqꞌalajisaj china ri lik jusukꞌ, ma riꞌin kinꞌek rukꞌ ri Nuqaw yey riꞌix na kiwil ta chi nuwach.

¹¹Yey kuqꞌalajisaj, ri Dios uqꞌatom chi tzij puwi ritzel winaq kataqan che ruwachulew.

¹²»Lik kꞌo kuaj kambꞌiꞌij chiwe, pero na kambꞌiꞌij tana, ma woꞌora na kimaj ta usukꞌ.

¹³Noꞌj echiriꞌ kakꞌun ri Uxlabꞌixel re ri Qꞌijsaq, riꞌ kukꞌut chiwach riꞌix ronoje ri lik qatzij. Rire na xa ta pa re kachꞌaꞌtik, ma janipa ri kubꞌiꞌij e ubꞌiꞌim ri Dios che y jelaꞌ kuya chi retaꞌmaxik chiwe taq ri katajin loq.

¹⁴Ma e kuqꞌalajisaj janipa ri kuaj kambꞌiꞌij riꞌin chiwe, y jelaꞌ kunimarisaj nuqꞌij.

¹⁵Ronoje ri kꞌo rukꞌ ri Nuqaw, kꞌo wukꞌ riꞌin; e uwariꞌche ximbꞌiꞌij ri Ruxlabꞌixel e kuqꞌalajisaj janipa ri kuaj kambꞌiꞌij riꞌin chiwe.

¹⁶»Na naj ta chi kꞌu riꞌ kiwil nuwach, ma riꞌin kinꞌek chilaꞌ pa kꞌo wi ri Nuqaw; pero chiqawach apanoq kiꞌwila tanchi nuwach —xchaꞌ.

¹⁷Ekꞌuchiriꞌ, jujun chike rutijoꞌn jewaꞌ xkitzꞌonoj chikiwach: «¿Saꞌ keꞌelawi waꞌ? Ma kubꞌiꞌij: “Na naj ta chi kꞌu riꞌ kiwil nuwach, ma riꞌin kinꞌek chilaꞌ pa kꞌo wi ri Nuqaw; pero chiqawach apanoq kiꞌwila tanchi nuwach.”

¹⁸¿Saꞌ keꞌelawi: “Na naj ta chi kꞌu riꞌ”? Na kaqamaj ta usukꞌ saꞌ puwi kachꞌaꞌt wi» xechaꞌ.

¹⁹Ri Jesús xunaꞌbꞌej kakaj kakiꞌan tzꞌonobꞌal che. Ruma kꞌu riꞌ xubꞌiꞌij chike: —Riꞌin ximbꞌiꞌij chiwe: “Na naj ta chi kꞌu riꞌ kiwil nuwach, pero chiqawach apanoq kiꞌwila tanchi nuwach.” ¿E kitzꞌonoj saꞌ keꞌelawi waꞌ?

²⁰Paqatzij wi kambꞌiꞌij chiwe: Riꞌix kixoqꞌ na y kixbꞌison na, tobꞌ ri winaq re ruwachulew kekiꞌkotik. Tobꞌ riꞌix kixbꞌison woꞌora, wa bꞌis kuꞌana kiꞌkotemal.

²¹»Echiriꞌ kutzir uwach juna ixoq, lik kakꞌojiꞌ pa kꞌaxkꞌolil ma xopon ruqꞌij. Noꞌj echiriꞌ alaxinaq chi rakꞌa, na kakꞌun ta chi ne chukꞌuꞌx ri kꞌaxkꞌolil ruma rukiꞌkotemal, ma xalax jun akꞌa che ruwachulew.

²²Jekꞌuriꞌlaꞌ riꞌix kapax ikꞌuꞌx woꞌora; noꞌj echiriꞌ kiwil tanchi nuwach, kanoj kꞌu ri iwanimaꞌ che kiꞌkotemal yey waꞌ wa kiꞌkotemal na jinta junoq kesan re chiwe.

²³Chupa kꞌu riꞌ laꞌ la qꞌij na kajawax ta chik kiꞌan tzꞌonobꞌal chwi ri nubꞌiꞌim. »Paqatzij wi kambꞌiꞌij chiwe: Ronoje ri kitzꞌonoj che ri Nuqaw pa ri nubꞌiꞌ, Rire kuya chiwe.

²⁴Kꞌa chwi woꞌora riꞌix na jinta kꞌo itzꞌonom pa ri nubꞌiꞌ riꞌin. Chitzꞌonoj y kikꞌulu, chaꞌ jelaꞌ kanoj ri iwanimaꞌ che kiꞌkotemal.

²⁵»Nubꞌiꞌim waꞌ chiwe rukꞌ kꞌambꞌal naꞌoj; noꞌj kopon kꞌu ri qꞌij echiriꞌ na kajawax ta chik kinchꞌaꞌt iwukꞌ rukꞌ kꞌambꞌal naꞌoj, ma riꞌ lik qꞌalaj chiwach riꞌix janipa ri kambꞌiꞌij chiwe chwi ri Nuqaw.

²⁶Chupa kꞌu laꞌ la qꞌij, utz kitzꞌonoj che ri Nuqaw chupa ri nubꞌiꞌ janipa ri kajawax chiwe. Yey na kajawax ta kꞌu riꞌ kinelaj chwach ri Nuqaw piwiꞌ,

²⁷ma ri Nuqaw lik kꞌax kixunaꞌo ruma kꞌax ininaꞌom riꞌin yey lik ikojom, riꞌin rukꞌ ri Dios in petinaq wi.

²⁸Riꞌin in petinaq rukꞌ ri Nuqaw y xinkꞌun che ruwachulew; yey woꞌora e waꞌ kanya kan ruwachulew y kintzelej rukꞌ ri Nuqaw —xchaꞌ.

²⁹Ekꞌu rutijoꞌn xkibꞌiꞌij che: —Woꞌora lik qꞌalaj ri kabꞌiꞌij la chiqe, ma na kachꞌaꞌt ta chi la rukꞌ kꞌambꞌal naꞌoj.

³⁰Yey woꞌora kaqamaj usukꞌ rilal lik etaꞌam la ronoje. Uwariꞌche na kajawax taj kꞌo junoq kuꞌan tzꞌonobꞌal cheꞌla, ma etaꞌam chi la saꞌ ri kaqaj kaqatzꞌonoj echiriꞌ kꞌamajaꞌ ne kaqaꞌan ri tzꞌonobꞌal. Ruma kꞌu laꞌ, qakojom rilal rukꞌ ri Dios petinaq wi la —xechaꞌ.

³¹Ri Jesús xukꞌul uwach: —¿Kꞌa e woꞌora kikoj waꞌ?

³²Kakꞌun kꞌu ruqꞌijol y waꞌ ya xujeqo echiriꞌ riꞌix kixkicher bꞌi. Chijujunal kꞌut kimaj bꞌi ibꞌe y kiniya kan nutukel. Pero riꞌin na kinkanaj ta kan nutukel, ma ri Nuqaw kꞌo wukꞌ.

³³»Ximbꞌiꞌij ronoje waꞌ chiwe chaꞌ wuma riꞌin kiriq utzil chomal. Che ruwachulew riꞌix lik kitij kꞌax. Pero chinimarisaj kꞌu ikꞌuꞌx, ma riꞌin nuchꞌijom uchuqꞌabꞌ taq ri na utz taj re ruwachulew —xchaꞌ.