Juan 18

1

2

3

4

5

6

7

8

9

10

11

12

13

14

15

16

17

18

19

20

21

¹Echiriꞌ ri Jesús xukꞌis ubꞌiꞌxikil taq waꞌ, xel bꞌi junam kukꞌ rutijoꞌn, xkiqꞌaxuj kꞌu ri raqanaꞌ Cedrón y xebꞌok chupa jun werta kꞌo chiriꞌ.

²Ri Judas, ri kakꞌayin re ri Jesús, retaꞌam chi ri luwar, ma ukꞌiyal laj ri Jesús kukꞌ rutijoꞌn kimolom kibꞌ chiriꞌ.

³Ekꞌu ri Judas xoponik, ebꞌukꞌamom bꞌi ukꞌiyal soldados y taq ri chajinel re ri Rocho Dios. Rike kukꞌaꞌam taq chapabꞌal, yey e kꞌo ri kawolol ri ki aqꞌ y e kꞌo ri xa kitzukꞌem ki aqꞌ. Waꞌ etaqom bꞌi kuma ri nimaq e aj chakunel pa Rocho Dios y ri fariseos.

⁴Ekꞌu ri Jesús ruma retaꞌam chi ronoje ri katajin lo puwiꞌ, xebꞌuꞌkꞌulu apanoq y xutzꞌonoj chike: —¿China ri kitzukuj? —xchaꞌ.

⁵Rike xkikꞌul uwach: —E Jesús ri aj Nazaret —xechaꞌ. Ri Jesús xubꞌiꞌij kꞌu chike: —In riꞌin —xchaꞌ. Yey ri Judas, ri kakꞌayin re, kꞌo chikixoꞌl ri kakaj kakichap bꞌi ri Jesús.

⁶Echiriꞌ xubꞌiꞌij ri Jesús chike: “In riꞌin”, xetzelej chikij y xetzaq pulew.

⁷Ekꞌu ri Jesús xutzꞌonoj tanchi chike: —¿China ri kitzukuj? —xchaꞌ. Y rike xkibꞌiꞌij: —E Jesús ri aj Nazaret —xechaꞌ.

⁸Xubꞌiꞌij kꞌu ri Jesús chike: —Riꞌin nubꞌiꞌim chi che alaq; “In riꞌin.” We in kꞌu ri kintzukuj alaq, yaꞌa bꞌi alaq luwar chike wa nutijoꞌn chebꞌeꞌojana —xcha chike.

⁹E xubꞌiꞌij waꞌ ri Jesús chaꞌ e kuꞌana ri ubꞌiꞌim chik: «Na jinta junoq xsach chike ri ebꞌuyaꞌom ri Nuqaw chwe.»

¹⁰Ekꞌu ri Simón Pedro rukꞌaꞌam jun espada. Xresaj kꞌu uloq y xujochij bꞌi ruxikin uwikiqꞌabꞌ ri raj chak ri kajawal raj chakunel pa Rocho Dios. Wa aj chak Malco rubꞌiꞌ.

¹¹Ri Jesús xubꞌiꞌij kꞌu che ri Pedro: —Chakꞌolo ra espada chupa rukꞌolibꞌal. ¿Na kinikꞌow ta kami riꞌ pa ri kꞌaxkꞌobꞌik we e ri Nuqaw intaqayom lo che? —xchaꞌ.

¹²Ekꞌuchiriꞌ, ri soldados y ri taqanel ke, junam kukꞌ raj judiꞌabꞌ e chajinel re ri Rocho Dios, xkichap ri Jesús y xkiyutu.

¹³Xkikꞌam kꞌu bꞌi ri Jesús chwa ri Anás, ruqaw-ujiꞌ ri Caifás ri kajawal raj chakunel pa Rocho Dios chupa laꞌ la junabꞌ.

¹⁴Yey e Caifás ri ubꞌiꞌim chike raj judiꞌabꞌ: «E más utz we ta e laꞌ xa jun chi achi kakam kuma konoje ri tinamit.»

¹⁵Ri Simón Pedro y jun chik tijoꞌn eteran bꞌi chirij ri Jesús. Waꞌ wa jun chik tijoꞌn etaꞌmatal uwach ruma ri kajawal raj chakunel pa Rocho Dios; ekꞌu rire xok bꞌi rukꞌ ri Jesús che ruwa ja re ri rocho ri aj wach.

¹⁶Noꞌj ri Pedro xkanaj kan chwa ri puerta pa bꞌe. Ruma kꞌu riꞌ, xel lo ri jun tijoꞌn etaꞌmatal uwach ruma ri kajawal raj chakunel pa Rocho Dios, xchꞌaꞌt rukꞌ rali aj chajal re ri puerta chaꞌ kuya luwar che ri Pedro kok bꞌi.

¹⁷Ekꞌuchiriꞌ rali xutzꞌonoj che ri Pedro: —¿Na lal ta nawi jun chike rutijoꞌn laꞌ la jun achi? —xchaꞌ. Ri Pedro xukꞌul uwach: —Na in taj —xchaꞌ.

¹⁸Ruma kꞌu lik kꞌax tew, raj chakibꞌ y ri e chajinel e takꞌal chuchiꞌ jun aqꞌ kinukꞌum re kakimiqꞌisaj kibꞌ. Yey ri Pedro kꞌo kukꞌ chuchiꞌ ri aqꞌ.

¹⁹Ri kajawal raj chakunel pa Rocho Dios xujeq utzꞌonoxik che ri Jesús pakiwi taq rutijoꞌn y puwi rukꞌutunik.

²⁰Ri Jesús xubꞌiꞌij che: —Riꞌin in tzijoninaq chiwachil chikiwach konoje ri winaq, xaqi in kꞌutuninaq pa taq sinagogas y pa ri Rocho Dios pa kakimol wi kibꞌ raj judiꞌabꞌ. Na jinta kꞌo nubꞌiꞌim xa xeꞌlaqꞌay.

²¹¿Suꞌchak kꞌu riꞌ katzꞌonoj alaq chwe puwi ri nukꞌutunik? E tzꞌonoj alaq chike ri e tayom we riꞌin, ma rike ketaꞌam saꞌ ri nukꞌutum chikiwach —xchaꞌ.

²²Echiriꞌ xubꞌiꞌij waꞌ ri Jesús, jun chike ri e chajinel xupachꞌ jun qꞌabꞌ chupalaj ri Jesús y xubꞌiꞌij che: —¿Utz nebꞌa jelaꞌ kakꞌulubꞌej uwach ri kajawal raj chakunel pa Rocho Dios? —xchaꞌ.

²³Ri Jesús xukꞌul uwach: —We ximbꞌiꞌij juna chꞌaꞌtem na utz taj, bꞌiꞌij la riꞌ saꞌ ri na utz taj ximbꞌiꞌij. Noꞌj we utz ri ximbꞌiꞌij, ¿suꞌchak kꞌu riꞌ xinchꞌay la? —xchaꞌ.

²⁴Yutum chi ri Jesús, ri Anás xutaq bꞌi chwa ri Caifás, ri kajawal raj chakunel pa Rocho Dios.

²⁵Ekꞌu ri Pedro takꞌal chuchiꞌ ri aqꞌ, kumiqꞌisaj ribꞌ. Yey e kꞌo jujun jewaꞌ xkibꞌiꞌij che: —¿Na lal ta nawi jun chike rutijoꞌn laꞌ la jun achi? —xechaꞌ. Ri Pedro xrewaj, jewaꞌ xubꞌiꞌij: —¡Jaꞌi! Na in taj —xchaꞌ.

²⁶Chiriꞌ kꞌo jun raj chak ri kajawal raj chakunel pa Rocho Dios. Rire kꞌo chux che ri jun xjochix ruxikin ruma ri Pedro. Xutzꞌonoj kꞌu che ri Pedro: —¿Na xinwil ta nebꞌa wach la chilaꞌ pa ri werta rukꞌ ri Jesús? —xchaꞌ.

²⁷Yey ri Pedro xrewaj tanchik, y ekꞌuchiriꞌ xbꞌixon lo ri teren.

²⁸E riꞌ katajin usaqirik echiriꞌ xesax bꞌi ri Jesús chwa rocho ri Caifás y xkꞌam bꞌi pa ri palacio re ri Pilato, ri taqanel aj Roma. Ekꞌu ri aj judiꞌabꞌ na xebꞌok ta chupa ri palacio chaꞌ na kakichꞌulaj ta kibꞌ chwach ri Dios y jekꞌulaꞌ utz kakitij ri cena re Pascua.

²⁹E uwariꞌche, ri taqanel Pilato xel loq chaꞌ kachꞌaꞌt kukꞌ y xubꞌiꞌij chike: —¿Saꞌ rumak waꞌchi kakoj alaq? —xchaꞌ.

³⁰Raj judiꞌabꞌ xkikꞌul uwach: —We tamaji aj mak, na kaqaya ta riꞌ paqꞌabꞌ la —xechaꞌ.

³¹Ekꞌu ri Pilato xubꞌiꞌij chike: —Kꞌama bꞌi alaq y qꞌata alaq tzij puwiꞌ jelaꞌ pachaꞌ ri kubꞌiꞌij ri tzijpixabꞌ e alaq —xchaꞌ. Pero raj judiꞌabꞌ xkikꞌul uwach: —Riꞌoj oj aj judiꞌabꞌ na jinta paqaqꞌabꞌ kaqaqꞌat tzij re kamik puwi junoq —xechaꞌ.

³²Jelaꞌ e xuꞌana pachaꞌ rubꞌiꞌim lo ri Jesús puwi rukamik.

³³Ri Pilato xok tanchi ubꞌi chupa ri palacio, xusikꞌij ri Jesús y xutzꞌonoj che: —¿Lal kami riꞌ ri rey ke raj judiꞌabꞌ? —xchaꞌ.

³⁴Ri Jesús xubꞌiꞌij che: —¿Xa pa e la kaꞌan la wa tzꞌonobꞌal chwe o kꞌo ebꞌiꞌyom re cheꞌla? —xchaꞌ.

³⁵Ri Pilato xukꞌul uwach: —Na jinta we riꞌin che waꞌ, ma ¿in nebꞌa kukꞌil raj judiꞌabꞌ? Yey ri xeyaꞌw e la panuqꞌabꞌ e ri winaq re ri tinamit la kukꞌ ri nimaq e aj chakunel pa Rocho Dios. ¿Saꞌ kꞌu ri mak ꞌanom la? —xchaꞌ.

³⁶Ekꞌu ri Jesús xukꞌul uwach: —Ri nutaqanik riꞌin na re ta wara che ruwachulew. Ma we ta re wara, xechꞌoꞌjin ta kꞌu riꞌ ri nutijoꞌn chaꞌ na kinyaꞌ ta pakiqꞌabꞌ raj judiꞌabꞌ. Noꞌj ri nutaqanik na re ta wara che ruwachulew —xchaꞌ.

³⁷Xubꞌiꞌij kꞌu ri Pilato che: —¿Qatzij kami riꞌ lal rey? —xchaꞌ. Ri Jesús xukꞌul uwach: —Lal kabꞌiꞌn la re, riꞌin in rey. Riꞌin xinalax che ruwachulew yey xinkꞌunik re kanqꞌalajisaj ri Qꞌijsaq. Janipa kꞌu ri kitaqem ri Qꞌijsaq, e kakita ri kambꞌiꞌij riꞌin —xchaꞌ.

³⁸Ri Pilato xubꞌiꞌij che: —¿Saꞌ riꞌ laꞌ la Qꞌijsaq? —xchaꞌ. Echiriꞌ uꞌanom chi wa tzꞌonobꞌal, xel tanchi ubꞌi ri Pilato, xchꞌaꞌt tanchi kukꞌ raj judiꞌabꞌ y xubꞌiꞌij chike: —Riꞌin na kanriq ta juna umak waꞌchi.

³⁹Ralaq lik xex kaꞌan wi alaq ri koyꞌej alaq pa ri nimaqꞌij Pascua kanyolopij bꞌi chiwach alaq juna achi kꞌo pa cárcel. ¿Kaꞌaj kami alaq riꞌ e kanyolopij bꞌi ri rey ke raj judiꞌabꞌ? —xchaꞌ.

⁴⁰Ekꞌuchiriꞌ, konoje xkijeq kesikꞌin tanchik: —¡Mayolopij bꞌi la ri Jesús! ¡E yolopij bꞌi la ri Barrabás! —xechaꞌ. Yey ri Barrabás e jun achi eleqꞌom.