Text copied!
CopyCompare
Ri utzilaj tzij re ri kanimajawal Jesucristo - Juan

Juan 14

Help us?
Click on verse(s) to share them!
1»Lik mapax ikꞌuꞌx. E chikubꞌaꞌ ikꞌuꞌx rukꞌ ri Dios y chikubꞌaꞌ ikꞌuꞌx wukꞌ riꞌin.
2Chilaꞌ pa kꞌo wi ri Nuqaw lik ukꞌiyal jeqlebꞌal kꞌolik. We ta na e ta uꞌanom, riꞌin nubꞌiꞌim chi riꞌ chiwe. Ekꞌu waꞌ kinꞌek chaꞌ kiꞌnyijbꞌaꞌ jun luwar iwe riꞌix.
3Yey we xinꞌek kꞌut y xyijbꞌitaj ri luwar iweꞌix, kinkꞌun tanchik y kixoꞌlnukꞌamaꞌ chaꞌ jelaꞌ pa kineꞌkꞌola wi riꞌin, riꞌix kixeꞌkꞌola chilaꞌ wukꞌ.
4Riꞌix iwetaꞌam pa kinꞌek wi yey iwetaꞌam ri bꞌe —xchaꞌ.
5Xubꞌiꞌij kꞌu ri Tomás che: —Qajawal, riꞌoj na qetaꞌam taj pa keꞌek wi la. ¿Saꞌ kꞌu uꞌanik riꞌ kaqetaꞌmaj ri bꞌe? —xchaꞌ.
6Ri Jesús xukꞌul uwach: —In ri in Bꞌe, in ri in Qꞌijsaq yey in ri in Kꞌaslemal. Na jinta junoq kopon rukꞌ ri Nuqaw we na wuma ta riꞌin.
7We iwetaꞌam nuwach riꞌin, iwetaꞌam uwach riꞌ ri Nuqaw. Chwi kꞌu riꞌ woꞌora kiwetaꞌmaj uwach, ma iwilom chi uwach —xchaꞌ.
8Ekꞌu ri Felipe xubꞌiꞌij che: —Qajawal, kꞌutu la chiqawach ri Qaw la y kojkubꞌiꞌ kꞌu riꞌ che —xchaꞌ.
9Ri Jesús xukꞌul uwach: —Felipe, ukꞌiyal qꞌij chi waꞌ kꞌut e laꞌ in kꞌo iwukꞌ, ¿yey kꞌamajaꞌ kawetaꞌmaj nuwach? Ma china ri etaꞌmayom nuwach riꞌin, riꞌ e rilom uwach ri Nuqaw. ¿Suꞌchak kꞌu riꞌ katzꞌonoj chwe kankꞌut ri Nuqaw chiwach?
10Riꞌin rukꞌ ri Nuqaw y Rire wukꞌ riꞌin, xa oj jun. ¿Na kakoj ta kami riꞌ waꞌ? E janipa wa kambꞌiꞌij chiwe, na xa ta pa we riꞌin kambꞌiꞌij ma ri nuchꞌaꞌtem e re ri Nuqaw ri jeqel wukꞌ, yey Rire kuꞌan ruchak wuma riꞌin.
11Chikojo kꞌu wa kambꞌiꞌij chiwe: Riꞌin rukꞌ ri Nuqaw y Rire wukꞌ riꞌin, xa oj jun. We na kikoj ta kꞌu waꞌ ruma ri nuchꞌaꞌtem, e chikojo ruma ri chak nuꞌanom.
12»Paqatzij wi kambꞌiꞌij chiwe: China ri kakubꞌiꞌ ukꞌuꞌx wukꞌ riꞌin, riꞌ kuꞌan ne ri chak jelaꞌ pachaꞌ ri kanꞌan riꞌin; y más ne nimaq taq chak ri kuꞌano, ma e riꞌin kinꞌek pa kꞌo wi ri Nuqaw.
13Ronoje kꞌu ri kitzꞌonoj riꞌix che ri Nuqaw pa ri nubꞌiꞌ, riꞌin kanꞌano chaꞌ jelaꞌ runimal uchomalil ri Dios kaqꞌalajin ruma Rukꞌajol.
14Ronoje kꞌu riꞌ ri kitzꞌonoj riꞌix pa ri nubꞌiꞌ, riꞌin kanꞌano.
15»We riꞌix kꞌax kininaꞌo, e lik chiꞌana janipa ri kixintaq che uꞌanik.
16Yey riꞌin e kantzꞌonoj che ri Nuqaw chaꞌ kutaq chi lo jun chik Toꞌbꞌel iwe re kunimarisaj ikꞌuꞌx; y asu kakꞌojiꞌ iwukꞌ na jinta utaqexik.
17Waꞌ e ri Uxlabꞌixel re ri Qꞌijsaq. Taq ri winaq na utz taj kakikꞌulu, ma na kakil ta uwach y na ketaꞌam tane uwach. Noꞌj riꞌix iwetaꞌam uwach, ma Rire kꞌo chixoꞌlibꞌal y koꞌlkꞌola piwanimaꞌ.
18»Riꞌin na kixinwoqꞌotaj ta kanoq, ma kintzelej lo iwukꞌ.

19Na naj ta chi kꞌu riꞌ, ri winaq na kakil ta chi nuwach; noꞌj riꞌix kiwil tanchi nuwach. Ruma kꞌu riꞌin kinkꞌastaj lo chikixoꞌl ri ekaminaq, jenelaꞌ riꞌix kixkꞌastajik.
20Chupa kꞌu riꞌ laꞌ la qꞌij riꞌix kiwetaꞌmaj: Riꞌin rukꞌ ri Nuqaw xa oj jun, yey riꞌix xa jun iꞌanom wukꞌ riꞌin y riꞌin xa jun nuꞌanom iwukꞌ riꞌix.
21China kꞌu ri ukꞌulum ri nutaqanik y kuꞌan kꞌu janipa ri kambꞌiꞌij che, riꞌ lik kꞌax kinunaꞌo. Y china ri kꞌax kanaꞌw we riꞌin, kꞌax kanaꞌ ruma ri Nuqaw. Yey riꞌin lik kꞌax kannaꞌo y kanqꞌalajisaj che, in china riꞌin —xchaꞌ.
22Ri Judas (na e ta ri aj Iscariot) xubꞌiꞌij: —Qajawal, ¿suꞌbꞌe kaqꞌalajisaj la chiqawach riꞌoj china rilal yey chikiwach ri winaq na kaꞌan ta la waꞌ? —xchaꞌ.
23Ri Jesús xukꞌul uwach: —China ri kꞌax kinunaꞌ riꞌin, e kuꞌan janipa ri kambꞌiꞌij che. Ekꞌu ri Nuqaw kꞌax kunaꞌ rire, yey ri Nuqaw y riꞌin kojoꞌljeqela rukꞌ.
24China kꞌu ri na kꞌax ta kinunaꞌo, riꞌ na kutaqej ta janipa ri kambꞌiꞌij che. Wa tzij kixtajin che utayik, na xa ta weꞌin, e re ri Nuqaw, ri xtaqaw lo weꞌin.
25»Ronoje waꞌ kintajin che ubꞌiꞌxik chiwe xaloqꞌ kꞌa in kꞌo iwukꞌ.
26Yey echiriꞌ kinꞌek, ri Nuqaw kutaq lo ri jun Toꞌbꞌel pa ri nubꞌiꞌ re kubꞌochiꞌij ikꞌuꞌx, waꞌ e ri Santowilaj Ruxlabꞌixel ri Dios. Echiriꞌ kakꞌun Rire, kukꞌut ronoje chiwach y kukuxtaj kꞌu chiwe janipa ri nubꞌiꞌim riꞌin chiwe.
27»Ri utzil chomal kꞌo wukꞌ riꞌin, kanya kan chiwe. Yey waꞌ wa utzil chomal kanya riꞌin chiwe na xa ta jelaꞌ pachaꞌ ri kakiya taq ri winaq. Mapax kꞌu ikꞌuꞌx y mixiꞌij iwibꞌ.
28»Itom chi kꞌu ri nubꞌiꞌim chiwe: “Kinꞌek yey kintzelej tanchi lo iwukꞌ.” We e laꞌ qatzij lik kꞌax kininaꞌo, xixkiꞌkot tane kꞌu riꞌ che echiriꞌ xito kinꞌek rukꞌ ri Nuqaw, ma Rire más kꞌo uwach chinuwa riꞌin.
29»Kannabꞌesaj pan ubꞌiꞌxik waꞌ chiwe chaꞌ echiriꞌ kuꞌanaꞌ, kikoj kꞌu riꞌ.
30Na naj ta chi kꞌut kinchꞌaꞌt iwukꞌ; ma ya kakꞌun lo ritzel winaq, ri jun kataqan che ruwachulew, tobꞌ na jinta ne puqꞌabꞌ rire kataqan panuwi riꞌin.
31Na rukꞌ ta kꞌu riꞌ, kanꞌano janipa ri kinutaq ri Nuqaw che uꞌanik, chaꞌ jelaꞌ ri winaq che ruwachulew kaketaꞌmaj riꞌin lik kꞌax kannaꞌ ri Nuqaw. »Chixyaktajoq; joꞌ, chojel bꞌi wara.