IOANE 21

1

2

3

4

5

6

7

8

9

10

11

12

13

14

15

16

17

18

19

20

21

¹Unu ḡau muridiai, Iesu na ena hahediba ediai ma e hedinarai lou, Tiberia gohuna ai. Ini e hedinarai toma.

²Simona Petro, Toma, e nemaia Hekapa, Natanael, Galilea tauna Kana amo, Sebedeo natuna raruosi, bona hahediba rarua danu, hahituosi e noho hebouva.

³Simona Petro ese e hamaorodia, eto, Aina ha haoda. Idia eto, Ai danu oi ida aitala. Bena idia na ela, vanaḡi auta ai eha gui, to una hanuaboi e bone.

⁴Daba rerena ai Iesu na kone ai e gini, a hahediba na asi dibadia una be Iesu.

⁵Bena Iesu ese e nanadaidia, eto, Natugu e, mai amui eiava? Idia e haere, eto, Lasi.

⁶Bena ia ese e hamaorodia, eto, Reke na enoeno kahana ai ba torea, gwarume bavabi. Taunabunai idia ese e torea, bena bae veria eto, to asi goadadia, gwarume diaḡau daidiai.

⁷Bena Iesu ena lalokau hahedibana ese Petro e hamaoroa, eto, Lohiabada bunai. Simona Petro ese una hereva e kamonai ai, ena dabua e tarua, badina be vada e dokia oho; bena gohu ai e pau dobi.

⁸Bena hahediba oredia na vanaḡi maraḡina ai e diho, hari reke danu, gwarume ai e honu ḡauna, e veria diho. Badina be kone na dia daudau, roha imahui sisivana.

⁹Idia na kone ai e toa, bena lahi mai gidana unuseni ai e itaia, latanai gwarume haida heheato, bona flaoa atagadia haida danu.

¹⁰Iesu ese e hamaorodia, eto, Harihari o abi gwarumedia haida ma a mailai.

¹¹Taunabunai Simona Petro na vanaḡi ai e ḡui kau, bena reke kone ai e haroroa vareai, gwarume badadia ai e honu, iboudiai sinahu-ta imahui toi. Ena be gwarume na momo herea, to reke na se hedare.

¹²Iesu ese e boiridia, eto, Aoma, ame aniani. Bena hahediba na lalodia asie heḡereḡere bae nanadaia, baeto, Oi na daika? Idia dibadia Lohiabada bunai.

¹³Bena Iesu ese flaoa atagadia e abidia, e henidia, bona gwarume danu.

¹⁴Unu be nega ihatoina Iesu na ena hahediba ediai e hedinarai, e tore isi lou murinai.

¹⁵Idia na e aniani vaitani, bena Iesu ese Simona Petro e nanadaia, eto, Simona Iona e, idia ese e lalokau henigu maraḡimu, oi ese o lalokau henigu badamu a? Ia e haere, eto, Oibe, Lohiabada e, dibamu na ura henimumu. Iesu eto, Egu mamoe-mamoe ba ubudia.

¹⁶Ma e nanadaia lou, eto, Simona Iona e, o lalokau henigumu a? Ia e haere, eto, Oibe, Lohiabada e, oi dibamu na ura henimumu. Iesu eto, Egu mamoe ba reḡudia.

¹⁷Iesu ese nega ihatoina ma e nanadaia, eto, Simona Iona e, o ura henigumu a? Petro lalona na e hisihisi, badina be nega ihatoina e nanadaia, eto “O ura henigumu a?” Taunabunai, ia na e haere, eto, Lohiabada e, oi na ḡau iboudiai dibamu; vada dibamu na ura henimumu. Iesu eto, Egu mamoe ba ubudia.

¹⁸Momokani vaitani na hamaoromumu, tauhaumu negana ai oi ese emu rami o rioava bona emu ura gabudia ai o ha loava; a ba buruka negana ai imamu na ba toia roro, bena ese rami baine hariolaimu, bena basio ura henia gabuna baine laohaunu.

¹⁹Una hereva amo ia ese edena mase ai Dirava baine heatolaia e hahedinaraia. Unu e hereva toma, bena ma eto, Murigu ai a raka.

²⁰A Petro e gini kerehai, Iesu ena lalokau hahedibana e itaia, e ḡavadia: anibou ai Iesu kemena ai e tabe kau, e nanadaia, eto “Lohiabada e, taomu itorena tauna be daika?” hahedibana bunai.

²¹Taunabunai, Petro ese e itaia, bena Iesu e nanadaia, eto, Lohiabada e, una tau na ede baine heto?

²²Iesu ese e haere henia, eto, Baina ura ia na baine noho ela bona lau baina lou mai, una be dahaka oiemu ai? A oi hari murigu ai ame raka.

²³Ina hereva na Iesu ena orea taudia bogaragidiai e piua, una hahediba na basine mase eto. A Iesu na seto “Ia na basine mase”; to eto “Baina ura ia na baine noho ela bona lau baina lou mai, una be dahaka oiemu ai?”

²⁴Ena hahediba binai, ini ḡau e gwaurai hedinaraimu bona e toremu; bona ita dibada ena hereva na momokani.

²⁵Kara diaḡau danu Iesu ese e kara. lboudiai na bema tore, lau na tomamu tanobada na basinema heḡereḡere unu buka ihaboudia.