IOANE 18

1

2

3

4

5

6

7

8

9

10

11

12

13

14

15

16

17

18

19

20

21

¹Iesu na unu e gwau toma, bena ena hahediba ida e raka lasi, Kidron kourana e hanaia. Unuseni ai imeana ta ai e raka vareai.

²Iuda, tao-tore tauna, una gabu danu dibana; badina be nega momo Iesu mai ena hahediba ida una gabu e lao heniava.

³Taunabunai, Iuda ese tuari taudia, bona hahelaga taudia bona Farisea taudia edia hesiai taudia, e abidia, bena unu ela, kede bona lamepa bona tuari ḡaudia danu e abi kau.

⁴Iesu na ienai bae vara ḡaudia iboudiai dibana; taunabunai ia na vairadia ela, eto, Daika o tahuamu?

⁵Idia e haere, eto, Iesu, tau Nasaret. Iesu eto, Lau o ina. Iuda danu, tao-tore tauna, idia ida e gini hebou ai

⁶Iesu unu e hereva toma; bena idia na e raka muri, tano ai e keto.

⁷Ia ese ma e nanadaidia lou, eto, Daika o tahuamu? Idia ma eto, Iesu, tau Nasaret.

⁸Iesu ma e haere, eto, Vada na hamaoromui, lau o ina. O tahuamu tauna lau binai; mani ini egu hahediba hari baela.

⁹Unu e gwau toma ena hereva ihamomokanina, eto “Vada o henigu taudia ta asina reaia.”

¹⁰Simona Petro na mai ena dare, bena e veria lasi, hahelaḡa tauna badana ena hesiai tauna e dapaia, taiana idibana e dapaia oho. Una hesiai tauna ladana be Malako.

¹¹Bena Iesu ese Petro e gwau henia, eto, Dare na iudalaina ḡauna ai ba udaia. Kehere na Tamagu ese vada eme henigu na basina inua a?

¹²Bena tuari taudia mai biagudia ida bona Iuda taudia edia hesiai taudia ese Iesu e dabaia tao, e ḡuia.

¹³Bena Ana dekena e hakaua lao guna, badina be ia na Kaiafa ravana: Kaiafa na hahelaḡa tauna badana una laḡani ai.

¹⁴Una Kaiafa ese danu Iuda taudia vada e hamaorodia guna, eto “Tau ta baine mase hanua taudia daidiai, ihanamomui ḡauna bunai”.

¹⁵Simona Petro ese Iesu e ḡavaia, hahediba ta danu ia ida. Una hahediba na hahelaḡa tauna badana turana, bena ia na Iesu ida hahelaḡa tauna badana ena ruma maḡuna lalonai e raka vareai.

¹⁶A Petro be murimuri ai gini. Bena hari hahediba, hahelaḡa tauna badana ida e hetura tauna, e raka lasi, ikoukou igimana kekenina e hereva henia, bena Petro e hakaua vareai.

¹⁷Bena ikoukou igimana kekenina ese Petro e nanadaia, eto, Oi na una tau ena hahediba ta ani? Ia e haere, eto, Lau na lasi.

¹⁸Ḡaukara taudia bona hesiai taudia na e kerudia dainai lahi e haraia, badinai e gini, e heganava. Petro danu idia ida e gini hebou, e heganava.

¹⁹Bena hahelaḡa tauna badana ese Iesu e nanadaia, ena hahediba bona ena hahediba herevadia e nanadailaiava.

²⁰Iesu ese e haere henia, eto, Taunimanima iboudiai na hereva henidia hedinaraiva. Vaia dubu lalodiai bona Dubu Helaḡa ai na hahedibava, Iuda taudia iboudiai e hebouva gabudiai. Asina hereva hehuni.

²¹Dahaka dainai o nanadaigumu? Egu hereva e kamonaiva taudia na ba nanadaidia: idia na dibadia ede na hahediba tomava.

²²Unu e haere toma, bena hesiai tauna ta ese e pataia, eto, Hahelaga tauna badana unu o haere henia tomamu a?

²³Iesu na e haere, eto, Bama hereva kerere, egu kerere na boma gwauraia hedinarai; a bama hereva maoro, dahaka dainai o patagu?

²⁴Bena Ana ese mai iḡuina ida e siaia lao, Kaiata, hahelaḡa tauna badana, dekena.

²⁵Simona Petro na dounu lahi badinai e giniva, e heganava. Bena idia ese e nanadaia, eto, Oi na iena hahediba ta ani? Ia ma e heḡore, eto, Lau na lasi.

²⁶A hahelaḡa tauna badana ena hesiai tauna ta be Petro ese taiana e dapaia oho tauna varavarana. Ia eto, Ia ida imea lalonai asina itamu a?

²⁷Petro ma e heḡore lou. Bena kokoroku vada e tai.

²⁸Idia ese Kaiafa ena amo ma e hakaua lao, gavana ena ruma e laohaia. Daba vada e rere. Iuda taudia na gavana ena ruma ralonai asie raka vareai, badina be idia na hehelaḡa, Lagau-hanai Ariana bae ania dainai.

²⁹Taunabunai, Pilato na e raka lasi dekediai; bena eto, Dahaka dainai ina tau o habadelaiamu?

³⁰Idia ese e haere henia, eto, Bema asi ena kara dika, ai ese basiama mailaia.

³¹Bena Pilato ese ma e hamaorodia, eto, Umui sibomui avabia, ba hahemaoro henia emui taravatu heḡereḡerena. Iuda taudia eto, Ai na asi siahumai tau ta baia alaia mase.

³²Unu amo Iesu ena hereva vada e momokani ede baine mase toma na e gwauraia hedinarai.

³³Bena Pilato na ruma ai ma e raka vareai lou, Iesu e boiria, e nanadaia, eto, Oi na Iuda taudia edia pavapava a?

³⁴Iesu e haere, eto, Sibomu ene o gwau tomamu, eiava haida ese unu e herevalaigu toma?

³⁵Pilato eto, Be! Lau na Iuda taugu a? Emu bese taudia bona hahelaḡa taudia ese dekegu e hakaumu mai. Dahaka o kara?

³⁶Iesu ma e haere, eto, Egu hasileia na dia ina tanobada ḡauna. Egu basileia bema ina tanobada ḡauna, egu hesiai taudia na bema tuari, Iuda taudia imadia amo bema hamaurigu. Ḡau tamona, egu basileia na dia iniseni ai.

³⁷Pilato eto, Benaini, oi na hanua ta ena pavapava a? Iesu e haere, eto, Oi na o herevamu, lau na hanua ta ena pavapava. Badina binai na vara, ina tanobada vada nama, hereva momokani igwaurai-hedinaraina totona. Hereva momokani ibadinana taudia iboudiai ese lau eregu e kamonaimu.

³⁸Pilato eto, Hereva momokani be dahaka'? Unu e gwau toma, bena ma e raka lasi lou, Iuda taudia e hamaorodia, eto, Kerere ta ienai asina davaria.

³⁹To vaia eda kara, Lagau-hanai Ariana negana ai tau ta name ruhaia nege. O uramu Iuda taumui emui pavapava aina ruhaia nege a?

⁴⁰Bena idia na e lolo, eto, Lasi, dia ina tau; Baraba hari. Una Baraba be dadidadi tauna.