IOANE 10

1

2

3

4

5

6

7

8

9

10

11

12

13

14

15

16

17

18

19

20

21

¹Momokani vaitani na hamaoromuimu, mamoe maḡuna ikoukouna amo se raka vareaimu, a maḡu gabana amo e daga hanaimu tauna na henao bona dadidadi tauna.

²A ikoukou amo e raka vareaimu tauna na mamoe ireḡudia tauna.

³Ikoukou igimana tauna ese ikoukou e kehoamu una tau ena; bena mamoe ese ia gadona e kamonaimu. Ia ese ena mamoe korikori ladadia e hatomu, bena e hakaudia lasimu.

⁴Ena mamoe korikori iboudiai e hakaudia lasimu, vairadiai e rakamu; bena ia gadona dibadia dainai idia ia murina amo e rakamu.

⁵A idau tauna murinai basie raka, lasi vaitani; bae heautania; badina be idau taudia gadodia na asi dibadia.

⁶Ina hereva heḡereḡerena na Iesu ese e herevalai henidia, to lalodia na asie parara.

⁷Iesu ese ma e hereva henidia lou, eto, Momokani vaitani na hamaoromuimu, lau na mamoe ikoukouna.

⁸Ema guna taudia iboudiai na henao bona dadidadi taudia, bena mamoe ese eredia asie kamonaiva.

⁹Lau binai ikoukou. Lauegu amo baine raka vareai tauna na do baine mauri; ia na baine raka vareai, baine raka lasi, aniani baine davaria.

¹⁰Henao tauna na henao, ala-ala, hahebua-tari totodia e maimu. Lau vada nama mauri bae abia, bae abia badabada, helaoreana.

¹¹Lau na mamoe ireḡudia tauna namona. Mamoe ireḡudia tauna namona ese ena mauri e atoa dihomu mamoe daidiai.

¹²Hesiai tauna mai davana na dia mamoe ireḡudia tauna, bona dia mamoe biagudia: uda sisiana e maimu negana ai, ia ese e itaiamu bena ena mamoe e heautanidiamu, bena uda sisiana ese e dabaidia taomu bona e hakarohodiamu.

¹³E heaumu badina be ia na hesiai tauna mai davana, mamoe se lalodiamu.

¹⁴Lau na mamoe ireḡudia tauna namona. Egu mamoe vada dibagu; egu mamoe danu dibadia lau;

¹⁵Tamagu dibana lau bona lau dibagu ia heḡereḡerena. Egu mauri danu na atoa dihomu, mamoe daidiai.

¹⁶Lau na mai egu mamoe idaudia haida danu; idia na do dia ina maḡu lalonai. Idia danu do baina hakaudia mai, bena gadogu bae kamonai; bena seri baine tamona, ireḡudia tauna danu baine tamona.

¹⁷Ina dainai Tamagu ese e lalokau henigumu, badina be egu mauri na atoa dihomu, baina abia lou helaoreana.

¹⁸Ta ese egu mauri se abia ohomu; lau sibogu na atoa dihomu. Lau na mai siahugu baina atoa diho, bona mai siahugu baina abia lou. Haheḡani na binai Tamagu ena amo na abia.

¹⁹Unu hereva daidiai Iuda taudia ma e haheparara lou.

²⁰Hutuma eto, Ia na lauma dikana ese e boloamu, e kavaiamu. Dahaka dainai o hakala heniamu?

²¹Ma haida eto, Unu hereva na dia lauma dikana ese e boloamu tauna ena hereva. Lauma dikana ese mata-kepulu taudia matadia ihapapadia mai dibana a?

²²Dubu Ihahelaḡana Ariana negana vada e kau Ierusalem ai. Keru negana bunai.

²³Iesu na Dubu Helaḡa ai e raka, Solomon ena dehe ai;

²⁴bena Iuda taudia ese e ginia hegeḡe, e nanadaia, eto, Ba hadaradaramai ela bona edena nega ai? Oi na Keriso eiava lasi? A hamaoromai momokani.

²⁵Iesu ese e haere henidia, eto, Vada na hamaoromui, to asio kamonaimu. Tamagu ladana ai na karamu karadia ese e hahedinaraigumu;

²⁶to umui ese asio abiabiraigumu, badina be umui na dia lauegu mamoe.

²⁷Egu mamoe ese lau gadogu e kamonaimu; lau ese vada na dibadia, bona idia ese lau murigu ai e rakamu.

²⁸Mauri hanaihanai danu na henidiamu; idia na basie mase, lasi ona lasi vaitani; bona tau ta lau imagu amo basine dadidia.

²⁹Tamagu ese e henigu ḡauna ese ḡau iboudiai e hereadiamu; tau ta danu asi goadana ḡau ta Tamagu imana amo baine dadihaia.

³⁰Lau bona Tamagu na tamona.

³¹Bena Iuda taudia ese nadi ma e abi isi, bae hodoa eto.

³²Iesu eto, Kara namo diaḡau na Tamada ena amo vada na hahedinarai henimui; edena kara dainai ba hodogu?

³³Iuda taudia eto, Kara namona ta dainai basia hodomu, a Dirava ihadikana dainai, badina be oi na taunimanima mo, sibomu Dirava ai o hahelaomu.

³⁴Iesu eto, Emui taravatu ai ini se torea toma, a: Lau nato, umui na dirava?

³⁵O Dirava ena hereva ediai e kau taudia na dirava e gwauraidia, (Buka Helaḡa na asi itata-utuna, ani),

³⁶edeheto Dirava ese e hahelaḡaia bona tanobada ai e siaia tauna na o gwau heniamu, o tomamu “Oi ese Dirava o hadikaiamu”, badina be lau nato “Lau na Dirava Natuna”, a?

³⁷Tamagu ena kara basinama kara, umui ese basioma abiabiraigu.

³⁸A baina kara negana ai na, ena be lau basio abiabiraigu, to egu kara bavabiabirai, bena lalomui bae parara bona ba diba Tamagu na lalogu ai, lau danu Tamagu lalonai.

³⁹Bena idia ese ma e dabaia tao toho lou, to idia imadia amo e hevai dae e raka oho.

⁴⁰Bena Ioridane unukahana e lou ela, gunaguna Ioane e hahebapatisova gabuna ai eha noho.

⁴¹Hutuma na ia dekena ela; eto, Ioane ese toa ta se karaia, to ina tau herevana idoinai e gwaurai vada eme momokani.

⁴²Bena hutuma ese unuseni ai vada e abiabiraia.