1Yesu iyege di Yuda tina, motong la ipa a ila, ngan ikamata tool atu in matan kis. Ngan tool tani in kene yo tinana ipasuiu ye i, ngan matana nga ikis nen.
2Motong la di galiunu tikamata tool tani le nga titoru nen, “Pannoongoo, sei iyei noonoo a le tinana ipasuiu ngan matan kis nen nga, ya taunu, too tamana le tinana?”
3Titoru nen, motong la Yesu iraua betanga kidi nen, “Ya taunu, too tamana le tinana la tiyei noonoo ngan la le matana nga ikis nen, ngan tiap. Bong so yo nen in be pombe ye, a be nen ngan ikarata dada pang Maro be ipatnai gurana le urata ki le iken mallangana pang di tooltool.
4Nookoot nga ni galanga nen, le kin tayei urata ke tool yo iwangau a asi i. Kumata be tayepe nen le lo bong pombe nga, ngan kene tani in tool sa ke be iyei urata yo nen ngan mulu tiap.
5Ngan ye kene yo ayepe ye tana i nga, ngan au i la be ayei ben sul pang di tooltool ke tana i.”
6Yesu iwete nen a imot, motong la ikoronai ngoonoo du ye tana, inbe isaraii ye baene le iyei ben tingi, motong ikap a isirimi tool mata kis tani, in matana ye.
7Inbe iwete panga nen, “Kula le la kupusu matam ye ran kelingi yo ene Siloam ni.” (Ngan betanga yo Siloam i, in punu ben Tiwanga). Le nga tool tani in ila la ipusu matana, motong la ye kene yo be imulu a ila pang rumu ki ye in nga, ngan le matan galanga a ikamata ni ye dook mata.
8Motong la di tooltool yo tiyepe potai ye nga, ngan tiye di tooltool kapala yo muku ngan tikamata igaugau pat le so ye di tooltool nga, ngan tikamata le tipartortor nen, “Ai, i tool tani yo muku ngan iwurur a igaugau pat le so in naii, too?”
9Ngan di tooltool kapala tiyei ne, “E, ya tani naii.” Bong di kapala tiyei ne, “Tiap, ya in matana dawa ben tool tani in leu, bong in tool san.” Ngan tiwete nen, motong la tool tani iyei ne, “Ai, i au tani naii.”
10Le nga di tooltool tina ngan titoru. Tiyei ne, “Nga kuyei belei a le matam rere, inbe kumata ni ye nga?”
11Motong la iwete pang di nen, “Tool yo tipootoo ene ye Yesu i, in iyei tana le iyei ben tingi, motong la isirim matak ye, inbe iwete pau be la apusu matak ye ran kelingi yo Siloam i. Le nga ala la apusu matak ye ran tani, ngan la le matak rere a akamata ni ye nga.”
12Iwete nen, motong la di tooltool tina ngan titoru. Tiyei ne, “Ngan tool tani in iyepe ngai?” Ngan iyei ne, “Atoo, au i lok galanga ye tiap.”
13Motong la tikaua tool tani yo muku ngan matan kis i, in a tila pang ye di Paresi.
14Yesoo, ye kene yo Yesu iyei tana le ben tingi a ikarata tool tani in matana le dook mata ye i, in ye lal kidi Yuda ke sungunu.
15Motong la di Paresi tina ngan titoro tool tani. Tiyei ne, “Ai, matam nga yelei a le dook mata nga?” Ngan tool tani in iwete pang di nen, “Isirim matak ye tana yo iyei le ben tingi nga, motong la apusu matak ye ran, ngan la le nookoot nga matak rere a akamata ni ye nga.”
16Iwete pang di nen, motong la di Paresi kapala tiyei ne, “Tool in Maro iwanga la isi, nga tiap, yesoo ikap tutu lal kiidi Yuda yo ke sungunu, in tiap.” Bong di Paresi tina kapala tiyei ne, “Nga yelei, tool yo ke yeingi noonoo i, in ke be iyei mos yo nen nga?” Ngan nen le di tapdi tiparpoto.
17Motong la di Paresi tina ngan tiportak be titoro tool mata kis tani, in mulu nen, “Lom tar be tool tani yo iyei ong le matam rere i, in tool belei?” Ngan iraua betanga kidi nen, “Ya in Maro koonoo atu.”
18Muku ngan tool tani in matan kis, motong la nookoot nga matan rere nga, bong di kuto maimai ke di Yuda titara lodi medana ye yo nen, ngan tiap. Le nga tiwanga pang tamana le tinana a timan.
19Timan, motong la titor di nen, “Ai, i angru natumim tani yo kawete be ye kene yo tinana ipasuiu ye in nga, ngan matan kis, in naii, too? Ngan nga yelei a le nookoot ngan ikamata ni nga?”
20Ngan tamana le tinana tiyei ne, “Amru nga lomam galanga ben i natumam, inbe kene yo tinana ipasuiu ye in nga, ngan matan kis.
21Bong yelei a le nookoot nga ikamata ni, inbe sei tool iyei matana nga le irere i, in amru nga lomam galanga ye tiap. Le be nen ngan katoru. Ya in tool maiyoko, le ole ya taunu iwete pang.”
22Ngan tool tani in tamana le tinana titattadai di Yuda, ngan la le tiwete betanga nen nga. Titattadai di nen, yesoo muku ngan di kuto maimai ke di Yuda tiraua betanga be kumata le tool sa iwete a ipapos ben Yesu in Kirisi nga, ngan ole tigunkala le ke be ilo rumu kidi Yuda ke gaongo in lono lo iye di tigaua mulu tiap.
23Ngan ye punu in la le tool tani tamana le tinana tiyei ne, “Katoru. Ya in tool maiyoko oo.”
24Motong la di Yuda tina ngan tikiui tool tani yo matan kis in paru ki man tiwete panga nen, “Nookoot nga kuyitmaka Maro ene, inbe kuwete betanga moolmool pam ye matana. Oo kuwete, am nga lomam galanga be tool yo kuweta i, in tool ke yeingi noonoo.”
25Tiwete nen, motong la iraua betanga kidi nen, “Au i lok galanga tiap be ya in tool ke yeingi noonoo, too tiap. Bong so ataleu yo lok galanga ye, in nen, muku ngan matak kis, bong nookoot nga matak rere le akamata ni ye.”
26Motong la di Yuda tina ngan titoru mulu nen, “Tool tani in iyeie soo so pong? Inbe iyei matam belei a irere nga?”
27Titoru nen, motong la iraua torungu kidi. Iyei ne, “Awete pang a kalongo koote. E nga yelei a lomim be kalongo mulu nga? Ang nga o lomim be kayei ben di galiunu lapau, too?”
28Tool tani in iwete nen, le nga di Paresi tina ngan katedi malmal le tiwete panga nen, “Ong in la kuyei tool tani in galiunu i. Bong am nga Mose di galiunu.
29Inbe am nga lomam galanga nen, betanga yo Mose ikap, ngan Maro iwete kes panga. Bong tool in, lomam galanga ye ni yo ipa ye, in tiap.”
30Motong la tool tani in iraua betanga kidi nen, “Tool ni la iyei matak nga le irere mulu i. E, nookoot nga kawete gogomim a kawete be lomim galanga ye ni yo ipa ye, in tiap.
31Idi nga lod galanga nen, Maro in ke be ilongo betanga ke di tooltool yo ke yeingi noonoo, ngan tiap. Bong ya in ole ilongo betanga ke tool yo isung panga, inbe itoo dada le imot yo Maro lono be itoo nga.
32Ngan mukot yege ni le se nookoot nga, ngan talongo touo gasanga ke tool sa be iyeie tool atu yo tinana ipasuiu ngan matan kis in le matan rere, ngan tiap.
33Le kumata be tool i Maro iwanga la isi ngan tiap nga, ngan matin nga le iyei so yo nen, nga tiap.”
34Iwete nen, motong la di Paresi tiraua betanga ki nen, “Ong in ye kene yo tinam ipasui ong ye in nga, ngan kupa ye noonoo la kusi nga. E nga yelei, be kupatomonai am, too?” Motong la di Paresi tina ngan tigunkala le ke be ilo rumu kidi Yuda ke gaongo in lono lo iye di tigaua mulu tiap.
35Yesu ilongo betanga ke so tina yo pombe ye tool tani nga, le nga la ipuske, motong la iwete panga nen, “Ai, kutara lom medana pang Tool Moolmool ke Maro, too tiap?”
36Motong la tool tani itoru nen, “Tool mai, atorong, Tool Moolmool ke Maro, in sei? Oo, kuweta pau a nen ngan atara lok medana panga.”
37Tool tani in iwete nen, motong la Yesu iyei ne, “Tool yo nookoot kumata i, in ya tani naii la iwetewete pong i.”
38Motong la tool tani in iyei ne, “Tool Mai, au i atara lok medana pong.” Motong la igun turunu, inbe isung pang Yesu.
39Motong la Yesu iwete panga nen, “Ye punu yo au i asi tana ye i, in be si akarata betanga ke di tooltool ye dada le urata kidi yo tiyei nga. Ngan nanga, di tooltool yo matadi kisis nga, ngan ole matadi rere a tikamata ni mulu. E di tooltool yo matadi rere a tikamata ni nga, ngan ole tiyei ben di mata kis.”
40Yesu iwete nen, motong la di Paresi pattu yo tiyepe potai ye nga, ngan tilongo tina yo iwete nen nga, le nga titoru. Tiyei ne, “Ai, nga yelei? Kuwete be am nga matamam nga ikisis lapau, too?”
41Motong la iwete pang di nen, “Kumata be matamim ngan ikisis nga, ngan matin nga le taukamim busunu yo ke noonoo nga. Bong nookoot nga kawete be matamim ngan irere a kakamata ni, le noonoo kiang nangan la ikenen go ngan.”
