1Yesu iwete nen a imot, motong la iwete pang di galiunu mulu nen, “Au i ooroo yo ene wain i, in kaini moolmool, inbe Tamak in kumu taunu.
2Ngan wain baene le imot yo ipu tiap nga, ngan Tamak ole ingedekat du tana. Inbe baene le imot yo ipu nga, ngan ole isolai le imallanga, a be nen ngan isudud paunu mulu nga, ngan ipu le kanono alunu welewele.
3Ngan ang nga ben ooroo wain baene yo kumu tamana isolai le imallanga nga, yesoo ang ngan katara lomim medana ye betanga yo awete pang nga.
4Le ang nga kayepe yau nga, ngan au i ole ayepe yang nen lapau. Ngan kumata le wain baene atu be iso ye wain kaini le imede tiap nga, ngan o ke be ya taunu ipu a itar kanono, ngan tiap. Ngan gaongo leu, kumata le ang ngan kayepe yau le kamede tiap nga, ngan o ke be kayeie so siap lapau.
5“Au i ooroo wain kaini, inbe ang ngan dawa ben wain baene. Ngan kumata tool be iyepe yau le imede inbe au ayepe ye nga, ngan ole urata ki yo iyei, ngan itar kanono dook mata. Bong kumata be iyepe yau tiap nga, ngan o ke be iyeie so siap lapau.
6Kumata le tool atu be iyepe yau le imede tiap nga, ngan ole dawa ben kai baene yo tingedekati a tikatte le iwor i. Ngan kai baene yo nen nga, ngan ole di tooltool tiwinoko, inbe tikatte lo ei lono a ei ikan.
7Bong kumata be kayepe yau le kamede, inbe kaparama betanga kiau a katoo dook nga, ngan soo so yo lomim be katorau ye nga, ngan ole akap pang le imot.
8Inbe ye kene yo be kayei so nen le itar kanono nga, ngan ole ipaposang ben ang ngan di galiuk moolmool. Le ye dada in la be kayeie Tamak ene le ilo ete ke be di tooltool tipayiti ye i.
9“Au i lok pang mai san, dawa ben Tamak yo lono pau mai san i. Ngan kumata le be katoo betanga kiau yo akap pang nga, ngan ole lok pang mai san, dawa ben yo atoo betanga ke Tamak nga, ngan le Tamak lono pau mai san nga. Ngan nen le kaparama dada tani yo be lok pang mai san ye i, in le imede.
11“Ngan au i awete pang ye so nga le imot, a be nen ngan ayeie ang le lomim ponana dawa ben au i. Le moolmool, lo ponana kiang tani in ole mai le mai san.
12Le betanga kiau yo be katoo ngan nen: Lomim pang di diemim mai san, dawa ben yo au i lok pang mai san nga.
13Kumata tool atu be lono pang di tooltool ki mai san, le ya taunu iraia tinini be imata a ilon di ye nga, ngan ya in ipatnaii ben dada ki yo be lono pang di tooltool ki ye mai san i, in illos dada yo kapala nga.
14“Kumata be katoo betanga kiau yo akap pang ngan dook nga, ngan ang nga ben di tooltool kiau.
15Ngan nen le au i ke be akiu ang ye kapraingi mulu tiap, yesoo tool yo iyei kapraingi i, in lon galanga ye so yo tool mai ki iyei, ngan tiap. Ngan nanga, ole akiu ang ye di tooltool kiau, yesoo betanga le imot yo Tamak iwete pau ye nga, ngan la awete pang ye koot nga.
16Ang ngan kapootau tiap, bong au i la apootang, inbe akap gurana pang be la kayei urata, a be nen ngan urata kiang tina ngan itar kanono, ngan kanono ole iken nen a tala. Le kumata be kapatarau pang Tamak ye au ek, inbe katoru ye so sa be ikauu pang nga, ngan ole ikauu pang.
17Le betanga kiau yo akap pang nga, ngan nen: Lomim pang di diemim mai san.”
18Motong la Yesu iwete pang di galiunu tina ngan mulu nen, “Kumata le di tooltool ke tana i be tikadonang nga, ngan lomim tut nen, muku ngan tikadonau nen lapau.
19Kumata le be ang ngan kayepe ben di tooltool ke tana i nga, ngan ole lodi pang mai san ben ang ngan di tooltool kidi tapdi nga. Ngan ye punu yo tikadonang ye i, in nen, ang nga ke tana i tiap, yesoo apootang be ole kayege dada le momo yo ke tana i nga.
20Le lomim tut betanga yo awete pang koot nga: ‘Tool yo iyei urata ben kapraingi i, in ene mai le illoso tool mai ki, in tiap.’ Ngan nanga, kumata be di tooltool tiyei dada dook tiap be tigarungau ye nga, ngan ole tigarungang nen lapau. Inbe kumata le titoo betanga kiau yo be apatomonai di ye nga, ngan ole titoo betanga kiang nen lapau.
21Ang ngan man katoo au le ole tiyei dada dook tiap yo nen ngan pang, yesoo di ngan lodi galanga ye Tool yo iwangau a asi i, in tiap.
22Le au i yo be asi a si awete betanga nga pang di tiap nga, ngan matin nga le taukadi noonoo yo be tisolo nga. Bong nookoot nga, taukadi dada yo be tiyei ne, ‘Am nga lomam galanga be so yo amyei, ngan amkapsap ye noonoo, nga tiap.’
23Ngan nen le sei tool yo be ikadonau i, in ikadono Tamak nen lapau.
24Ngan yo be amye di amyepe inbe ayei urata medana yo tool sa ke be iyei tiap, ngan tiap nga, ngan matin nga le taukadi noonoo yo be tisolo nga. Bong nookoot nga mos yo ayei ngan tikamata oo, bong tina la tikadonau le tipoorootau pa ye Tamak nga.
25Le dada yo tiyeii i, in be nen a iyeie betanga atu yo tiwode lo ye ger kidi in le itar kanono moolmool. Ngan betanga tani in iwete nen, ‘Taukadi punu yo be tikadonau ye i.’
26“Bong Loningi kiang yo be awanga a isi pang yang i, in iye Tamak tiyepe. Ya in Maro Amunu, inbe au i ole awanga a isi be si ipapos betanga moolmool ke Maro, inbe iwetewete pang di tooltool ye urata yo kiau nga.
27Le ang lapau kawetewete pang di tooltool ye urata kiau, yesoo kulkulunu yege ye kene yo apamaditi urata kiau ye in nga, ngan la ayang tayepe tayepe a se nookoot katai nga.”
