1Zhich guin wa Jesus stebkoo nis-Galilea ledne la ke nis-Tiberias.
2Ndalyaa ndalduxtee mén wa wanal Ne, porke wii men yra gyelmilaguer ne rlaa Ne ne rneseyaken Ne mén ne rzhuun.
3Lex wyeep Ne te txu gyeey wzob Ne yra Ne xpén Ne.
4Laatee cheguin zëdyob pask lni ne rlaa men-Israel.
5Chene wlis lo Ne, wii Ne ndalyaa ndalduxtee mén za lo Ne, lex re Ne lo Blib: ―¿Pazhleg yka be ne gu yra ménree?
6Per noze ne re Ne zenga chen gan pe gue Blib, porke che nan Ne gan pe ylaa Ne.
7Wke Blib, re Blib: ―Per ni lal ne run te mos gan txupgwyuu gbiz gaglodet por ne yka be gyëtxtil chen yganen men mase teblago teblago te te men.
8Lex wke ste xpén Jesus, men ne la Ndrizh bech Simon-Bëd, re men:
9―Nee zu te mee ne neey gaay gyëtxtil cebada no le txup mël, per ¿pe ylaandxee neree lo lal ne mén?
10Lex re Jesus: ―Gugue lo yra mén sob men. Kom kesentyent ndxiib gyizh lugar guin, lex wzob men. Zeg gaaymil nak nonchee mgyeey.
11Orguin wgoob Jesus gyëtxtil guin, wdee Ne dexkyizhtee lo Dëdyuzh. Wluzh nga wdee No lo yra xpén Ne, lex laa men wgyiizo lo yra mén ne zob nga; zenga ke wlaa Ne mël, wu men laltee ne wlaan men yrandxee men.
12Chene che wyezaa men, re Ne lo yra xpén Ne: ―Gutop yra ne wrukaa chen xiindeto.
13Lex wtop men yra gyëtxtilbla ne wrukaa, wsezaa men chibtxup tsegwed delo gaay gyëtxtil guin.
14Ne wii yra mén guin gyelmilaguer ne wlaa Jesus, re men: ―Nli ne laa profet ne rap degne chiid gyëzlyu nee.
15Per kom wdee Ne kwent ne rlaan yra mén guin sano men Ne lafwers chen ylaa men Ne rrey, lex wyeep Ne mazre gyadee xtoo gyeey guin chen su Ne tete Ne.
16Chene che zëdnit lyu, wzeeb yra xpén Jesus den wdxiin men runis,
17wdee men lenbark wdekaa men stebkoo nis chen ydxiin men Capernaum. Che waknkeb no gardet yberee Jesus.
18Orguin wzelo noze ndxeeb rak mël lo nis, tant zu mee.
19Chene che za bark zeg gaay o xuup kilometro, wii men le Jesus za, rzaa Jesus lo nis, zabig Ne lo bark; orguin kesentyent wdxe men.
20Per re Ne lo men: ―Noo nee, ydxedet de.
21Axtegue rzhiilen men yra men ne le Jesus wdee lenbark, no orke guin wdxiin men ledne za men.
22Nan yra mén ne wyan stebkoo nis ne tendxee bark zu nga. Chene wra gyëël, wyenen men ne lenbark guin za yra xpén Jesus no wyenen men ne zadet Ne yra Ne xpén Ne.
23Orguin wdxiin txup tson xbark men-Tiberias guex ledne wu men gyëtxtil chene wluzh wdee Jesus dexkyizhtee lo Dëdyuzh.
24Ne wii yra mén guin ne yëtet Jesus nga ni xpén Ne, wdee men lenbark guin za men Capernaum zaye men Ne.
25Chene wdxiin men Capernaum, wzël Jesus lo men, lex re men lo Ne: ―Maxter, ¿pa or wlenza de nee?
26Wke Ne re Ne: ―Nanwen noo ne ryedet de noo por gyelmilaguer ne wii de wlaa noo, sinke noze por ne wu de axtegue wyezaa de.
27Ylaadet de dxiin noze por gyelwu ne rluzh, sinke gulaa dxiin por gyelwu ne rluzhdet ne rguu gyelembán ne nunk luzhdet, laa gyelwuree nak ne yseleedx Men ne wdxiid wak Mén, porke laa Dëdyuzh nak ne wzu men ne yseleedx meno.
28Lex wnabdiiz men, re men: ―¿Pagox rap noo degne ylaa noo chen ylaa noo ne rlaan Dëdyuzh?
29Wke Jesus, re Ne: ―Logne rlaan Dëdyuzh ne ylaa de nak ne ylaleedx de men ne wxaal Dëdyuzh ne zëëd men.
30Lex re men: ―¿Pe gyelmilaguerzhe ylaa de ne kwii noo chen ylaleedx noo de? ¿Pagox run de gan rlaa de?
31Xpenkwlal be, maná wu men chene wkaa men denbidx zegne zëëd lo xgyiich Dëdyuzh ledne re: “Wdee men gyëtxtil-gyeybaa wu men yra men.”
32Orguin re Jesus: ―Nligue yna noo lo de ne let Moisesdet wdee gyëtxtil-gyeybaa wu men, sinke laa Xuz noo nak ne rdee merpee gyëtxtil-gyeybaa ru mén.
33Porke gyëtxtil ne rdee Dëdyuzh, laa we nga nak ne wruu gyeybaa, rguu we gyelembán lextoo mengyëzlyu.
34Lex re men lo Ne: ―Dechey, guniiz gyëtxtil guin lo noo yzaandxee dxe.
35Wke Jesus, re Ne: ―Noo nak gyëtxtil ne rguu gyelembán; mén ne chiid lo noo, ydxiindetre dxe ne ylaanen men; men ne ylaleedx noo, ydxiindetre dxe ne ylaan men nis.
36Per zegne che na noo lo de, mase che wii de noo, per rlaleedxdet de noo.
37Yrandxee mén ne rniiz Xuz noo lo noo, schiid men lo noo; no yrandxee mén ne chiid lo noo, ychereedet noo men.
38Porke wruudet noo gyeybaa por ne ylaa noo ne rlaan noo, sinke le noo zëëd por ne ylaa noo ne rlaan Xuz noo ne wxaal noo zëëd noo.
39Logne rlaan Xuz noo ne wxaal noo zëëd noo nak ne ni te mén ne wniiz me lo noo ylaadet noo men perdid, sinke yneban noo men chene che lultim dxe.
40Ne rlaan Xuz noo nak ne yrandxee mén ne ykalo XPee me no ne ylaleedx XPee me, gap gyelembán ne nunk luzhdet; noo yneban men chene che lultim dxe.
41Orguin wzelo yra men-Israel rnii men por Jesus por ne re Ne ne laa Ne nak gyëtxtil ne wruu gyeybaa.
42Re men: ―¿Pe let laadet Jesus xpee Xeb nee? Rnebeey be xuz men no rnebeey be xnaa men. ¿Pezee ne yna men ne gyeybaa wruu men?
43Lex re Jesus lo men: ―Gusaan ne rnii de por noo.
44Laa Xuz noo wxaal noo zëëd noo. Rut gakdet ylenza lo noo belne yxaaldet Xuz noo men; noo yneban men chene che lultim dxe.
45Lo liber ne wkaa profet re: “Dëdyuzh yneluu yrandxee mén.” Por neguin yrandxee mén ne rkagyedyag xdiiz Dëdyuzh no ne rseed ne rneluu Dëdyuzh, lo noo ylenza men.
46’Nakdeto ne nuu mén che wii Dëdyuzh, sinke nonchee men ne wruu lo Dëdyuzh, laa men guin nak ne che wii Dëdyuzh.
47Nligue yna noo lo de, mén ne rlaleedx noo che rap men gyelembán ne nunk luzhdet.
48Noo nak gyëtxtil ne rguu gyelembán.
49Xpenkwlal de, mase wu men maná denbidx, per wet ke men.
50Per le gyëtxtil ne rzëët noo lo de gyeybaa wruu we; mén ne gu we, zap men gyelembán ne nunk luzhdet.
51Noo nak gyëtxtilmbán ne wruu gyeybaa; men ne gu gyëtxtilree, zap men gyelembán ne nunk luzhdet. Gyëtxtil ne rdee noo ledpee noo nako; ydee noo we chen gap mengyëzlyu gyelembán ne nunk luzhdet.
52Orguin wzelo men-Israel rulsaa men diiz, re men: ―¿Pezee gak yniiz ménree led men gu be?
53Wke Jesus, re Ne: ―Nligue yna noo lo de, belne gudet de led Men ne wdxiid wak Mén no belne goodet de xren men, gapdet de gyelembán ne nunk luzhdet.
54Per le men ne gu led noo no ne goo xren noo, zap men gyelembán ne nunk luzhdet; noo yneban men chene che lultim dxe.
55Porke led noo nak merpee gyelwu, no xren noo nak merpee ne roo mén.
56Men ne gu led noo no ne goo xren noo, men guin syemper zu kon noo, noo syemper zu kon laa men.
57Laa Xuz noo wxaal noo, mbán me, no zegne mbán noo por laa me, zenga ke men ne gu led noo, por noo gap men gyelembán ne nunk luzhdet.
58Noo gyëtxtil ne wruu gyeybaa rzëët noo; gyëtxtilree nakdeto zegnak maná ne wu xpenkwlal de, porke mase wu meno, per wet ke men; per le men ne gu gyëtxtilree ne rzëët noo, zap men gyelembán ne nunk luzhdet.
59Yra neree wneluu Jesus mén lenydo-Capernaum.
60Chene wluzh won yra xpén Jesus neree, ndalyaa men re: ―Axtegue ne gakdetlel rnii men; ¿txu ykagyedyag ne rnii men?
61Wdee Jesus kwent ne re men zenga, lex re Ne lo men: ―¿Pe rzaknyaan de neree ne na noo lo de?
62¿Pagoxleg tsuu lextoo de belne kwii de gyeep Men ne wdxiid wak Mén ledne wuu men chekwlo?
63Laa Espíritu Sant rseleedx gyelembán lo mén; belne yëtet Espíritu Sant, bat ykyiindet noze mén. Yra diiz ne wzëët noo lo de yra de, espíritu nako no le gyelembán.
64Per nuu de gardet ylaleedx noo. Re Jesus zenga porke axtegue chekwlo che nan Ne gan txuzh rlaleedxdet Ne no gan txuzh ydekwent Ne.
65No re Ne lo men: ―Por neguin na noo lo de ne rut gakdet ylenza lo noo belne yxaaldet Xuz noo men.
66Kwlote nga ndalyaa men ne che nak xpén Jesus wsalzaan men Ne, wanaldetre men Ne.
67Lex wnabdiiz Ne lo yra chibtxup xpén Ne, re Ne: ―¿Pe no de rlaan gya?
68Wke Simon-Bëd, re Simon-Bëd: ―Dechey, ¿txu lo nak ne tsa noo? Si nonchee xdiiz de nak ne rseleedx gyelembán ne nunk luzhdet.
69No che rlaleedx noo de yra noo no nan noo ne laa de nak Crist XPee Dëdyuzhmbán.
70Wke Jesus, re Ne: ―Mase noo wye de yra de chibtxup de, per te de nak Bzelo.
71Xkwent Judas xpee Simon Iscariote rzëët Ne ne re Ne zenga. Porke laa Judas nak men ne wdekwent Ne, mase te ke men ne nak xpén Ne chibtxup nak Judas.
