1Xuup gbiz antes pask, wa Jesus Betania, ledne nuu Laser ne wa Jesus waneban Jesus.
2Nga wzhexkwaa men te xsëë por Jesus; laa Mart kagaa nesyaa, le Laser nak te men ne zob lo mezh yra Laser Jesus.
3Orguin wgoob Mli zeg gwrool liter perfum ne kesentyent nyezh non ne nzhexkwaa kon teblose gyexnazh byaa, wdxiib meno led nii Jesus, lex wkwiidx meno kon gyitsxtoo men. Ydendxee lenyuu wrenex.
4Orguin re Judas Iscariote ne wak ke te xpén Jesus no ne wdekwent Jesus:
5―¿Penak wtoodet men perfum gwa no ndoo we lal ne run mos gan zeg te iz, chen nruu med nkyiinen menprob?
6Per redet Judas zenga por ne za menprob lextoo Judas, sinke por ne ngbaan men; rbaan men med ne rguu mén lenbols, kom laa men nzen bols guin.
7Lex re Jesus: ―Zeka wnaaree; neree ne wlaa men, wlaa meno chen che list nak noo chene tsugyeer noo.
8Porke menprob yzaandxee dxe tsuu men lad de, per le noo che xchedetre tsuu noo lad de.
9Ndalyaa men-Israel waknan ne Betania ka Jesus, lex wa men nga, per wadet men noze por ne kwii men Jesus, sinke no por ne kwii men Laser ne wa Jesus waneban Jesus.
10Por neguin wyan yra fxuz ne rnebééy lo yra fxuz diiz ne yket men no Laser,
11porke por ne wneban Jesus Laser, ndal men-Israel zaruu lad men zalaleedx men Jesus.
12Ne wra gyëël guin, menroo menduxtee ndxin Jerusalén por ne gan men lni; ne won men ne le Jesus zadxiin Jerusalén,
13wtxuug men zin wzen men, wruu men watsëlnëz men Jesus, noze nesree nesrotee rlen xrëz men, re men: ―¡Nzoon Dëdyuzh! ¡Dëdyuzh gaknonen men ne zëëd por la Dëdyuzh! ¡Laa men nak xerrey men-Israel!
14Kom wzël te bur bëën bëënleg, wzob Jesus led zegne zëëd lo xgyiich Dëdyuzh ledne re:
15Men gyëz-Sión, ydxedet de; gukwii, le xerrey de zëëd nee, zëdmbib men te bur bëën bëënleg.
16Wdeedetgue xpén Jesus kwent neree, per chene che sya Jesus gyeybaa, wdee men kwent ne zenga zëëd lo xgyiich Dëdyuzh ledne rakzëët xkwent Jesus no zenga wako.
17Mén ne zu yra Jesus chene wbëz Ne Laser ne yruu Laser lenbaa no ne wneban Ne Laser, laa men ruu diiz ne wii men wneban Ne Laser.
18Por neguin ndal mén wruu watsëlnëz Ne por ne won men gyelmilaguer guin ne wlaa Ne.
19Lex rulsaa yra men ne nak farisew diiz, re men: ―Betre gakdet ylaa be. ¡Gukwii, yrandxee mén za zanal men!
20Lad yra mén ne wa Jerusalén por ne saknon men Dëdyuzh lo lni, ndxin tebëd men-griego;
21wbig mén guin lo Blib men ne nak men-Betsaida gyëz ne nak lo lyu ne la Galilea, lex re men lo Blib: ―Dechey, rlaan noo gu noo diiz yra noo Jesus.
22Orguin wa Blib re Blibo lo Ndrizh, lex wa men yrup men wa gue meno lo Jesus.
23Wke Ne re Ne: ―Le or ne gaknyoo xgyelenzoon Men ne wdxiid wak Mén che wdxiin.
24Nligue yna noo lo de, ne zegnak te zhobxtil, belne tsuudeto lenlyu, tetegue nako; per belne tsuu we lenlyu, rakndalo.
25Mén ne rkaa xgyelembán lextoo nee gyëzlyuree, zako perdid; per le mén ne rboleedx xgyelembán por ne nak men xpén noo, zap men gyelembán ne nunk luzhdet.
26Belne nuu mén rlaan ylaa xdxiin noo, rap men degne chidnal men noo, no ledne tsuu noo, nga ke tsuu men. Men ne rlaa xdxiin noo, Dëdyuzh Xuz noo ylep xeblaan men.
27’Kesentyent nles nuu lextoo noo orree. ¿Pe gueleg noo? ¿Peguin ze noo: “Dëde, guselaa noo lo gyelenlesree”? Per por neree nerendxee zëëd noo gyëzlyuree.
28Lex re Ne: ―Dëde, guluu xgyelenzoon de lo yra ménree. Orguin wlen te rëz gyeybaa, re we: ―Che wluu noo we, per sluu noo we ste.
29Ne won yra mén ne ndxin nga rëz guin, nuu men re: ―Ngwzii we. Nuuzeg men re: ―Te angel wnii lo men.
30Lex re Jesus lo men: ―Let por noodet nak rëzree ne won de, sinke por laa de yra de nako.
31Le or che wdxiin ne gak gyelextis gyëzlyuree no che ke wdxiin or ne koo Dëdyuzh Bzelo nee gyëzlyuree, ynebééydetre men.
32No chene che wkaa noo lo kruz, yralondxee mén gak xpén noo.
33Neree ne re Ne, wzëët Ne gan pezee guet Ne.
34Lex wke yra mén guin, re men lo Ne: ―Noo yra noo nan noo ne lo xgyiich Dëdyuzh zëëd ne nunk guetet Crist. ¿Penak na de ne Men ne wdxiid wak Mén rap men degne ykaa men lo kruz? ¿Txu wa nak Men ne wdxiid wak Mén?
35Orguin re Ne: ―Xchedetre ykaa noo lad de yra de, noo nak bnii por laa de. Gutanal noo naaster ne benak ka noo lad de chen saadet de lo nkeb. Porke men ne za lo nkeb nandet men pa za men.
36Por neguin naaster ne benak ka noo lad de yra de, noo nak bnii por laa de, gulaleedx noo chen gak de xpén noo. Wluzhse re Ne yra neree, sya Ne, wkanyoodetre Ne.
37Mase ndal gyelmilaguer wlaa Jesus nes lo men yra men, no wlaleedxdet men Ne,
38porke rap degne gak kumplir ne wkaa profet-Isaías ledne re: Dëde, rut rlaleedxdet ne rzëët noo yra noo. Rut ryenden ne rap de poder.
39Por neguin wlaleedxdet men Ne, porke rap degne gak kumplir ne wkaa ke profet-Isaías ledne re:
40Dëdyuzh wlaa ne wak men zegnak menngwlëë no wlaa Ne ne wakndíp lextoo men, chen kwiidet men, ni ydeedet men kwent, ni ysaandet men xgyelmal men chen gakdet yláá men lo xdol men.
41Re Isaías neree porke wii men xgyelenzoon Jesus, por neguin wzëët men xkwent Ne.
42No mase zenga, ndal men-Israel wlaleedx Ne, axtegue no tebëd men ne rnebééy wlaleedx Ne; per wkedxnruu meno lo mén por ne rdxe men ne ydeedetre yra men ne nak farisew si tsa men lenydoo.
43Porke mazre wtseleedx men ne saknon mén men ke ne saknon Dëdyuzh men.
44Ndípse wnii Jesus, re Ne: ―Mén ne rlaleedx noo, let nozdet noo rlaleedx men, sinke rlaleedx ke men Xuz noo ne wxaal noo zëëd noo.
45Men ne rwii noo, rwii ke men Xuz noo ne wxaal noo zëëd noo.
46Noo nak bnii, zëëd noo gyëzlyuree chen por ne men ne ylaleedx noo tsuudetre men lo nkeb.
47Men ne ron xdiiz noo per rukasdet meno, let noodet yzakzi men; porke zëëdet noo por ne yzakzi noo mén, sinke le noo zëëd por ne yselaa noo mén lo dol.
48Men ne rukasdet noo no ne rlaandet gon xdiiz noo, che nuu ne yzakzi men. Yra diiz ne wzëët noo, laa we nak ne yzakzi men chene che lultim dxe.
49Porke noo rniidet noo noze xkwent noo, sinke laa Xuz noo ne wxaal noo nak ne wzëët lo noo gan pe gue noo no gan pe ynii noo.
50No nan noo ne por logne wkyeen Xuz noo noo gap mén gyelembán ne nunk luzhdet. Por neguin logne rzëët noo, rzëët noo we zegne wkyeen Xuz noo noo.
