1Pues entonces cꞌotoy e día conda cꞌanix achena e nojqꞌuin pascua y e Jesús war unata que cꞌanix acꞌotoy e hora conda tuaꞌ alocꞌoy tara tor e rum tuaꞌ asutpa axin tut Utata tut e qꞌuin. Y war uyajta utobꞌ meyra tunor tin e war acꞌupseyanobꞌ tamar, y tamar era cꞌani uchectes tutobꞌ cobꞌa war uyajta utobꞌ tunorobꞌ.
2Y ya turu e Jesús tor e mesa war aweꞌ taca uyajcanuarobꞌ tama e tarde. Pero cocha ochoyix e diablo tama uyalma e Judas Iscariote xeꞌ jax uyunen e Simón, jaxir war ubꞌijnu tuaꞌ axin utuchꞌi ut e Jesús tut tin e war aqꞌuijna uwirobꞌ ut tuaꞌ aqꞌuejcha axin tama e cárcel.
3Pues e Jesús war unata que Utata cꞌapa uyajcꞌu tunor lo ayan tama ucꞌabꞌ, y que tari tut e Dios y que cꞌani asutpa axin tut e Dios otronyajr.
4Y conda war awiobꞌ tor e mesa, achpa wawan e Jesús y ulocse intꞌojr ubꞌujc y uchꞌami inteꞌ payuj y ubꞌaqꞌui tama unac.
5Entonces uyari e jaꞌ tama inteꞌ upojquibꞌ cꞌabꞌ y cay upoqui uyocobꞌ uyajcanuarobꞌ, y cay utaquijse uyocobꞌ taca e payuj lo que bꞌacꞌar tama unac.
6Entonces conda cꞌotoy tut e Pedro tuaꞌ upoqui uyoc cay ojron jaxir y che: —Niwinquiraret, ¿net ca tuaꞌ apoqui nioc? che e Pedro:
7Y che e Jesús: —Machito anata tucꞌa tuaꞌ war inche tunor era. Pero icꞌotoyto anata, che e Jesús.
8Entonces sutpa ojron e Pedro che: —Pero nen ma tiaꞌ tuaꞌ inwactet apoqui nioc, che e Pedro. Entonces e Jesús che: —Jay machi awacta abꞌa tuaꞌ impoqui oꞌc, ma erer iquetpa inteꞌ niwajcanuar, che e Jesús.
9Entonces che e Pedro: —Jay bꞌan anata, Niwinquiraret, ira apoqui nioc taca, sino que poco nicꞌabꞌ y poco nijor ubꞌan, che e Pedro.
10Y che e Jesús: —Tin e wartocto acꞌapa aꞌti machi ucꞌani tuaꞌ aꞌti otronyajr, sino que jax taca uyoc tuaꞌ apoctzꞌa. Y tamar era nox matucꞌa e bꞌonemar tamarox. Pero ayan inteꞌ xeꞌ ayanto e bꞌonemar tamar, che e Jesús.
11Pues e Jesús cay che que ayan inteꞌ xeꞌ ayanto e bꞌonemar tamar porque war unata chi umen tuaꞌ atujchꞌa.
12Entonces conda cꞌapa upoqui uyoc uyajcanuarobꞌ, sutpa ulapi ubꞌujc y turuan tor e mesa otronyajr y che: —¿Inata ca tucꞌa inche tacarox era?
13Nox iwaren que nen Iwajcanseyajen y que nen Iwinquiraren. Y bueno que war iwaren cocha era porque jax.
14Pues jay nen xeꞌ Iwajcanseyajen y xeꞌ Iwinquiraren cay impoqui iyoc nox, entonces nox ubꞌan ucꞌani tuaꞌ ipoqui uyocobꞌ e inmojr inteꞌ intiox.
15Pues cay inche tunor era tuaꞌ inwirsiox lo que ucꞌani tuaꞌ iche nox. Chenic ubꞌan nox bꞌan cocha cay inche nen era.
16Cꞌani inwareox era que inteꞌ man majax más nuquir winic que upatron. Y tin e ebꞌetbꞌir axin majax más nuquir winic que tin e uyebꞌta ixin.
17Pues jay inata tunor era cꞌani ixtzay jay iturbꞌa ibꞌa tamar.
18’Pero machi war onjron tama tunorox, porque nen innata chi xeꞌ sicbꞌabꞌir nimener. Y cꞌani acꞌapa achempa tunor lo que chꞌar tzꞌijbꞌabꞌir tama uyojroner e Dios tiaꞌ che que: “Tin e cay weꞌ tacaren cꞌani aqꞌuijna nipater.” Bꞌan che tama uyojroner e Dios.
19War inwareox tunor era bꞌajxan conda merato anumuy porque tamar era conda axin anumuy ixixin ixcꞌupseyan tamaren que nen jax e Ajcorpesiaj tuaꞌ tunor e gente tara tor e rum.
20Cꞌani inwareox era que tunor tin e axin uchꞌami tin e inwebꞌta axin war uchꞌamien nen ubꞌan, y tunor tin e uchꞌamien nen war uchꞌami ubꞌan tin e uyebꞌta tarien, che e Jesús.
21Entonces conda e Jesús cꞌapa ojron cocha era cay uqꞌui tama uyalma y uyare uyajcanuarobꞌ y che: —Cꞌani inwareox era que ayan inteꞌ tijam xeꞌ tuaꞌ axin utuchꞌien, che e Jesús.
22Entonces uyajcanuarobꞌ cay uwira ubꞌobꞌ, pero machi unatobꞌ chi tamar war oꞌjron.
23Y ayan inteꞌ uyajcanuar xeꞌ más achojresna ut umen e Jesús xeꞌ war aweꞌ tuyejtzꞌer tama e wiar era.
24Entonces e Simón Pedro cay uche ucꞌabꞌ tut e ajcanuar era xeꞌ turu tuyejtzꞌer e Jesús tuaꞌ asutpa uyubꞌi tuaꞌ e Jesús que: “¿Chi umen tuaꞌ itujchꞌa?”
25Entonces e ajcanuar era uqꞌueche uyej más tut uchiquin e Jesús y uyubꞌi tuaꞌ y che: —¿Chi era, Niwinquiraret? che uyajcanuar era.
26Y che e Jesús: —Cꞌani inxere imbꞌijc e pan tuaꞌ intzꞌayi y tin e iwira que inwajcꞌu e pan era, natanic que jax era, che e Jesús. Y tamar era cay uxere imbꞌijc e pan y utzꞌayi, y uyajcꞌu e Judas Iscariote xeꞌ uyunen e Simón.
27Entonces conda e Judas uchꞌami e pan wacchetaca ochoy e Satanás tama uyalma. Entonces ojron e Jesús y che: —Lo que quetpa tuaꞌ ache, chen rajxa era, che e Jesús.
28Pues mamajchi xeꞌ turobꞌ tor e mesa era cꞌotoy unatobꞌ tucꞌa tuaꞌ ojron e Jesús cocha era taca e Judas.
29Pues e Judas jax xeꞌ quetpa tuaꞌ uqꞌueche axin e tumin tuaꞌ e inmojr era, y tamar era ayan tin e cay ubꞌijnuobꞌ que e Jesús uyare e Judas tuaꞌ axin umani lo que ucꞌani tama e nojqꞌuin era. Pero ayan ubꞌan tin e cay ubꞌijnuobꞌ que cꞌani axin uyajcꞌu e tumin tin e tzajtaca ut.
30Entonces conda e Judas cꞌapa uchꞌami e pan wacchetaca locꞌoy ixin, cocha warix acbꞌare era.
31Pues entonces conda cꞌapa locꞌoy e Judas cay ojron e Jesús y che: —Coner era cꞌani achecta nitawarer xeꞌ Uyunenen e winic, y cꞌani achecta utawarer Catata Dios tamaren ubꞌan.
32Y cocha nen era xeꞌ Uyunenen e winic cꞌani inchectes utawarer Catata Dios, jaxir cꞌani asutpa uchectes nitawarer nen ubꞌan, y bꞌan tuaꞌ uche rajxa era.
33Pues machi ixto tuaꞌ inquetpa tacarox nox xeꞌ bꞌanox cocha nimaxtac. Nox ixixin isajquen, pero bꞌan cocha cay inware e winicobꞌ xeꞌ tuobꞌ e Israel y bꞌan tuaꞌ inwareox nox ubꞌan: “Tiaꞌ inxin nen, nox machi uyubꞌiox ixcꞌotoy.”
34Cꞌani inwareox inteꞌ ojroner xeꞌ imbꞌutz xeꞌ jax era: Yajtanic ut ibꞌa inteꞌ intiox. Bꞌan cocha nen war inyajta iut, y bꞌan ubꞌan tuaꞌ iyajta ut ibꞌa inteꞌ intiox.
35Porque jay iyajta ut ibꞌa tunorox entonces tunor e gente tara tor e rum cꞌani acꞌotoy unatobꞌ que nox niwajcanuarox, che e Jesús.
36Entonces e Pedro uyubꞌi tuaꞌ e Jesús y che: —Niwinquiraret, ¿tiaꞌ war iꞌxin? che e Pedro. Y e Jesús che: —Net machi uyubꞌiet iꞌxin tiaꞌ war inxin era, pero nacpat era erer iꞌxin tanipat, che e Jesús.
37Y che e Pedro: —Niwinquiraret, ¿tucꞌa tuaꞌ machi uyubꞌien inxin tapat coner era? Nen turenix tuaꞌ inwajcꞌu nibꞌa tamaret este que inxin inchamesna ani tamaret jay bꞌan ucꞌani, che e Pedro.
38Y che e Jesús: —¿O erachet ca nic que cꞌani awajcꞌu acuxtar tamaren? Cꞌani inwaret era que conda ne mato aꞌru e acꞌach tama e acbꞌar era, net iꞌxin amuqui nicꞌabꞌa uxyajr, che e Jesús.
