Jon 17

1

2

3

4

5

6

7

8

9

10

11

12

13

14

15

16

17

18

19

20

21

¹Namih Iesu ka use ta u arae, ka par ubase na kukulii, ma ka tara aragii: “Tata, aunbiing kiak ka tapiek mang. Me kem Kalalik, isi kem Kalalik ik me o.

²Wara le o ka ta rakrakai una nagogon tah usuf i na olon fanu tikii, isi ik ta liu fitliu sing fanu tikii ae o ka ta ta u usuf i.

³Liu fitliu i aragii, le fanu rin usum lo wo i tikii sau e God tekentu ke Iesu Karisito ae o wuun ufu tah uga.

⁴Ia ka finngas ta memeh kiam aga na piklinbat na aunbiing ia farop foron foim ae o ta ta u usuf iau isi ian tel u.

⁵Tata, igii on me iau, isi iak kiis turam sabin, ini memeh ae pakanini imel ta sing iau, aunbiing biil biitom o fakiis ta piklinbat.

⁶“Ia ka famalal ta asam usuf fanu ae o ta ufu ta ri usuf iau tina piklinbat. Ri kiam tom ma o ka ta ufu ta ri usuf iau, ma ri ka misuut tah na foron orek kiam.

⁷Igii ri ka usum mang le, foron tier tikii o ta ta u usuf iau, i la tom tinawii sing o.

⁸Wara le foron orek ae o ta ta u usuf iau, ia ka ta ta u usuf ri ma ri ka somangat pes ri. Ri ka usum le i tekentu le ia la tah tinbae sing wo, ma ri ka unune tah le wo tom o wuun ufu ta iau.

⁹Ia sising isi ri, ma biil isi fanu tikii na piklinbat. Biil. Isau le ia sising sau isi fanu ae o ta ta ri usuf iau, wara le ri kiam tom.

¹⁰Fanu tikii kiak, kiam, ma fanu tikii kiam, kiak. Ma ia ka kep memeh sing ri.

¹¹Igii, iak la mang usuf wo, biil in sawin lo iau aga na piklinbat, isau le ri kiis biitom na piklinbat. Tata, o kalkaluu, fofonoi lo ri ini rakrakai ae na asam ae o foteng ta iau ini, isi rik tapiek itikii arae kara tikii sau.

¹²Aunbiing ia kiis tah tura ri, ia parpar lo ri ma ia ka ubiif kale ri ini as ae o foteng ta iau ini. Biil tikas lo ri i mangmangal, isau le, itikii sau i mangmangal, i e Iudas tom fiu fitliu, isi ik fasuut orek ae na Buk na Gogoh.

¹³“Igii iak la mang usuf wo, isau le ia use foron orek igii, aunbiing ia kiis biitom aga na piklinbat, isi laes kiak ik kuruung tikii ri.

¹⁴Ia ka ta foron orek kiam tah usuf ri, ma fanu na piklinbat ri ka ememse ta ri. Wara le, biil mang ri tinaga na piklinbat. Arae iau sabin biil tinaga na piklinbat.

¹⁵Biil ia sising le on kep ufu ri tinaga na piklinbat. Biil. Isau le ia sising isi on fofonoi lo ri koseng kaltu laulau.

¹⁶Biil ri tinaga na piklinbat, arae iau sabin biil tinaga na piklinbat.

¹⁷Fakalkaluu ri ini tekentu, ma orek kiam i tekentu kanaka.

¹⁸Arae o wuun ufu ta iau uga na piklinbat, ke ia ka wuun ufu ta ri una marmarsan maleh na piklinbat.

¹⁹I wara lo ri, ia ka famam fakalkaluu iau tom, isi ri sabin rik kalkaluu tekentu.

²⁰“Biil ia sising isi ri keskes sau. Biil. Ia sising sabin isi fanu ae rin unune lo iau, wara na orek ken berberat na fafausum kiak.

²¹Ia sising isi ik tikii sau lo ri tikii. Tata, arae o patep lo iau, ma ia patep lo wo, isi ri sabin rik patep lo karah, isi fanu tikii na piklinbat rik unune le o wuun ta iau.

²²Ia ka ta ta u usuf ri e memeh ae o ta ta u usuf iau, isi rik tapiek itikii arae kara i tikii sau.

²³Ia patep lo ri ma wo patep lo iau, isi rik tapiek tutus arae itikii sau, isi fanu na piklinbat rik usum le, o wuun ta iau, ma o ka ier kanaka isi ri, arae o ier kanaka sabin isi iau.

²⁴“Tata, ia ier isi fanu ae o ta ta ri usuf iau, isi rin kiis turang na falifuh ae ia kiis wah, ma isi rik par memeh kiak. I e memeh ae o ta ta u usuf iau, wara le o ier kanaka isi iau aunbiing biil biitom o fakiis ta piklinbat.

²⁵“Tata, o tom tortores, taftawa le fanu na piklinbat biil ri usum lo wo, isau le ia usum lo wo ma fanu igii ri usum le wo tom o wuun ufu ta iau uga.

²⁶Ia ka famalal ta wo usuf ri ma ian famam famalal wo biitom, isi famais kiam usuf iau ik kiis lo ri, isi iau tom iak patep lo ri.”