1Na famu sau na tel inen na Liuliu Kulef ken fan Iudaia, Iesu ka usum tah le aunbiing ka fatat isi in la koseng piklinbat ma ik fis usuf Tama. I ier kanaka isi fanu kia igii na piklinbat, ma igii, ka finngas tara na famais kia usuf ri, famais ae biil ti farfarop lo.
2Aunbiing ri ien na efef ae, Satan ka susuef ulo Iudas Iskariot kalalik ke Saimon, isi in ta ufu Iesu una liman foron tuui.
3Iesu ka usum tah le, Tama ka luun ta foron tier tikii na piklin rakrakai kia, ma God tom i tule ta u uga ke in fis sabin usuf God.
4Pesu ka aptih tina tel inen ae, ka tel ufu kolos kia tina maleh lo, ma ka fis taol awii na lifa.
5Namih, ka to dan una nenge tara na luunluun dan, ke ka sufe keken berberat na fafausum kia, ma ka salis fasengseng kekri ini taol ae i fis ta u na lifa.
6Iesu ka la usuf Saimon Pita, ke Pita ka tara sing i aragii, “Kumguui, on sufe kekeng sabin?”
7Iesu ka kiliis u aragii, “Biil o usum na sanih ia tel u igii, isau le namih mang on usum.”
8Pita ka tara sing i aragii, “Biil. Gong o sufe kekeng.” Ke Iesu ka kiliis u aragii, “Male biil ian sufe iun kekem, ke biil mang on tapiek kalalik na fafausum kiak.”
9Pita ka tara aragii, “Kumguui, biil iun kekeng sau, sufe iun limang ke paklung sabin.”
10Iesu ka kiliis u aragii, “Kaltu ae ka susuh tah, ka fuuh ta e fo, ma biil mang in susuh sabin, in sufe iun keke sau, wara le pununfo tikii ka fuuh tah. Ma gam ka fuuh, isau le biil e gam tikii.”
11Wara le Iesu ka usum tah lo seh in ta ufu u na liman tuui, pesu ka use u aragii le, biil e gam tikii gam ka tapiek fuuh tah.
12Aunbiing Iesu ka farfarop na sufe foron kekri, ka fakau fafis kolos kia ma ka fis una sala, ke ka diik ri aragii, “Arafah, gam usum na sanih ia ka tel ta u ini gam?
13I tekentu tom ae gam ka kam iau ini ‘Tom Fafausum’ ke ‘Kumguui,’ wara le iau tom e ier ae.
14Iau arae Kumguui ke Tom Fafausum kimi, ia ka sufe kekmi tah isi namih gam sabin gamek sufe keken temtem tikii lo gam.
15Ia ka finngas ta gam ini nenge tintof isi gam sabin gamek tel u arae ia ka tel ta u kimi.
16Tekentu kanaka ia fas gam le, biil ti fafauun i laumet na famfamu kia, ke nenge kaltu ae i kep orek la biil i laumet na kaltu ae i wuun u la.
17Male gam usum na foron tier igii, ke gamen kep fafakalok sing i, male gam misuut lo ri.
18“Biil ia use u ulo gam tikii. Ia usum lon fanseh ae ia ka fulii pes ta ri. Isau le igii, una fatekentu orek ae na Buk na Gogoh, ae i tara le, ‘Kaltu ae i ien beret turang ka tapiek arae tuui kiak.’
19Ia fas gam igii, ma namih in tapiek, isi aunbiing in tapiek tekentu, ke gamek unune le iau sau e ier ae.
20Tekentu kanaka ia fas gam le, seh ae i somangat pes iau, i somangat pes seh ae i wuun ta iau.”
21Namih lo Iesu ka use ta u arae, ka purngis e bala ke ka use famalal u le, “Tekentu kanaka ia fas gam, neng lo gam tom in ta ufu iau una liman foron tuui.”
22Foron berberat na fafausum kia ri ka faparia fis tom ini ri, ma ri ka wol pane le Iesu i use seh tutus tom lo ri.
23Neng lon berberat na fafausum ae Iesu i ier kanaka la isi, i kiis fatat tom isi Iesu.
24Saimon Pita ka fas kalalik na fafausum ae le, “Diik u, i use seh tutus tom?”
25Ke kalalik na fafausum ae ka gigin fatat Iesu ma ka diik u le, “Kumguui, seh tom?”
26Iesu ka kiliis u aragii, “Seh sau ae ian falum tigan beret igii na dis, ma iak ta u usuf i, i sau e kaltu ae ia use u.” Ke, ka falum tigan beret, ma ka ta u usuf Iudas kalalik ke Saimon Iskariot.
27Aunbiing sau ae Iudas ka ien ta beret, Satan ka susuef ulo. Ma Iesu ka fas u aragii, “Sanih ae le on tel u, tel sape u.”
28Isau le, biil tikas lo ri awii na inen ae, i usum le isi sanih Iesu ka use u aragii ulo Iudas.
29Wara le Iudas i parpar la na pitkalang, ke fal e berberat na fafausum ri ka wol le Iesu ka fas u isi in fiil ti sanih ae in ier isi una tel inen ae, le in ta ti tier usuf foron lauu.
30Aunbiing Iudas ka ien ta beret ae, ke ka suuh koseng ri. Ma falifuh ka kubunor tah.
31Aunbiing Iudas ka la tah, Iesu ka fas ri le, “Igii Kalalik ken Kaltu ka kep memeh, ma God ka kep memeh sing Kalalik ken Kaltu.
32Male God i kep memeh sing i, ke God tom in me Kalalik ken Kaltu, ma fanpil, God in me u.
33Foron berberat kiak, ian kiis tura gam na tuklin aunbiing sau. Gamen im isi iau, arae sau ia ka fas ta foron famfamu ken fan Iudaia le, ‘falifuh ae ian la ulo biil ifasi gamen la ulo.’
34Nenge nagogon fuuh ia ta u sing gam aragii, ‘Gamen famais faliu ini gam. Arae ia ier kanaka tah isi gam ke gamen famais faliu ini gam.’
35Male gamen famais faliu ini gam, ke fanu tikii rin usum le gam berberat na fafausum kiak.”
36Saimon Pita ka diik u le, “Kumguui, on la uwah?” Iesu ka kiliis u aragii, “Falifuh ae ian la ulo, biil i fasih gamen la ulo igii, isau le namih gamen mi ulo.”
37Pita ka diik u le, “Kumguui, isi sanih, biil i fasih ian mi mang lo wo igii? Ia geges le ian met isi wo.”
38Ke, Iesu ka kiliis u aragii, “Arafah, o geges tom le on met isi iau? Tekentu kanaka, ia fas wo, famu na to in teng, ke fatuul e aunbiing on fakawe ufu iau.”
