Ioanej 17

1

2

3

4

5

6

7

8

9

10

11

12

13

14

15

16

17

18

19

20

21

¹IEJUJ kotin majani wei mepukat, ap kotin majanda nanlan majani: Jam ai, anjau o leler, en kalinanada japwilim omui Ol, pwe japwilim omui Ol en pil kalinanada komui.

²Duen komui kotiki on i er manaman, en poedi uduk karoj, pwe a en ki on karoj, me komui ki on i er, maur joutuk.

³A iet maur joutuk: Ren aja komui la, me komui ta Kot melel, o Iejuj Krijtuj, me komui kadarador.

⁴I kalinana komui dar nin jappa, I kanikialar dodok, me komui kotiki don ia, I en wiada.

⁵A met Jam ai, kom kotin kalinana kin ia pein omui linan, me I linanakier, ni ai mi re omui, ni jappa jaikenta mia.

⁶I kajanjale on aramaj akan mar omui, me komui ki on ia er jan nin jappa. Irail udan noumui, a komui ki on ia er irail; a re kin kapwaiada omui majan.

⁷A met re ajalar, me karoj, me komui ki on ia er, pwili jan komui.

⁸A majan akan, me komui ki on ia er, i me I ki on irail er, o irail aleer o wewekilar melel, me I pwarado jan komui, o re pojonlar, me komui kadar ia dor.

⁹I kin kapakapa kin ir, I jota kin kapakapa kin jappa, a irail, me komui ki on ia er, pwe noumui irail.

¹⁰Pwe karoj me ai, iei noumui; a karoj me noumui, iei ai o I linan kin irail lar.

¹¹I jolar mi jappa, a mepukat mi jappa. I kola re omui. Jam ai jaraui, kanikid irail ni mar omui, me komui ki on ia er, pwe irail en me ta men dueta kita.

¹²Ni ai mi re irail, I nikid irail er ni mar omui, me komui ki on ia er; I nikid irail er; jota amen ir jalonalar, jeri jalonala eta, pwe kijin likau en pwaida.

¹³A met I koko wei re omui. I padaki wei mepukat nan jappa, pwe ai peren unjok en mi re ’rail.

¹⁴I ki on irail er omui majan, o jappa kailon kin irail er, pwe irail kaidin kijan jappa, dueta, nai kaidin kijan jappa.

¹⁵I jota kin poeki, komui en wa irail jan nin jappa, a pwe komui en pera wei jan irail me jued.

¹⁶Irail kaidin kijan jappa, dueta nai kaidin kijan jappa.

¹⁷Kajaraui kin ir ala melel, pwe me melel omui majan.

¹⁸Duen komui kadar ia don jappa, iduen I kadar ir alan jappa.

¹⁹I kajarauila pein nai pweki irail, pwe irail kajaraui kila melel.

²⁰A kaidin mepukat eta, me I kapakapaki, a pil irail, me pan pojon ia pweki arail padak.

²¹Pwe irail karoj en me ta men, duen komui Jam podidi on ia o nai on komui, pwe irail en pil me ta men re ata, pwe jappa en pojon, me komui kadar ia dor.

²²A linan, me komui ki on ia er, I ki on irail er, pwe irail en me ta men, dueta kita me ta men.

²³Nai on irail, o komui on ia, pwe re en jon laieu, pwe jappa en aja, me komui kadar ia dor, o pok on irail, dueta komui pok on ia er.

²⁴Jam, I men, irail, me komui ki on ia er, en pil mi waja, me I kin mi ia, pwe ren ududial ai linan, me komui ki on ia er, pwe komui pok on ia er mon jappa a tapidar.

²⁵Jam ai pun, jappa jaja komui, a nai me aja komui, a mepukat ajaer, me komui kadar ia dor.

²⁶O I kajale on irail er mar omui. O I pan pil kajaleda i, pwe limpok ota, me komui poke kin ia er, en podidi on ir o nai on irail.