1Ca gudé gunná Jesús da caní, na' bdxúaje̱' nen benne' ca' dxusé̱dene̱' chee̱ chjaque̱' xecha la'a xe̱gu Cedrón. Lataj na' zé̱le̱'e̱ xaga olivo naga guxú'u Jesús nen benne' ca'.
2Cá'anqueze Judas, bénnea' dxudée̱' Jesús lu na' benne' ca' dxeledábague̱' Le̱', núnbe'e̱ lataj na' lawe' da zane' lasa guxíaj Jesús na' nen benne' ca' dxusé̱dene̱'.
3Ca' guca, bzrin Judas na' nen tu cue' benne' ca' dxjaque̱' wedil-la, ne nen bal-la benne' xra'aga we̱n zrin chee̱ xudau', benne' ca' gulesel-la benne' xíchaje̱ ca' chee̱ bxruze ca', ne benne' fariseo ca'. Zaj nu'e̱ xaga, ne xia ca', ne xi' ca', ne xi' xedxe.
4Jesús ba nézene̱' ca da gaca chee̱', na' chee̱ le̱ na' bdxúaje̱' lau benne' ca', na' bche̱be̱' le̱': ―¿Nuzra dxexílajle?
5Belexeche̱be benne' ca': ―Jesús, benne' Nazaret. Jesús beche̱be̱': ―Neda' na'. Judas, bénnea' dxudée̱' Jesús lu na' benne' ca' zúaqueze̱' ládujla benne' ca'.
6Gate gunná Jesús: Neda' na', na' benne' ca' belexebigue̱' lau Jesús, ne xeajlechazte̱' lu xu.
7Nadxa Jesús bche̱be̱' benne' ca' da xula: ―¿Nuzra dxexílajle? Gulenná benne' ca': ―Jesús, benne' Nazaret.
8Nadxa guzre Jesús benne' ca': ―Ba gucha' le'e neda' na'. Che dxexílajle neda', le güe benne' caní lataj cheajxaque̱'.
9Ca guca da nigá guca li ca gunná Jesús, gunné̱': “Benne' ca' be̱nna Xra' neda', netue̱' quebe bnitia'.”
10Nadxa Simón Pedro, ne nu'e̱ xia, guléaje̱' na, na' guchugue̱' naga da zua xabe̱la chee̱ Malco, we̱n zrin chee̱ bxruze blau.
11Jesús guzre̱' Pedro: ―Begú'u xia chiu' lu zre na. Ca da ba nun Xra' si' saca' neda', ¿quebe dxal-la' saca' na?
12Nadxa benne' dxjaca wedil-la, ne benne' dxenná be'ene̱' le̱', ne benne' xra'aga we̱n zrin chee̱ judío ca' gule̱l-le̱' Jesús, ne buluchéaje̱' Le̱'.
13Nadxa guleché̱'e̱ Jesús lizre Anás. Anás nigá naque̱' xrtau zri'ine Caifás, bénnea' naque̱' bxruze blau iza na'.
14Caifás nigá naque̱' bénnea' guzre̱' judío blau ca' gácadxa chawe' gate tuze benne' waláz chee̱ xe̱zr la xu chee̱'.
15Simón Pedro, ne xetú benne' ca' dxuse̱de Jesús zjaque̱' zeajnawe̱' Jesús. Benne' ljwezre Pedro nigá núnbea bxruze blau le̱'. Ca'an guca, benne' nigá guxú'ule̱ne̱' Jesús chale'aj lizre bxruze blau na'.
16Pedro begá'ane̱' dxu'a dxa xu'u da zua chale'aj na'. Chee̱ le̱ na' bdxuaj bénnea' núnbea bxruze blau le̱', na' bchálajle̱ne̱' nu'ula zua dxu'a dxa xu'u na', na' gulu'e̱ Pedro chale'aj na'.
17Nadxa nu'ula na' zua dxu'a dxa xu'u bche̱be̱' Pedro: ―¿Quebe nacu' lue' tuze nen benne' Nazaret na'? Pedro beche̱be̱': ―Quebe naca'.
18Lawe' da dxun na zaga, benne' we̱n zrin ca', ne benne' xra'aga we̱n zrin chee̱ bxruze ca' ba zaj nabeque̱' xi', ne zaj ze̱' dxu'a xi' na' dxelexezré'ene̱'. Pedro ze̱' nen benne' ca', dxexezré'ene̱' dxu'a xi' na'.
19Bxruze blau guzú lawe̱' dxuche̱be̱' Jesús nuca benne' ca' zaj naque̱' benne' dxusé̱dene̱', ne bi da dxusé̱dene̱' le̱'.
20Jesús guzre̱' le̱': ―Neda' ba bchálajqueza' láwela xúgute̱ bénneache. Bsé̱dequeza' lu xu'u ca', ne lu xu'u naga dxelezraga xúgute̱ benne' judío ca'. Quebe bi bchálaja' bagácheze.
21¿Bizr chee̱ na' dxuche̱bu' neda'? Bche̱be benne' ca' ba belenne̱' chia', na' le̱' xelenné̱' bi da bchálajle̱na' le̱'. Benne' ca' zaj nézene̱' da ba gunnéa'.
22Gate gunná Jesús da nigá, na' tu benne' xra'aga we̱n zrin chee̱ xudau', benne' ze̱' na', gudape̱' xraga Jesús, na' gunné̱': ―¿Caní dxexeche̱bu' lau bxruze blau nigá?
23Jesús beche̱be̱': ―Che gunnéa' tu da cale̱la, gunná ájala naca na. Che da gunnéa' naca na xrlátaje, ¿bizr chee̱ na' dxu'u neda'?
24Nadxa Anás gusél-le̱' Jesús, zaj nadxéaj ne̱'e̱, lau Caifás, bxruze blau.
25Dxácate̱ na' ze̱ Pedro dxu'a xi' na' dxexezré'ene̱', na' gulé̱'e̱ le̱': ―¿Quebe nacu' lue' tu benne' ca' zaj naque̱' tuze nen bénnea'? Na' Pedro gunné̱': ―Quebe naca'.
26Nadxa tu benne' we̱n zrin chee̱ bxruze blau, benne' naque̱' xrtia bénnea' guchugu Pedro nague̱', bche̱be̱' le̱': ―¿Quegá ble'eda' lue' nen bénnea' naga zaj ze̱ xaga olivo ca'?
27Pedro gunné̱' xecha lasa: ―Quebe núnbe'a bénnea'. La' ná'queze gudxezre xjeaj.
28Nadxa belexebéaje̱' Jesús lizre Caifás, na' guleché̱'e̱ Le̱' xu'u lizre benne' xu'u lu ne̱'e̱ xe̱zr la xu na' waláz chee̱ Roma. Ba dxezú lau dxaní'sise̱', na' benne' judío ca' quebe gulu'e̱ xu'u na' chee̱ quebe xelexegá'ane̱' sban, lawe' da che xelu'e̱ na', quebe gaca xelawe̱' xrche' chee̱ Laní Pascua.
29Chee̱ le̱ na' bdxuaj Pilato bchálajle̱ne̱' benne' ca', na' guzre̱' le̱': ―¿Bizra da zria dxágule benne' nigá?
30Belexeche̱be benne' ca': ―Chela ca naque̱' tu benne' we̱n da zrinnaj, quebe gudentu' le̱' lau'.
31Nadxa Pilato guzre̱' benne' ca': ―Le xeché̱'e̱, ne le guchi'a chee̱' cáte̱ze naca da nadxixruj bea chee̱le. Belexeche̱be benne' judío ca': ―Netu', benne' judío, quebe naca chee̱ntu' nu gútentu'.
32Ca'an guca, guca li ca naca da ba gunná Jesús ca gatie̱'.
33Pilato bexu'e̱ xu'u na', na' gunné̱' Jesús, ne bche̱be̱' Le̱': ―¿Nacu' Lue' Wenná Bea chee̱ judío ca'?
34Jesús gunné̱': ―¿Dxenabu' da nigá lue'zqueze, u lawe' da nu guzre lue' ca naca chia'?
35Pilato beche̱be̱': ―¿Naca' neda' judío? Benne' xe̱zr la xu chiu', ne benne' xíchaje̱ ca' chee̱ bxruze ca' buludée̱' lue' lawa' neda'. ¿Bizra be̱nu'?
36Nadxa beche̱be Jesús: ―Naga dxenná be'a quebe naca na chee̱ xe̱zr la xu nigá. Chela naca na chee̱ xe̱zr la xu nigá, na' benne' ca' zaj naque̱' neda' tuze welásaqueze̱' chee̱ quebe tea' neda' lu na' benne' judío caní. Naga dxenná be'a quebe naca na nigá.
37Nadxa guzre Pilato Jesús: ―¿Nacu' Lue' wenná bea? Beche̱be Jesús: ―Naca' wenná bea, cáte̱ze dxennáu' lue'. Neda' gúlaja', ne bla'a lu xe̱zr la xu nigá chee̱ nnia' da li. Xúgute̱ benne' ca' dxelune̱' ca dxenná dizra' chee̱ da li dxelenne̱' da dxennéa' neda'.
38Pilato gunné̱': ―¿Bizra na' da li? Ca gudé bche̱be Pilato Jesús caní, na' bdxúaje̱' xetú. Bchálajle̱ne̱' benne' judío ca', na' guzre̱' le̱': ―Neda' quebe bi da cale̱la dxezrelda' nun benne' nigá.
39Le'e zua tu da zéajle̱le. Gusana' neda' tu benne' xu'u lizre xia lu Laní Pascua nigá. ¿Dxaca lázrele gusana' wenná bea chee̱ judío ca'?
40Nadxa xúgute̱' gulenné̱' zizraj: ―¡Quegá benne' nigá! ¡Bsan Barrabás! Barrabás na' naque̱' gubán.
