Text copied!
CopyCompare
Se kaling peokit - Juan

Juan 14

Help us?
Click on verse(s) to share them!
1Minikagi si Jesus diyà te menge tinoledaan din, “Ikà niyo egketetana. Pemenal kaw te Timanem. Pemenal kaw heman kanak.
2Medita se tambì kidoen te balay eg-ogpaan te Amay ko. Simpana kenà iyan benal, eked a peden peg-indan kenyo. Meneng domoton a den amon ipetagad ko kenyo se ogpaan niyo.
3Aw mepenga se pegpetagad ko te ogpaan niyo, lomikò a dini aw ipetaking ko sikiyo amon meg-ogpà kaw doma ko.
4Netegahan niyo den heman se dalan pesalo doton te dotonan ko.”
5Minikagi si Tomas, “Pengolo, wedà day ketegahi se dotonan nikaw. Yan eked day heman ketegahi se dalan.”
6Minikagi si Jesus, “Siak se dalan. Siak se kebenalan. Siak se eglekatan te kaling pedowan. Eked pekedoton se otaw te Amay ko singed aw onà dan mokit kanak.
7Aw netegahan a niyo, yan ketegahan niyo den heman se Amay ko. Lekat seini, netegahan niyo den sikandin, aw kinità niyo den heman sikandin.”
8Minikagi si Felipe, “Pengolo, pekitai den se Timanem kenami, aw yan wedad den doma pemoyoen day.”
9Minikagi si Jesus, “Felipe, ontò den nenamay se pegdoma ko kamno. Yan nepela a so wedà ka pa ketaga-taga aw sinu a. Se kedita te otaw kimità kanak, kimità den dan heman te Amay ko. Nepela a te meibeg ka ipekità ko kenyo se Amay ko.
10Iling te wedà ka pemenal te diyà a te Amay ko, aw diyà heman sikandin kanak. Pengkey se eg-ikegiyen ko kenyo, kenà ko iyan egteboken, meneng yan se eg-inangen te Amay ko eg-ogpà diyà kanak.
11Pemenal ka te inikagi ko, te diyà a te Amay ko, aw diyà heman sikandin kanak. Aw eked ka pemenal kenyan pengkey siak se minikagi kenyan, pemenal ka kenyan tandà te menge kepelahan ininang ko.
12“Eneng-enengi niyo se kagi ko kenyo. Se otaw memenal kanak, iling heman te eg-inangen ko se inangen din, aw labi pa dakel se inangen din, so mesayo a den aw molì a doton te Amay ko.
13Pengkey eden se pemoyoen niyo diyà te Amay ko pineokit te ngadan ko, yan se inangen ko kenyo, amon kitaen niyo te melangkaw se Timanem pineokit te eg-inangen ko.
14Aw memoyò kaw pineokit te ngadan ko, siak se meg-inang kenyan.”
15“Aw dakel se pedowan niyo kanak, yan tomolò kaw heman te impunù ko kenyo.
16Memoyò a diyà te Amay ko amon memegay kenyo te Teletabang somelilin kanak, aw meg-ogpà sikandin kidoen kenyo te wedad temanan.
17Yan se Espiritu Santo egtoladà te kebenalan. Eked sikandin kinewai te menge otaw egtaking te medaet ketanem te keneyonan, so kenà dan egkità kandin, aw kenà dan egketaga-taga aw sinu sikandin. Meneng sikiyo, netaga-taga kaw den kandin, so egdomaan kaw din aw ogpaan kaw te wedad temanan.
18“Aw mesayo a, eked kaw keinang iling te menilo, so lomikò a dini kenyo.

19Te eked kenamay, eked a den todà kitai te menge doma otaw. Meneng sikiyo, todà kaw komità kanak. So doen pedowan ko wedad temanan, begayan kaw heman te pedowan wedad temanan.
20Aw domateng se aldaw sìyan, ontò niyo ketegahan te diyà a te Amay ko, aw diyà kaw kanak, aw diyà a kenyo.
21“Se otaw menenalan te impunù ko aw tomolò kenyan, yan se otaw ontò dakel se pedowan din kanak. Se otaw dakel se pedowan din kanak, yan se egkedekelan te Amay ko te pedowan, aw dakel heman se pedowan ko kandin, aw megpekità a heman kandin.”
22Minikagi si Judas, sìyan kesangay i Judas Iscariote, kagi din, “Pengolo, menonen no se pegpekità no kenami, meneng eked ka pegpekità te menge doma otaw?”
23Timaba si Jesus, “Aw dakel se pedowan te otaw kanak, tomolò sikandin te punù ko. Kedekelan heman sikandin te Amay ko te pedowan, aw domoton kay kandin aw meg-ogpà kay kidoen te pedowan din.
24Se otaw wedad kedakel te pedowan din kanak, yan se otaw kenà egtolò te punù ko. Se intoladà ko kenyo, kenà iyan lekat te kanak aneng-aneng, meneng lekat iyan te Amay ko simogò kanak.
25“Migtoladà a kani kenyo dalem te dini a pa kenyo.
26Meneng doen Teletabang isogò te Amay ko somelilin kanak, aw yan se Espiritu Santo. Sikandin se megtoladà kenyo te kedita, aw megpeaneng-aneng kenyo te kedita te intoladà ko kenyo.
27“Ibegay ko den kenyo se kelinaw te pedowan. Kenaken kelinaw se ibowang kenyo. Eked pekebegay se otaw dini te keneyonan te kelinaw te pedowan ibowang ko den kenyo. Yan ikà niyo egketetana. Ikà niyo heman egkelemitan.
28Dinineg niyo se inikagi ko gina kenyo, te agpet a den mesayo, aw lomikò a pa heman dini kenyo. Aw ontò dakel se pedowan niyo kanak, meluba kaw heman kenyan, so molì a doton te Amay ko. Sikandin se labi pa melangkaw diyà kanak.
29Te eked pa iyan ketoman, tapay a den minikagi kenyan diyà kenyo, amon aw metoman iyan, memenal kaw te insogò a te Timanem.
30Wedad den nael aldaw te pegtoladà ko kenyo, so agpet den domateng se pengolo te medaet dini te keneyonan, amon domaeg peden kanak. Eked a din dàgi,
31meneng gayed ko egtoloen se impunù te Amay ko kanak, amon ketegahan te kedita te otaw te dakel se pedowan ko diyà te Amay ko. Tindeg kaw den, so agpet kidon den mesayo lekat dini.”