Juan 18

1

2

3

4

5

6

7

8

9

10

11

12

13

14

15

16

17

18

19

20

21

¹Jesús wegi-ibmar-sogsad-sorbali, na e-sapinganmala nade-gusad, dian-Cedrón-obakar, bia sapimar-digar-naidse, agi na e-sapinganmala ambikudapid.

²Judas, darba-Jesús-uknaid, a-neg wismogad, ar ade gusgu Jesús na e-sapinganmala, ase ambikunad-damalad.

³Judas, suar-ibed-bukidar sedani-gusad, degine, Bab-Dummadse-goled-neggi-suar-ibed-arbamalad-e-dummagan eba dani-gusmarmogad. Dule-irwa-Bab-Dummadse-gormalad-e-dummagan, degi, Fariseomar, amar Bab-Dummadse-goled-neggi-suar-ibed-arbamalad barmiar-gusmalad. Judasba-danimalad gwallu-abalagi, degi, acha-gwallu, degine, espunyar sedani-gusmalad.

⁴Ar Jesúsdi na bela egi-ibmar-guoedi wissoggu, dulemar-abin ali, ega sogded: —¿Doa be amimala?

⁵Abin-sogdemar: —Jesús-Nazaretgined an amimalad. Jesús, abin-sogded: —Ani an a-duled. Amar-abargi Judas, darba-Jesús-uknaid, deun gwichi-gusmogad.

⁶Jesús amarga sogsagu, “Ani an a-duleye,” amar sorsik sikirmakdemalad, degi, napagi aimukudmalad.

⁷Jesús gannar amarse egisdebarsun: —¿Doa be amimala? Amar, abin-sogdemar: —Jesús-Nazaretgined an amimalad.

⁸Jesús, abin-sogded: —An bega sogsamalad, ani an a-duleye, ar be an-amimalale, an-sapingan naega be imakmardo.

⁹Ar weyob gusdo, adi Jesús na Bab Dummadga ibmar-sogsadba guegar: “Be-anga-dulemar-uksamaladi, wargwensaar an oyoggussurye.”

¹⁰Degi Simón-Pedro, ar espunyar-na-naiddi e-uka-yaba-maidi onosgu, dule-irwa-Bab-Dummadse-gormalad-bur-dummad-mai naibi imaksad, e-uaya-nuedsikid siksad. A-maide Malcoye-nugad.

¹¹Jesús geb degi Pedroga sogded: —Be espunyar e-uka-yaba be odoge. ¿Ar dummad an naibiguoed an ina-gaibid goboedyob Bab anga uknaidgi an wilegosurde? Suli, an wilegoe.

¹²Degi suar-ibedmar, degine, e-dummad, degine, Judiomar-Bab-Dummadse-goled-neg-suar-ibmala Jesús-gasmarsun, geb degi Jesús-edichamalad.

¹³Anás-nugadse Jesús-sesmargweled, ar ade Caifás-e-sakad. Ar deun a-birgagi Caifás, dule-irwa-Bab-Dummadse-gormalad-bur-dummadga maid.

¹⁴Ar we-dule Caifás, deun Judiomarga binsaed uksadid, deun sogsa-gusgu: “Ar dule-wargwen neggwebur-anar bur burgwer nabirye.”

¹⁵Jesús-sorba nadap-gusmalad, e-sapin-wargwen, degi, Simón-Pedro. We-sapin-wargwende, dule-irwa-Bab-Dummadse-gormalad-bur-dummad mag-daked. We-sapinde Jesúsba dule-irwa-Bab-Dummadse-gormalad-bur-dummad-e-neg-imbase dogsamogad.

¹⁶Ar Pedrodi magaba gwisgusad, yawagak-naba. Sapin-wargwen, dule-irwa-Bab-Dummadse-gormalad-bur-dummad-mag-dakedi magaba noalid, geb ome-yawagak-dakedga sunmaksagu, neg-yaba Pedro-odosad.

¹⁷Geb degi ome-yawagak-dakedi Pedroga sokalid: —¿Ar be Jesús-e-sapinmosursi? Pedro, abin-sogded: —Suli, an e-sapinsuli.

¹⁸Agine, maigan, degi, suar-ibmala-Bab-Dummadse-goled-neg-dakmaladi, gwichimalad. Amarde soo ogasmalad, ar ade neg-damberbad. Amar deun soogi wabukmargu, amar-abargi Pedro gwichigusmogad, soogi waegar.

¹⁹Degi dule-irwa-Bab-Dummadse-gormalad-bur-dummad, Jesússe e-sapingan-egichialid, degine, e-ibmar-odurdakdiid ese egichiarbalid.

²⁰Jesús, abin-sogded: —An-sunmaksadi bela bakar-buud dulemar-asabin an sunmaksad. An gusgu Judiomar-onmaked-neggi, degi, Bab-Dummadse-goled-neggi an ibmar-odurdaksad, bia Judiomar ambikunoni-daedgi. An-sunmaksadi, dukuar an sunmaksasulid.

²¹¿Ar ibiga be anse egissunna? Be egise, dulemar-an-itosmaladse, igi an sunmaksa. Ar amar wisid igi an sogsa.

²²Ar Jesús degi-sogsagua, Bab-Dummadse-goled-neg-daked-suar-ibed-wargwen, Jesús-walik gwichidi, wagargi Jesús-bibyosgu, ega sogded: —¿Ar weyob be dule-irwa-Bab-Dummadse-gormalad-bur-dummad-abinsade?

²³Jesús, abin-sogded: —Ar noar an ibmar sogsale, be an-barsogdo ibigi noar an sogsa. Ar ibmar nabir an sogsardi, ¿ibiga be an-sarsosunna?

²⁴Degi, Anás atinnar Jesús-barmissun, dule-irwa-Bab-Dummadse-gormalad-bur-dummadse, Caifás-nugadse.

²⁵Ar deun Pedrodi soo-naba amba wagwichi, agi ega sogdemalad: —¿Ar be we Jesús-e-sapin-wargwenmosursi? Degi Pedro osulod abin-sogded: —Suli, an a-e-sapinsuli.

²⁶Dule-irwa-Bab-Dummadse-gormalad-bur-dummad-mai-wargwen, Pedro dule-wargwen-ibe uaya-siksad-e-gwenad, a-dule Pedroga sokalid: —¿Ar be an be-daksasursi sapimar-digar-naidgi Jesúsba gudii?

²⁷Pedro gannar osulodbalid, geb agi gannir yog namakaled.

²⁸Geb degi Caifás-neggi gunanaid, Jesús-sesmar, Pilato-neg-Pretorio-nugadse. Deun bato oibodanikid. Judio-dummagan melle na ised nikuegala, yapa Pilato-negse doggusmalad, adi nabir Judiomar-ibagi sibad-wawaad-gunmalagar. We-sibad-wawaad gundamalad Bab-Dummad-Israel-Dulemar-Egiptogi-Wilebukwa-Onosad-Ibagi.

²⁹Degi Pilato Judiomarse nononisun, ega sogdesun: —¿Degite ibi-ular we-dulede be anse sedanimarsunna? ¿Ibi oakalossunna?

³⁰Abin-sogdemar: —Ar we dule-iskana-sulina, anmar bese sear-sulinad.

³¹Geb degi, Pilato Judio-dummaganga sogdesun: —Ar na be sumar, be-igar-maidba ega igar na be amimarsun. Judiomar, abin-imakdemalad: —An geg gumalad. Bemar-Roma-dulemar anmarga igar-uksasulid, dule-iskudimalad-oburgo-deeye.

³²Jesús-ibmar-sogsadba guegala, deyob gusad, ar ade sogsa-gusad, ede igi burgoe.

³³Geb degi Pilato e-neg-Pretorio-nugadse gannar dogdebarsunnad, degi, Jesússe gordapid, ega sogded: —¿Ar be Judiomar-E-Rey-sunnadi?

³⁴Jesús, abin-sogded: —¿Ar na be dukin soge, igi, dule-baid-bega-sogedba be soge?

³⁵Pilato, abin-sogded: —¿Ar an Judio be an-daksii? Be-dulemar, degi, dule-irwa-Bab-Dummadse-gormalad-e-dummagan ar anga be-uksamalad. ¿Ar ibu be oakalossunna?

³⁶Jesús, abin-imakde: —Ar an Reyga-gued-igar we-napnegginedsulid, ar we-napnegginedina an-sordamar an-bina urwemaloenad, adi melle Judiomarse an-galegegar. Ar emigindi an na neg-gaoedi we-napnegginedsulid.

³⁷Geb degi Pilato ega sogdesun: —¿Ar degisoggu, be reysunde? Jesús, abin-sogded: —Ar bede soged, an reyye. Ar a-ular an gwalulesad, degine, a-ular an we-napnegse nonikid, adi igar-napiragwadgi sunmakegar. Ar dule igar-napiragwad-sordale, an-gaya-burba-sogedba dado.

³⁸Geb Pilato ega sogded: —¿Ar ibu igar-napiragwadsunna? Ar deyob Pilato Jesúsga sogsagu, gannar magaba Judiomarse noalid, amarga sokalid: —Ar we-dule gwen ibmar-oakalos an daksulid.

³⁹Ar bemar gusgu bemar-ibagi, anse egis damarsoggu, dule-wargwen-eskaryagi-mellesiid-onogegar, ¿ar bemarga an Judiomar-E-Rey-onobi be abemala?

⁴⁰Geb degi bela gannar binnasur gotemarbalid, sogdemalad: —Suli, we melle be anmarga onomar, anmarga be onogedi, Barrabás. Barrabásde dakleargu, dule atursaed-duled.