Jone 14

1

2

3

4

5

6

7

8

9

10

11

12

13

14

15

16

17

18

19

20

21

¹Jisasame lao pituu, “Nyakama mona etete kenda nakayalapape. Nyakamame Gote masoo minao pituu namba masoo minalapapeaka.

²Nambanya Takangenya anda dokonya palo longo katenge. Nakatenge pili kandao doko, nyakama wamba langioli. Nambame nyakamanya panda depa lakala pelyo.

³Nambame pao nyakamanya panda depa latakato dokopa nayakama namba katato yuu dokonya namba-pipa awapa katamana lao lanyala dee ipato.

⁴Nyakamame namba pato yuu dokonya kaitini doko masilyaminona,” lea.

⁵Dopa leamopa Tomasame baa lamaiyoo, “Kamongo, emba anja patepe lao naima masala naelyamano. Naimame aipa petala kaitini doko masetamape?” lea.

⁶Dokopa Jisasame baa lamaiyoo, “Kaitini dokopi, kiningi pii dokopi, lete katasingi dokopi dutupa nambana, endakali mendeme waka mendenya-kaita Takange kalyamo dokonya napata. Namba-ketae iki pata.

⁷Nyakamame namba masetamino kandao doko, nyakamame nambanya Takange doko apata masetamiaka. Indupa pituu tee pyao nyakamame baa masowapi kandawapi petelyaminona,” lea.

⁸Dopa leamopa Pilipame baa lamaiyoo, “Kamongo, embame embanya Takange doko naima laitaka pii. Dokome naima kapa jalapomona,” lea.

⁹Dokopa Jisasame Pilipa lamaiyoo, “Pilipa, namba nyakama-pipa katamanopa yuu gii longo patelyamo doko embame namba masala naelepe? Endakali mendeme namba kandelyamo dokome Takange kandelyamo. Embame aipuma nambame Takange laitaka pii leepe?

¹⁰Namba Takange-pipa pakatae katengena, Takange namba-pipa pakatae katengena lao embame masoo minala naelepe? Nambame nyakama pii langilyo dupa namba tangeme masoo langya naelyo. Takange namba-pipa pakatae kalyamo dokome baanya kalai dupa pilyamo.

¹¹Namba Takange-pipa pakatae kalyopa Takange namba-pipa pakatae katengena lelyo doko nyakamame masoo minalapape. Daa yaa kandeno doko, nambame kalai pilyo dupanya-kaita masoo minalapape.

¹²“Nambame nyakama etete kiningi langilyona, nambame kalai pilyo dupa namba lao masoo minatamo endakali dokome pitaka. Baame kalai etete andake dupa pyoo nambame kalai pilyo dupa ita minata. Doko namba Takange kalyamo dokonya pato.

¹³Nyakamame namba lao masetala opale mende namba-kisa tee latamino doko nambame nyakama dito. Takange dokome Ikiningi doko-kisa kenge andake nyina lao dopa pito.

¹⁴Nyakamame namba lao masetala opale mende namba-kisa tee latamino doko nambame lataminoli pitona,” lea.

¹⁵Dee Jisasame lao pituu, “Nyakamame namba auu kayatamino kandao doko, nambanya mana setapae dupa watao minatami.

¹⁶Nambame Takange-kisa tee latopa baame nisingi waka mende nyakama-pipa tenda tendapi katawaka katataminopa lao nyakama dita.

¹⁷Yuunya endakali dupame kiningi lenge Sipitisa doko nyala naengema. Doko, dupame kanja nayao masala nayao pingima. Dopaka doko, nyakamame baa masilyamino. Doko, baa nyakama-kisa kalyamona, dee nyakama-pipa pakatae katatamiaka.

¹⁸Nambame nyakama muiyene joo kalyepale lao yakinala nayato. Namba nyakama katatamisa ipato.

¹⁹Kuki lee mendepale yuunya endakali dupame namba dee nakandatami. Dopaka doko, namba lete kalyona nyakama apata lete katatamino dokonya nyakamame namba kandatami.

²⁰Gii doko ipatamo dokopa nyakamame namba Takange-pipa pakatae katenge lamo, nyakama namba-pipa pakatae katenge lamo, namba nyakama-pipa pakatae katenge lamo lao kandatami.

²¹Nambanya mana setapae dupa nyepala watao minatamo endakali dokome namba auu kayata. Namba auu kayatamo endakali doko nambanya Takangeme baa auu kayata. Nambame apata baa auu kayapala baame namba kandena lao panatoakana,” lea.

²²Dopa lateamopa (Jutasa Isaketiote ongome daa) Jutasa lenge waka mendeme Jisasa lamaiyoo, “Kamongo, embame aipuma naimame iki emba kanjepale lao laitaka petala, yuunya endakali dupa laitaka napyaanya pilipi?” lea.

²³Dokopa Jisasame baanya pii yanu pyakamaiyoo, “Endakali mendeme namba auu kayatamo dokome nambanya pii doko watao minata. Nambanya Takangeme baa auu kayataka. Nambapa nambanya Takangepa nalimba lapota baa-kisa ipatala anda pitamba.

²⁴Namba auu nakaelyamo endakali dokome nambanya pii dupa watao naminilyamo. Nyakamame pii silyamino dake nambanya pii daa. Nambanya Takange namba puu leamo dokonya.

²⁵Nambame nyakama pii langilyo datupa namba nyakama-pipa kalyamano dakepa langilyo.

²⁶Dopaka doko, nyakama nisetamo Oli Sipitisa doko Takangeme namba lao masetala epena lata. Dokome dupa pitaka nyakama mana langyoo dee nambame nyakama mana langio dupa pitaka masalapale lao nyakamanya masingi sakatasakao pita.

²⁷“Nambame mona lyuu lenge doko nyakama-kisa yakinelyo. Nambanya mona lyuu lenge doko nyakamanya palyekelyo. Yuunya endakali dupame palyingili pyoo nambame nyakamanya palyakala naelyo. Nyakama mona etete kenda kayawapi paka kayawapi napyepape.

²⁸Nambame nyakama pii dapa langio doko sepeami: ‘Nambame nyakama yakinatala patona, dee nyakama katatamisa ipatona,’ lea. Wamba nyakamame namba auu kayapimili kandao doko, namba Takange katapyasa paapeno lao nyakamame mona yaepapimili. Doko Takange baa nambanya alyasale.

²⁹Dopa pitamo dokopa nyakamame masoo minataminopa lao dopa petala nayapumopa indupa nambame nyakama tee pyao langitilyo.

³⁰Namba nyakama-pipa dee pii longo lao awapa nakatamana. Doko yuu dakenya isingi doko epelyamo. Baame kapa pao namba ita minapenge nanjeta.

³¹Nambame Takange auu kaeleno lao yuunya endakali dupame kandena latala Takangeme piipi leamoli pyoo nambame pilyo. Dopana, naima panda datupa yakinatala mona sakatalapa,” Jisasame lea.