Text copied!
CopyCompare
Label Buk Baibel - Jon

Jon 14

Help us?
Click on verse(s) to share them!
1E Iesu i atai la mange, “Gong mulo nuknuk kol. Mulor tortorot o e God, pa mulor tortorot otleng hok.
2Ting na rumai ane Tata, a galis a rum. Ning bel, ar atai mulo otleng ono. Ar han sur ar sang tar a pukna sur mulo.
3Ning ia ka sang tar a pukna sur mulo, ar ulak, pa ar ben pas mulo tetek iau, sur mulo otleng mulor kes ting na hanua ning ar kes ia.
4Mulo tasman ot a ngas sur a hanua ning ar han suri.”
5E Tomas i atai i mange, “Leklek, bel mila tasman a hanua ning ur han suri, pa milar tasman mangmangasa a ngas suri?”
6E Iesu i kelesi mange, “Iau a ngas, pa iau a momolna, pa iau a lalaun. Bel tik ir han tetek e Tata ana ta ngas masik, hok ka.
7Ning mulo tasman momol iau, mulor tasman e Tata otleng. Pa onone mulo ka tasmani, pa mulo ka oroi.”
8E Pilip i atai i mange, “Leklek, ur asangan tar e Tamam tetek mila, i ka i ning mila mang suri.”
9E Iesu i kelesi mange, “Pilip, ia ka kes kol taum o mulo, pa belot u tasman iau? Esining ka oroi iau, ka oroi tar e Tata. Sur asa u atongi mang ar asangan tar e Tata tetek mulo?
10Bel u tortorot mang iau kaning o e Tata, pa e Tata kane hok? A warwarala ning a atongi ta mulo, bel anuki. E Tata ning kane hok i tol anuna titol.
11Mulor tortorot hok ning a atongi mang iau kaning e Tata, pa e Tata kane hok. Ning bel mulo tortorot ana nuk a warwara, mulor tortorot ka hok kamkamna ana ututnala ning a toli.
12“A atong momoli ta mulo, esining i tortorot hok, ir tol a ututnala larning a sira toli, pa ir tol a tatatnan utna tana ututnala ning ka tol tari, anasa ar han tetek e Tata.
13Pa ututnala rop ning mulo nunungi ana risak, ar tolsot pasi, sur e Natnalik ir saran a matatar o e Tamana.
14Ning mulo nunung sur ta utna ana risak, ar tolsot pasi.
15“Ning mulo mang sur iau, mulor mur anuk na warkuraila.
16Pa ar nunung e Tata, pa ir sune ning a Tena Arnangai otleng tetek mulo, sur ir kes tikin taum o mulo,
17a Talngan Tabu na momolna. A taraila tagun a rakrakan hanua bel la mang suri, anasa bel la oroi lalani pa bel la tasmani. Ika mulo, mulo tasman a Tena Arnangai anasa i kes taum o mulo pa ir kes o mulo.
18Ning ar han kusun mulo, bel mulor kes na biasui, ar ulak ka tetek mulo.

19“Bel ma i bongnani, sur a taraila mite na rakrakan hanua bel lar oroi iau. Ika mulo, mulor oroi iau. Mulor laun anasa a laun.
20Ana pukakiar ning ar laun ulak kusun a minat, mulor tasmani mang iau kaning o e Tata, pa mulo otleng kane hok, pa iau kaning o mulo.
21Esining i tong akes anuk na warkuraila pa i muri, i ning i mang sur iau. Pa e Tata ir mang suri, pa iau otleng ar mang suri, pa ar asangan iau tana.”
22E Judas (bel e Judas Iskariot) i deken e Iesu mange, “Leklek, sur asa ning ur asangan tar u ta mila ka, pa bel tana taraila ana rakrakan hanua?”
23E Iesu i kelesi mange, “Ning tik ir mang sur iau, ir longor ana nuk na asasaer. Pa e Tata ir mang suri, pa miar han teteki, pa miar kes taum onoi.
24Ika esining bel i mang sur iau, bel ir longor ana nuk na asasaer. A warwarala ning mulo longori bel anuki, anun e Tata, ning i sune iau.
25“A atong a warwarala ne ta mulo ning kanet a kes napirimulo.
26A Tena Arnangai, a Talngan Tabu, ning e Tata ir sune i ana risak, ir asaer mulo ana ututnala rop, pa ir anuknuk mulo ana warwarala ning ia ka atai tar mulo ono.
27A saran a bal molmol tetek mulo, anuka bal molmol ning a tabar mulo ono. Bel a tabar mulo larning a rakrakan hanua i artabar. Gong mulo nuknuk kol, pa gong mulo matmataut.
28“Mulo ka longor tar asaning ia ka atong tari mang, ‘Ar han pas pa ar ulak tetek mulo.’ Ning mulo mang sur iau, mulor gas mang ar han tetek e Tata, anasa i leklek tak.
29Ia ka atai nigon tar mulo ana ututnala ning lamur ir hanot, pa ning ka hanot, mulor tortorot.
30“Bel ma ar awara kol mulo, anasa e Satan, a ningnigo ana rakrakan hanua, milau ir hanot. Belal rakrakaina sur ir tol ta utna hok,
31ika ar tolsot arop pas a ututnala ning e Tata i sune iau sur ar toli, sur a rakrakan hanua ir tasmani mang a mang sur e Tata. “Mulor tur pa dalar han.”