1Jesus-el Akngey ayernek-penh, ra kwertengerl ikwerenh-rnem-akert alhek. Lher Kidron-angkwarr artarnpenhek intwar-ampeny-warl. Rernem alhek arwerl alip-angketyarr-warl.
2Judas, kwertengerl anyent. Ingwer-ingerant ra Jesus renh ahayiweyenh artwa ahelengkw-rnem-warl. Ra apmer renh iterl-arek, Jesus rernemamarl akarrirrenh kwertengerl ikwerenh-rnem-akert.
3Judas apetyek artwa ahelengkw Rome-areny-rnem-akert, Jesus renh antwerrketyek. Tyaty-areny iltyemwerney-rnem apetyek arrpemarl, Pharisee-rnemel renh-rnem thwenek tyaty-areny ilkwernemel-then. Rernem lyenenty-rnem-then rwalep-rnem-then akngetyek, walth-rnem-then. Jesus-el renh-rnem arnarek, akngerr. Ra arrwekel-antey iterl-arek, rernem apetyetyek, atwekerr-awaty. Ra rtnerl-alhek ayernemel, “Artwa angwenhek arrantherr nthweyel?” Rernem tyernek, “Jesus Nazareth-arenyek anwantherr nthweyel.” Jesus ra ilelhek, “Ayengarlap ra.” Judas ra ikwer-rnem-itwek rtnenh.
6Jesus ikwer-rnem ilelhek-penh, rernem arlengirreynek, ahern-warl aytnemel, ingkerr-antey.
7Jesus-el ayernek arrpemarl, “Angwenhek arrantherr nthweyel?” Rernem renh tyernek, “Jesus Nazareth-arenyek.”
8Jesus-el renh-rnem ilek, “Kel ayeng arrwekel-antey arrekantherr ilelhek. Arrantherr ayenh inngantey arey-alhek. Artwa nhenh-rnem tyarlewenherr-arey, anterrkwey-angenh.”
9Ahelengkw-rnemek ra arrngert angkek. Alakenh angka innganem irrek. Ra Akngey-warl kel angkek arrwekel-antey, “Akngeyay! Ntwa kwertengerl-rnem ingkerrenh atyeng anthek, atha renh-rnem atnyen-ayntetyek iylpelerlewey-angenh. Kel atha renh-rnem atnyeneyel-antey.”
10Simon Peter-el nayp arreylp-akertel iylpa arternek arraty-ampeny-angkwarr, tyaty-areny-kenh warrkenh itna ikwerenh Malchus.
11Jesus-el Peter ilek, “Nayp menty arrerneyna pilt-warl! Akngeyel ayenh thwenek, ayeng irrwampemel ilwetyek. Nthakenh ayeng Akngey-kety intwemelirrey-angenh awelhey-angenh-then.”
12Ikwer-penhan irlkenty rernem Jesus renh antwerrkek arertnemel Jew-kenh iltyemwerney-rnemel-then.
13Rernem renh akngek artwamp Annas-warl. Ran ahenterrikw Caiaphas-kenh anenh, Caiaphas tyaty-areny atyetyart ilkwa.
14Caiaphas ran arrwekel-antey council-areny ingwer-rnem ilek, “Anwantherr artwa nhenh atwenty, Rome-arenyel-rnem anenhantherr menty arem. Anwantherr renh tyarlewenty, rernemap anwenhantherr ingkerrenh atwemarl. Alakenh-they anwantherr Jesus renh ipmek atwey-areny.”
15Ahelengkw-rnemel Jesus akngeynek Annas-kenh apmer-warl. Peter-el-then kwertengerl ingwerel-then Jesus renh ingkern-they apentek. Atyetyart ilkwa tyaty-arenyel kwertengerl anyent weth iterl-arek. Rap renh mentyarl arek. Alakenh-they rant Jesus renh apentek, aylpenhek atyetyart-kenh yard-warl.
16Peter aketh-itwek mpwelhenh keyt-itwel. Kwertengerl ingwerel renh arek. Kwertengerl ra yard-they tyerrelhemel alpek, ra arelh warrkenh ingwer-warl angkek, “Keyt altywerila, ra aylpenhetyek. Atha renh iterl-areyel, ran mwerrarl.” Ratherr atherr-antey keyt-angkwarr aylpenhek.
17Arelh ra Peter renh ayernek, “Nga apek Jesus-kenh kwertengerlarl?” “Arrangkw.” Peter ilelhek, “Ayeng arlarl.”
18Ingwel irrernt-anem ayntek. Ahelengkw-rnem-then warrkenh-rnem-then rernem arlterrngirrey-ayntek rwel. Peter alhek ikwer-rnem-warl, rwel arlterrngirretyek arrpemarl.
19Atyetyart ilkwel Annas-el Jesus renh ayernek, “Angwenh kwertengerl ngkwenh-rnem? Ilek ntwa renh-rnem akalty-antheyel?”
20Jesus-el renh tyernek, “Athan aketh-antey ingkerrenh akalty-anthek, ingkerrenhel ayenh awetyek, atha anyelkel akalty-anthey-angenh. Atha ingkerrenh akalty-anthek tyaty akely-rnem-itwek, tyaty ilkwitwek, rernemamarl anyentirrenh.
21Ntwa ayenh ayerney-angenh. Ntwa ingwer-rnem ayerney-areny, rernemarl ayenh awek. Rernemarl angka atyenh awekarl, rernem akaltyarl. Renh-rnem ayerna, rernem ngenh iletyek.”
22Jesus angkek-penh, warrkenh ingwerel renh arreyl atwek angkemel, “Nga alakenh angkey-angenh atyetyart tyaty-areny ilkwekarl!”
23Jesus-el renh ilek, “Ilekek ntwa ayenh atwekarl, ayeng apmwel-areth angkenty-arrpantey? Ayeng apek apmwel-areth angkek, ayenh ilay!”
24Warrkenh-rnemel Jesus renh arertnek. Annas-el renh Caiaphas atyetyart ilkwewarl thwenek.
25Peter ra rwitwek-antey arlterrngirrenh. Ingwerentyel renh ayernek, “Nganang kwertengerl Jesus-kenh?” Peter ra ilelhek, “Arrangkwaw!”
26Atyetyart-kenh warrkenh ingwer rwitwek rtnenh, artwa weth-kenh, Peter-elarl arrwekel-antey iylpa nayp arlpenty arreylpel arternek. Ra Peter alhengk-aremel ilek, “Ay! atha ngenh weth arekarl ikwer-itwek, apmer arwerl-angketyarr ikwer-itwek.”
27Peter ra irrtywerremel ilelhek, “Arrangkw! Ayengarl arlarl!” Tywek-tywek irrwey arlkek-anem.
28Ingwepenh ingkeny tyerrelheyangel, ahelengkwel-rnem Jesus renh akngek Atyetyart Pilate-warl. Atyetyart ilkwa Rome-areny anenh Judea-areny-rnem-kenh. Jew-rnem-kenh atyetyart ingwer-rnem warl akethel-antey mpwelhek, aylpenhey-angenh artwa ingwer-rnem-kety, rernem aker Anperarl Alhek “Passover” tyenkerr alhewer arlkwetyek, angka arrwekelenyel ayntenh-angkwarr.
29Atyetyart Pilate ra aketh-warl tyerrelhek, ra renh-rnem ayernek, “Ilekek arrantherr artwa nhenhan atnwenhey-alhek?”
30Rernem renh tyernek, “Artwa yanh apmwarl. Alakenh-anyem anwantherr renh atnwenhey-alhek ngkweng-warl.”
31Pilate angkek ikwer-rnem, “Ayeng arlarl! Court arrekantherrenh-angkwarrant arrantherr tyatemiletyek renh.” Rernem ikwer-warl angkek, “Nthakenh anwernantherr renh tyatyemiley-angenh atwey-angenh, arrangkw. Rome-areny-rnem arrantherr arrngert angkek, nthakenh anwernantherr artwa apmwa renh tyatyemiley-angenh ipmek atwey-angenh. Arrantherrant renh tyatyemiletyek atwetyek!”
32Alakenh-anyem angka innganem irrek. Jesus ra angka arrwekel-antey ilelhek, rernem renh arwerl iylpeyl-atherr-warl atanthey-alenty.
33Pilate ra warl ikwer-warl aylpenhek. Ra ahelengkw-rnem ilanthek, Jesus renh kwen-warl atnwenhey-alhetyek. Ra Jesus ayernek, “Arraty inngang ngan atyetyart Jew-rnem-kenh?”
34Jesus-el tyernek, “Ngang ament iterreyel, ayeng atyetyart Jew-rnem-kenh aneyel? Ingwerentyel apek ayenh ngkweng-warl ilek?”
35Pilate angkek ikwer-warl, “Arwengk ngan! Ayengan Jew-wenyarl. Jew-rnem ngkwenh-rnem atyetyart tyaty-areny-rnem-then rernem ngenh atnwenhey-alhek atyeng-warl. Nthakenh ngan irrek? Ngang irrwernelhekarl ikwer-rnem-warl?”
36Jesus-el renh tyernek, “Arrangkwarl ayengan Ayeng atyetyart ahern-areny-wenyarl. Kwertengerl atyenh-rnemel ingwer-rnem nthakenh atweyangarl atyeng-they.”
37Pilate ikwer-warl angkek, “Nga ilelheyel nga atyetyart ilkwa?” Jesus-el tyernek, “Ngan arraty angkeyel, ayengan atyetyart ilkwarl. Ayeng ahern nhenh-warl apetyek, atha angka arraty iletyek ingkerrenhek. Ingwerenty atyeng awelhenty, rap angka arraty-angkwarrarl apenteman.”
38Pilate-el Jesus ayernek, “Ilek-angkwarr angka arraty?” Pilate warl-they tyerrerl-alhek ingkerrenh rtnenherrenh-warl. Ra angkek ikwer-rnem-warl, “Atha artwa renh ilek-ilek-angkwarr ayernek. Ra apmweweny alyelk, nthakenh atha renh ayntarrp-iley-angenh. Ilekek atha renh atweman?”
39“Anperarl Alhek ‘Passover’ tyenkerr arlkwenty-penhel arrantherr apmelerr ayenh ayernetyek arratyarl, atha artwa anyent tyayl-they tyarlewetyek. Artwa angwenharl athan tyarlewem tyayl-theyan? Jesus, atyetyart ilkwan Jew-rnem-kenharl tyarlewem?”
40Rernem arlkek, “Ranem mentyarl. Anwantherr ilkelheyel, Barabbas tyarlewetyek tyayl-they!” Barabbas artwa ahelengkw apmwarl ra anenh, ahel ra atwerrenh Rome-areny-rnem-thenarl.
